နိုဝင်ဘာ ၂၃
မဇ္ဈိမ၊ DVB အပါအဝင် စစ်ကောင်စီက ပိတ်ပင်ထားသည့် မီဒီယာများ၏ ထုတ်လွှင့်မှုများကို ဟိုတယ်များ၊ တည်းခိုခန်းများတွင် ကြည့်ရှုနိုင်မည့် ဝန်ဆောင်မှု မပေးရန် သတိပေးစာတစ်စောင်ကို စစ်ကောင်စီက နိုဝင်ဘာ ၂၂ရက် ရက်စွဲဖြင့် ထုတ်ပြန်ထားသည်။
မဇ္ဈိမ၊ DVB၊ ခေတ်သစ်မီဒီယာ၊ Myanmar Now နှင့် 7 Day သတင်းဌာနတို့၏ ထုတ်လွှင့်ခြင်းများကို ကြည့်ရှုနိုင်ရန် ဝန်ဆောင်မှုပေးပါက တည်ဆဲဥပဒေများအရ အရေးယူခံရမည်ဖြစ်ကြောင်း၊ စစ်ကောင်စီလက်အောက်ခံ ဟိုတယ်နှင့် ခရီးသွားလာရေးဝန်ကြီးဌာနက မြန်မာနိုင်ငံ ခရီးသွားလုပ်ငန်း အဖွဲ့ချုပ်၊ မြန်မာနိုင်ငံ ဟိုတယ်ဆိုင်ရာ လုပ်ငန်းရှင်များအသင်း၊ မြန်မာနိုင်ငံ ခရီးသွားလုပ်ငန်းရှင်များအသင်း၊ မြန်မာနိုင်ငံ နိုင်ငံခြား ရင်းနှီးမြှုပ်နှံမှုဆိုင်ရာ ဟိုတယ်လုပ်ငန်းရှင်များ အသင်းတို့ကို လိပ်မူကာ ညွှန်ကြားစာ ပေးပို့ထားသည်။
စစ်ကောင်စီက အဆိုပါသတင်းဌာနများကို မတ်လ ၃ ရက်နေ့မှ စတင်ကာ နာမည်ပျက်စာရင်း (Blacklist )ထဲ ထည့်ထားပြီး ရုပ်သံထုတ်လွှင့်ခြင်းနှင့် သတင်းရေးသားခြင်းများကိုလည်း ပိတ်ပင်ထားသော်လည်း အချို့ဟိုတယ်၊ တည်းခိုရပ်သာများတွင် အထက်ပါ သတင်းဌာနများ၏ ရုပ်သံလိုင်းများအား ဖမ်းယူကြည့်ရှုနိုင်သည့် ဝန်ဆောင်မှုများ ဆောင်ရွက်ပေးနေကြောင်း စိစစ်တွေ့ရှိသည့်အတွက် ထုတ်ပြန်ခြင်းဖြစ်ကြောင်း ညွှန်ကြားစာတွင် ပါရှိသည်။
စစ်ကောင်စီ၏ ညွှန်ကြားချက်ကို မြန်မာနိုင်ငံဟိုတယ်ဆိုင်ရာ လုပ်ငန်းရှင်များ အသင်းကလည်း ၎င်း၏ အသင်းဝင်ဟိုတယ်များသို့ တစ်ဆင့် ညွှန်ကြားထားသည်။