ထွန်းထွန်းဝင်း
စစ်ကိုင်းတိုင်းဒေသကြီး ကန့်ဘလူခရိုင် နှင့်ကောလင်းခရိုင်ကြားရှိ ဝက်သအင်းကျေးရွာ အရှေ့ဖက်တောင်ကုန်း တွင် အင်အား ၁၂၀ ခန့်ဖြင့်တပ်စွဲထားသည့် အကြမ်းဖက်စစ်ကောင်စီ၏တပ်မ (၇၇) ကို ဒေသခံပြည်သူ့ကာကွယ်ရေး ပူးပေါင်း တပ်ဖွဲ့တို့ တိုက်ခိုက်ခဲ့ရာတွင် စစ်ကောင်စီတပ် ဗိုလ်တစ်ဦးအပါအဝင် ၁၂ ဦးသေဆုံးခဲ့ကြောင်း သိရသည်။
“ကျနော်တို့ကင်းထောက်ကို လှမ်းပစ်တာ။ အဲဒါနဲ့ကျနော်တို့ စစ်ကောင်စီတပ်ကို စောင့်ကြည့်နေကြတယ်။ သူတို့နဲ့ ကိုက် ၂၀၀ ၊ ၃၀၀ ရာမှာ တိုက်ဖို့ ရည်ရွယ်ထားကြတယ်။ အရှေ့က တပ်က ဝက်သက်အင်းကျေးရွာထဲကို ဝင်နေကြပြီး ရွာအပြင်ရဲ့ နှမ်းခင်း နဲ့ ပဲ စိုက်ထားတဲ့လယ်ကွင်းထဲမှာ သူတို့စစ်ကြောင်းရဲ့ အနောက်ဆုံး အပိုင်းပေါ့ အယောက် ၃၀၊ ၄၀ ရှိမယ်။ အဲဒီအပိုင်းကို ကျနော်တို့အဖွဲ့သုံးဖွဲ့ က လက်လုပ်အာပီဂျီ ပေါ့ သူက လက်လုပ် ခဲသီး ၈လုံး ပါတယ်။ နောက် ၃၀ မမ၊ ရှောဒုံး နဲ့ တစ်တောင့်ထိုး နဲ့ တိုက်ခိုက်တာပါ။ စုစုပေါင်း ကိုး ချက်ပစ်ခွင့်ရခဲ့တယ်။ သူတိုဘက်က သုံးပွင်နဲ့ အရာရှိအပါအဝင် ၁၂ဦးသေဆုံးတယ်တယ်။ ၁၅ ဦးဒဏ်ရာရတယ်ဆိုတာကိုပြန်သိရတယ် “ ဟု Kanbalu TIGER Rangers ရဲ့ တာဝန်ရှိသူ ဗိုလ်တိုက်ဂါးက မဇ္ဈိမသတင်းဌာနကိုပြောသည်။
ဒီဇင်ဘာလ ၁၆ ရက်နေ့မွန်းလွဲပိုင်းက ဖြစ်ပွားခဲ့သည့် ကန့်ဘလူမြို့နယ် ဝက်သအင်းကျေးရွာ အနီးတွင် အာဏာသိမ်းစစ်ကောင်စီတပ် ပဲခူးတိုင်းအခြေစိုက် တပ်မ(၇၇) တပ် နှင့် ဒေသခံ Kanbalu TIGER Rangers ၊ ကန့်ဘလူတော်ညီနောက်တပ်ဖွဲ့နှင့် ကျွန်းလှ Underground တပ်ဖွဲ့ဝင် ၃၅ဦးခန့် တို့နှင့် တိုက်ပွဲဖြစ်ပွားခဲ့ကြောင်း Kanbalu TIGER Rangers က ဒီဇင်ဘာလ ၁၉ ရက်နေ့ ညပိုင်းအချိန်က သတင်းထုတ်ပြန်ထားသည်။
တိုက်ပွဲတွင် စစ်ကောင်စီဘက်ကမှာ လက်နက်ကြီးများ ၊ စက်သေနတ်များ အသုံးပြုတိုက်ခိုက်မှုပြုလုပ် ခဲ့ပြီး ဒေသခံပြည်သူ့ကာကွယ်ရေးတပ်ဘက်မှာ ထိခိုက်မှုမရှိခဲ့ကြောင်း သိရသည်။
ယင်းတိုက်ပွဲမဖြစ်ပွားချိန်တွင် ဝက်သက်အင်းကျေးရွာဒေသခံများက နီးစပ်ရာ တောများသို့ ထွက်ပြေးတိမ်းရှောင်မှုများ ပြုလုပ်ခဲ့ပြီး စစ်ကောင်စီတပ်ဖွဲ့ဝင်များက ကျေးရွာအတွင်းရှိ ကြက်၊ဝက်၊ဘဲများကို သတ်ဖြတ်စားသောက်မှုများပြုလုပ်ခဲ့ကြောင်းသိရသည်။
ဆက်လက်ပြီး Kanbalu TIGER Rangersရဲ့ ဗိုလ်တိုက်ဂါးက “ တိုက်ပွဲပြီးတော့ ပြန်ခွာကြာတယ်။ ဒူးတို့ခြေထောက်တို့အသေးစားတော့ထိမိတာရှိတယ်။ သေသွားတဲ့လူတွေကို ကားတစ်စီးလာခေါ်တယ်ဆိုတာ ဒေသခံတွေကပြောကြတယ်။ အဲလူတွေကို ဝက်သက်အင်းကနေ မုံရွာဆေးရုံကိုသယ်သွားကြတာ။ လမ်းမှာသေသတယ်ဆိုတာလည်းသိရတယ်။ ဒေသခံတွေကိုအန္တရယ်ဖြစ်မှာဆိုးလို့ နဲ့ သတင်းအတည်ပြုနေတာကို စောင့်လို့ သတင်းထုတ်ပြန်တာနောက်ကြသွားတာပါ။ သုံးပွင့် နဲ့တစ်ယောက် နဲ့ ကျန်တာက ရိုးရိုးတပ်သားပဲထင်တယ်။ လက်လုပ်နဲ့ပစ်တာ သူတို့နောက်ဆုံးကလူတွေတော်တော်အထိနာသွားကြတာ ။ သုံးပွင့်နဲ့တစ်ယောက်ရဲ့နာမည်နဲ့ကိုယ်ပိုင်နံပတ်တော့မသိသေးပါဘူး “ ဟုထပ်မံဖြေကြားသည်။
Kanbalu TIGER Rangers ရဲ့သတင်းထုတ်ပြန်ချက်တွင် စစ်ကောင်စီရဲ့တပ်မ (၇၇) တပ်ဘက်တံဆိပ် နှင့် သုံးပွင်အမှတ်သားပါ စစ်အကျ်ီနင့် ရိုးရိုးတပ်သားအဝတ်အစားများ၊ ကျည်ဆံများ နှင့် ဗုံးသီးကျည်ဆံများ နှင့်အတူ စစ်ကောင်စီတပ်ဖွဲ့ဝင် ၁၂ ဦးသေဆုံးကြောင်း သတင်းထုတ်ပြန်ထားသော်လည်း မဇ္ဈိမသတင်းဌာနအနေဖြင့် သီးခြားတည်ပြုနိုင်ခြင်းမရှိပါ။
