ဒီဇင်ဘာ ၇
စစ်ကောင်စီက စစ်မြေပြင် ထောက်ပံရေး လုပ်ငန်းများ လုပ်ဆောင်ရန်အတွက်(ပေါ်တာထမ်းရန်)ဟုဆိုကာ မကွေးတိုင်းဒေသကြီး၊ ကံမမြို့နယ်ရှိ ကျေးရွာအုပ်စုနှင့် ရပ်ကွက်နေပြည်သူများထံက လူတောင်းနေသည့်အတွက် ဒေသခံ လူငယ်များ ရှောင်တိမ်းနေရသည်ဟု ဒေသခံထံမှ သိရသည်။
“ပြီးခဲ့တဲ့ လဝက်လောက်ကနေစပြီး စစ်ခွေးတွေက အုပ်ချုပ်ရေးမှူးကတစ်ဆင့် လူတောင်းနေတာ ကျေးရွာအုပ်စု တစ်စုမှာ အယောက်၂၀ ၊ ရပ်ကွက်ဆို ငါးယောက် အဲ့လိုတောင်းတယ်။ သူတို့ပြောတာက စစ်မြေပြင်ထောက်ပံရေးဆိုပြီး စကားအလှပြောတာ တကယ်က ပေါ်တာဆွဲတာပဲ။ အခုထိတော့ လူမခေါ်သေးဘူး။ ရွာက လူငယ်တွေ အခုရှောင်နေကျတယ်။ မိဘတွေက အရမ်းစိုးရိမ်နေကြတယ်ဗျ ။ ဘယ်အချိန်လာဆွဲမှန်း မသိဆိုပြီးတော့လေ”ဟု လုံခြုံရေးအရ အမည်မဖော်လိုသူ ဒေသခံတစ်ဦးက ပြောသည်။
စစ်ကောင်စီက စစ်မြေပြင်တွင်အသုံးပြုရန် လူတောင်းနေခြင်း ရှိနေသည့်အတွက် ကံမမြို့နယ်ရှိ ပြည်သူများ အနေဖြင့် လုံခြုံရေးဂရုစိုက်ရန် ဒီဇင်ဘာလ ၅ ရက် ရက်စွဲဖြင့် ကံမပြည်သူ့ကာကွယ်ရေးတပ်ဖွဲ့က ထုတ်ပြန်ထားသေးသည်။
စစ်ကောင်စီမှ ကံမမြို့နယ်တွင် ပေါ်တာထမ်းရန် လူတောင်းနေခြင်းကြောင့် ပြည်သူများ လုံခြုံရေးဂရုစိုက်ရန်နှင့် စစ်ကောင်စီလက်အောက်ခံ အုပ်ချုပ်ရေးမှူးများ၊ ရပ်ကျေးစာရေးများ ဒီဇင်ဘာလ ၁၅ ရက် နောက်ဆုံးထားပြီး နုတ်ထွက်ရန် သတိပေးထားပြီး လိုက်နာမှုမရှိပါက ၎င်းတို့၏ အသက်အိုးအိမ်၊ စည်းစိမ်များအား မိမိတို့ ကံမပြည်သူ့ကာကွယ်ရေးတပ်ဖွဲ့မှ တာဝန်ယူမည် မဟုတ်ကြောင်း ထုတ်ပြန်ချက်တွင် ဖော်ပြထားသည်။
