ထိုင်ဝမ်အပါအဝင် အပြည်ပြည်ဆိုင်ရာ စည်းမျဉ်းအခြေပြုစနစ်ကို အဟန့်အတားဖြစ်စေသည့် တရုတ်၏အရေးယူဆောင်ရွက်မှုများအပေါ် စိုးရိမ်ကြောင်း အမေရိကန်အစိုးရက အောက်တိုဘာ ၃၁ ရက်တွင် ထုတ်ဖော် ပြောကြားလိုက်သည်။
အမေရိကန်နိုင်ငံခြားရေးဝန်ကြီး အန်တိုနီဘလစ်ကင်က တရုတ်နိုင်ငံခြားရေးဝန်ကြီး ဝမ်ယိနှင့် တွေ့ဆုံ ချိန်တွင် ယခုကဲ့သို့ ပြောဆိုခဲ့ခြင်းဖြစ်ကြောင်း အမေရိကန်အစိုးရ၏ ထုတ်ပြန်ချက်တွင် ဖော်ပြထားသည်။
ကမ္ဘာ့အကြီးဆုံးစီးပွားရေးအင်အားကြီးနှစ်နိုင်ငံအကြား ယှဉ်ပြိုင်မှုကို တာဝန်သိသိ ဆောင်ရွက်နိုင်ရန် အပြန်အလှန် ဆက်သွယ်မှုများကို ဆက်လက်ထားရှိရန် အရေးကြီးကြောင်းလည်း ဘလစ်ကန်က အလေးထားပြောဆိုခဲ့သည်ဟု ထုတ်ပြန်ချက်၌ဖော်ပြထားသည်။
“လူ့အခွင့်အရေး၊ ရှင်ကျန်း၊ တိဗက်၊ ဟောင်ကောင်၊ အရှေ့နှင့်တောင်တရုတ်ပင်လယ်များနှင့် ထိုင်ဝမ်အပါအဝင် မဟာမိတ်များနှင့်ကျွန်ုပ်တို့၏ တန်ဖိုးများနှင့်အကျိုးစီးပွားများကို ဆန့်ကျင်သော ၊ အပြည်ပြည်ဆိုင်ရာ စည်းမျဉ်းအခြေပြုစနစ်များကို အနှောင့်အယှက်ဖြစ်စေသော တရုတ်နိုင်ငံ၏လုပ်ရပ်များနှင့်ပတ်သက်၍လည်း ဘလစ်ကန်က စိုးရိမ်ပူပန်ခဲ့သည်” ဟု အမေရိကန်နိုင်ငံခြားရေးဝန်ကြီးဌာနထုတ်ပြန်ချက်တွင် ရေးသားထားသည်။
အိမ်နီးချင်းရေပိုင်နက်အပေါ် တရုတ်၏ရန်လိုမှုများ၊ လူ့အခွင့်အရေးချိုးဖောက်မှု စွပ်စွဲချက်များနှင့် ထိုင်ဝမ်အပေါ် ဖိအားများလာခြင်းတို့ကြောင့် ရင်ဆိုင်မှုမျိုးစုံတွင် တင်းမာမှုများမြင့်တက်လာစဉ် ဆွေးနွေးပွဲပြုလုပ်လာခြင်းဖြစ်သည်။
ဘလစ်ကန်နှင့်ဝမ်ယိတို့တွေ့ဆုံမှုသည် ယခုနှစ်နှောင်းပိုင်း၌ အမေရိကန်သမ္မတဂျိုးဘိုင်ဒင်နှင့် တရုတ်သမ္မတရှီကျင့်ဖျင်တို့အကြား စီစဉ်ထားသည့် အွန်လိုင်းတွေ့ဆုံမှုအတွက် ကနဦး ပြင်ဆင်ခြင်း ဖြစ်သည်။
ဘလစ်ကန်သည် G 20 ထိပ်သီးဆွေးနွေးပွဲအတွက် အီတလီသို့လည်းကောင်း၊ ကုလသမဂ္ဂရာသီဥတု ဆိုင်ရာ ထိပ်သီးဆွေးနွေးပွဲအတွက် ဗြိတိန်သို့လည်းကောင်း ဘိုင်ဒင်ခရီးစဉ်နှင့် အတူ လိုက်ပါလျက်ရှိသည်။
မကြာသေးမီကာလများအတွင်း တရုတ်သည် လေကြောင်းကာကွယ်ရေးသတ်မှတ်ဇုန်သို့ စစ်လေယာဉ် အမြောက်အမြားစေလွှတ်ခြင်းဖြင့် ထိုင်ဝမ်အပေါ် ဖိအားပိုမိုပေးလာခဲ့သည်။
