ဇန်နဝါရီ ၁၀
စစ်ကိုင်းတိုင်း၊ ပုလဲမြို့နယ်၊ ဦးနှောက်ရွာတွင် ယနေ့ ဇန်နဝါရီလ ၁၀ ရက် မနက်ပိုင်းက PPDF ခေါင်းဆောင် ဗိုလ်နဂါး အဖွဲ့ အစည်းအဝေး ပြုလုပ်နေစဉ် စစ်ကောင်စီမှ ရဟတ်ယာဉ် လေးစီး အသုံးပြုကာ တိုက်ခိုက်ခဲ့သည်။
"မနက်က ရွာကို ရဟတ်ယာဉ်နဲ့ ဝိုင်းပစ်ပြီးတော့ လူတွေလည်း ချသွားတယ်။ အင်အားများတယ် ၁၀၀ ကျော်လောက်ရှိတယ်၊ ကန့်ဒေါင့်ဘက်ကနေလည်း ကားတွေနဲ့ စစ်ကူလာတယ်၊ အခုလည်း ရွာထဲကိုဝင်ပြီး အိမ်တွေကို မီးရှို့နေတယ်။ ရွာထဲမှာ လူတစ်ချို့တစ်ဝက်လောက်တော့ ကျန်သေးတယ်၊ ကျန်တဲ့လူတွေက ထွက်ပြေးသွားပြီ” ဟု ဦးနှောက်ရွာသား တစ်ဦးကပြောသည်။
အဆိုပါ တိုက်ခိုက်မှုသည် PPDF ခေါင်းဆောင် ဗိုလ်နဂါးအား ဖမ်းဆီးရန် ကြိုးပမ်းခဲ့ခြင်း ဖြစ်ကြောင်း ဒေသခံများက ပြောသည်။ သို့သော် ဗိုလ်နဂါးမှာ ထွက်ပြေး လွတ်မြောက်သွားကြောင်း သိရသည်။
စစ်တပ်က ရဟတ်ယာဉ်များဖြင့် လာရောက်တိုက်ခိုက်၍ ဦးနှောက်ရွာ အပါအဝင် ရွာလေးရွာမှ ရွာသား ထောင်ကျော် ထွက်ပြေးတိမ်းရှောင် နေရသည်။
ဦးနှောက်ရွာသည် အိမ်ခြေ ၃၀၀ ခန့်နှင့် လူဦးရေ ၁၀၀၀ နီးပါးရှိသောရွာ ဖြစ်သည်။
