ရတနာပုံကွင်းလယ်ကစားသမား ရဲကိုဦးနှင့်တွေ့ဆုံခြင်း
ရတနာပုံအသင်းဟာ ၂၀၁၆ ဘောလုံးရာသီအတွက် ပြင်ဆင်လေ့ကျင့်ရာမှာ အခြားအသင်းတွေထက် နောက်ကျမှုတွေရှိနေလို့ ပရိသတ်တွေကဝေဖန်နေကြ ပါတယ်။ နိုင်ငံခြားသားကစားသမားတွေ အသင်းကို အချိန်မီလာရောက်မပူးပေါင်းတာ၊ နည်းပြက ပြိုင်ပွဲအလိုတစ်ပတ်လောက်အလိုမှ ပြန်ရောက်လာတွေကြောင့် ပရိသတ်တွေက ဝေဖန်နေတာပါ။ ဒါကြောင့် ရတနာပုံအသင်းအခြေအနေကို သိနိုင်ဖို့အတွက် ကွင်းလယ်ကစားသမား ရဲကိုဦးကို Hyper Sports ကတွေ့ဆုံမေးမြန်းခဲ့ပါတယ်။
မေး - လက်ရှိအသင်းပြင်ဆင်မှုအခြေအနေနဲ့ပတ်သက်ပြီး ပြောပြပေးပါဦး။
ဖြေ - အသင်းမှာ မြန်မာကစားသမားတွေကတော့အားလုံးလေ့ကျင့်နေတာအဆင်ပြေပါတယ်။ ဒါပေမယ့် နိုင်ငံခြားသားတွေမရောက်လာသေးတော့ လေ့ကျင့်မှုလုပ်တဲ့နေရာမှာ နဲနဲတော့လျော့တာပေါ့။ အများကြီးတော့ လုပ်ရဦးမှာပေါ့။
မေး - ပြင်ဆင်မှုနောက်ကျတာကြောင့် အခက်အခဲတွေရော ကြုံရတာမျိုးရှိလား။
ဖြေ - အခက်အခဲကြုံနိုင်တာပေါ့။ ထရိန်နင်ကတော့ မနောက်ကျပါဘူး။ ကြံ့ခိုင်မှုလေ့ကျင့်ခန်းတွေ ဘာတွေလုပ်နေရတာက နည်းပြကြီးချပေးထားတဲ့ပုံစံအတိုင်းလုပ်နေတာပဲ။ ဒါပေမယ့် ခြေစမ်းပွဲကစားဖို့အချိန်မရှိတော့တာက အခက်အခဲဖြစ်နိုင်တယ်။ ခြေစမ်းပွဲများများကစားမှကစားသမားတွေ ခြေကသိရမှာလေ။
မေး - နိုင်ငံခြားသားကစားသမားတွေအသင်းကို အချိန်မီမရောက်လာနိုင်တာက ဘာဖြစ်နိုင်သလဲ။
ဖြေ - သူများအသင်းတွေမှာ နိုင်ငံခြားသားတွေအကုန်ရောက်နေပြီ။ ကျွန်တော်တို့အသင်းမှာမရောက်သေးဘူး။ ဒီတော့ပူးပေါင်းလေ့ကျင့်ချိန်အားနည်းတယ်။ ဒီအတွက် ပြိုင်ပွဲကျရင် ဒုက္ခရောက်နိုင်ပါတယ်။
မေး - လာမယ့်ရာသီအတွက် ရည်မှန်းချက်ကရောဘာဖြစ်မလဲ။
ဖြေ - ကျွန်တော်တို့အသင်းပိုင်ရှင်ကိုယ်တိုင်က ချန်ပီယံဖြစ်ဖို့ရည်မှန်းထားတော့ ကျွန်တော်တို့အားလုံးလဲ ချန်ပီယံရည်မှန်းချက်ပဲရှိပါတယ်။
မေး - လက်ရွေးစင်မှာကစားရတာနဲ့ကလပ်မှာကစားရတာဘာကွာခြားလဲ။
ဖြေ - ကွာခြားပါတယ်။ လက်ရွေးစင်မှာက နိုင်ငံအတွက်ပေးဆပ်ရမယ်ဆိုတဲ့စိတ်နဲ့ ကြိုးစားရသလို ပြည်သူအားလုံးအားပေးနေတာဆိုတော့ ဖိအားရှိပါတယ်။
မေး - ရတနာပုံပရိသတ်တွေကို ဘာများပြောချင်သေးလဲ။
ဖြေ - ရတနာပုံအသင်းကိုအားပေးကြပါ။ ကျွန်တော်တို့လည်း ကြိုးစားနေပါတယ်။ ကစားသမားတွေအားလုံးကလည်း ပရိသတ်နဲ့ ရတနာပုံအသင်းကို ချစ်ပါတယ်။
