ဒီဇင်ဘာ ၉
ထားဝယ်ခရိုင်၊ လောင်းလုံးမြို့နယ် တရားရုံး ယမန်နေ့က ဗုံးခွဲ ခံခဲ့ရပြီးနောက် ယနေ့ ဒီဇင်ဘာလ ၉ ရက် နံနက်ပိုင်းတွင် စစ်ကောင်စီက ခြိမ်းခြောက် ပစ်ခတ်မှုများ ပြုလုပ်ခဲ့ကြောင်း ဒေသခံများက ပြောသည်။
တရားရုံးသည် ယမန်နေ့ ဒီဇင်ဘာ ၈ ရက် ည ၇ နာရီခန့်တွင် ဗုံးဖောက်ခွဲခံရခြင်း ဖြစ်ပြီး ယနေ့ နံနက်တွင် စစ်ကောင်စီက အင်အား ၃၀ ခန့် ပါ ကားနှစ်စီးဖြင့် မြို့ထဲ ကင်းလှည့် စစ်ဆေးခြင်း၊ အနီးတစ်ဝိုက် ကျေးရွာများအထိ လိုက်လံစစ်ဆေးခြင်းတို့အပြင် ရွာထဲနှင့် လယ်တောများ အတွင်း ပစ်ခတ်မှုများလည်း လုပ်ဆောင်ခဲ့သည်ဟု ဒေသခံများက ဆိုသည်။
"ညက ဗုံးပေါက်ကွဲတာ အားအတော် ပြင်းထန်တယ်။ အနီးက နေအိမ် အချို့ကိုပါ ဗုံးစ ထိမှန် ခဲ့တယ်"ဟု ယမန်နေ့ညက ဖြစ်စဉ်ကို လောင်းလုံးမြို့ခံ တစ်ဦးက ပြောသည်။
အဆိုပါ တရားရုံးကို အဝေးထိန်းမိုင်းဖြင့် ဖောက်ခွဲသတိပေးခြင်း ဖြစ်ကြောင်း ထားဝယ်ခရိုင် ပြည်သူ့ကာကွယ်ရေး ပူးပေါင်းတပ်က ထုတ်ပြန်ထားသည်။
