အောက်တိုဘာ ၂၁
စစ်အာဏာရှင်လက်အောက်ကျရောက်နေသည့် မြန်မာနိုင်ငံတွင် ဖြစ်ပေါ်နေသည့် အကျပ်အတည်းကို ကိုင်တွယ်ဖြေရှင်းရန် စဉ်းစားဆုံးဖြတ်ရန် အလှည့်အပြောင်းအချိန်ကာလတစ်ခု ရောက်နေပြီဟု အမေရိကန် အဆင့်မြင့်အရာရှိတစ်ဦးက ပြောသည်။
စစ်အာဏာသိမ်းအုပ်စု၏ ပြုမူလုပ်ဆောင်ပုံများ ပြောင်းလဲစေရေးအတွက် ဖိအားပေးရန် နောက်ထပ် နိုင်ငံရေးနှင့် စီးပွားရေးဆိုင်ရာ လုပ်ဆောင်မှုများ လုပ်ရန်လည်း အမေရိကန်အနေဖြင့် ချိန်ဆနေကြောင်း ၎င်းက အောက်တိုဘာ ၂၁ ရက်တွင် ပြောကြားလိုက်သည်။
“မြန်မာနိုင်ငံတွင်းက အခြေအနေက ပိုပိုဆိုးလာနေပါတယ်၊ လူသားချင်းစာနာမှု ရှုထောင့်ကပဲ ကြည့်ကြည့်၊ လုံခြုံရေး ရှုထောင့်ကပဲ ကြည့်ကြည့်၊ စီးပွားရေးအရပဲဖြစ်ဖြစ် အခြေအနေတွေက ဆိုးလာနေပါတယ်၊ နိုင်ငံရေးနဲ့ပတ်သက်လို့လည်း တိုးတက်မှု ကင်းမဲ့နေပါတယ်” ဟု အမေရိကန် နိုင်ငံခြားရေးဝန်ကြီးဌာန အတိုင်ပင်ခံ ဒါရက်ခ် ချောလက်တ်က The Associated Press သတင်းဌာနနှင့် အင်တာဗျူးတစ်ခုတွင် ပြောသည်။
ဖေဖေါ်ဝါရီလက ဒေါ်အောင်ဆန်းစုကြည်၏ ရွေးကောက်ခံအစိုးရကို ဖြုတ်ချပြီး စစ်တပ် အာဏာသိမ်းမှုအပေါ် အကျယ်လောင်ဆုံး ဆန့်ကျင်သည့် နိုင်ငံများထဲတွင် အမေရိကန်လည်း ပါဝင်သည်။ ဒေါ်အောင်ဆန်းစုကြည်၊ သမ္မတ ဦးဝင်းမြင့် တို့အပါအဝင် အမျိုးသားဒီမိုကရေစီအဖွဲ့ချုပ်ပါတီ၏ အဆင့််မြင့်အဖွဲ့ဝင်များ ဖမ်းဆီးထိန်းသိမ်းခံထားရသည်။
ဖေဖေါ်ဝါရီ ၁ ရက် အာဏာသိမ်းပြီးနောက် စစ်အုပ်စု၏ လုံခြုံရေးတပ်ဖွဲ့ဝင်များ၏ လက်ချက်ကြောင့် အရပ်သား ၁,၂၀၀ နီးပါး သေဆုံးပြီး အခြားလူပေါင်း ၉,၀၄၃ ဦး ဖမ်းဆီးခံထားခဲ့ရကြောင်း နိုင်ငံရေးအကျဥ်းသားများ ကူညီစောင့်ရှောက်ရေးအသင်း၏ ထုတ်ပြန်ချက်များအရ သိရသည်။ စစ်အာဏာသိမ်းအုပ်စုသည် လက်ရှိအချိန်တွင် နိုင်ငံ၏ ဒေသအများအပြားတွင် ယင်းအပေါ် တိုးပွားလာနေသည့် ခုခံတော်လှန်မှုများနှင့် ရင်ဆိုင်နေရသည်။
အမေရိကန်နိုင်ငံခြားရေးဝန်ကြီး၏ အကြံပေးတစ်ဦးဖြစ်သည့် ချောလက်တ်သည် အွန်လိုင်း အင်တာဗျူးတစ်ခုကို ဖြေကြားခဲ့ခြင်းဖြစ်သည်။ ၎င်းဦးဆောင်သည့် အမေရိကန် ကိုယ်စားလှယ်အဖွဲ့သည် မြန်မာ့အရေး လွှမ်းမိုးဖွယ်ရှိသည့် အရှေ့တောင်အာရှနိုင်ငံများအသင်း၏ နှစ်စဥ်ကျင်းပနေကျ ထိပ်သီးအစည်းအဝေးတစ်ခုမတိုင်မီ ထိုင်းနှင့် စင်ကာပူကို သွားရောက်ခဲ့ပြီးနောက် အင်ဒိုနီးရှားတွင် ရောက်ရှိနေခဲ့ကြသည်။
“မဝေးတဲ့ ရှေ့ကာလတစ်ခုမှာ အဆိုးဆုံး အခြေအနေ မဖြစ်အောင် ကူညီတားဆီးနိုင်မယ့် နည်းလမ်းတွေ ကျွန်တော်တို့မှာ ရှိတယ်လို့ ထင်ပါတယ်၊ ဒါပေမယ့် ကျွန်တော် ပြောခဲ့သလိုပဲ ကျွန်တော်တို့ဟာ လုပ်ငန်းစဥ်အတွင်း အလှည့်အပြောင်း ကာလတစ်ခုမှာ ရောက်နေပါတယ်” ဟု ချောလက်တ်က ပြောသည်။ “မြန်မာစစ်အုပ်စု သူတို့ရဲ့ ပြုမူလုပ်ဆောင်ပုံတွေ ပြောင်းလဲစေအောင် တွန်းအားပေးမှုတွေ သူတို့အပေါ် ပေးပြီး သူတို့ကို ဖိအားပေးဖို့အတွက် အမေရိကန်နဲ့ အခြားအစိုးရတွေ ဆွဲယူလုပ်ဆောင်နိုင်တဲ့ နိုင်ငံရေးနဲ့ စီးပွားရေး ဖိအားပေးမှု နည်းလမ်းတွေ ရှိနေပါတယ်” ဟု ၎င်းက ပြောသည်။
“အမေရိကန်အနေနဲ့ ကျွန်တော်တို့ လုပ်ဖို့ ကြိုးစားနေတာရဲ့ တစိတ်တပိုင်းက ပါဝင်ဆွေးနွေးဖို့ ဖြစ်ပြီး သတ်မှတ်ချက်တွေ ပြောဖို့ မဟုတ်ပါဘူး၊ ဒါပေမယ့် ကျွန်တော်တို့ရဲ့ အကောင်းဆုံး အမြင်ရှုထောင့်တွေကို ကမ်းလှမ်းသွားမှာ ဖြစ်သလို ဒေသတွင်းက မတူညီတဲ့ ပါတနာတွေဆီက အမြင်တွေ၊ ပြောကြားချက်တွေကို နားထောင်သွားမှာ ဖြစ်ပါတယ်၊ အဓိကကျတဲ့ အာဆီယံအဖွဲ့ဝင် သုံးနိုင်ငံနဲ့ ဆွေးနွေးမှုတွေမှာ ရှေ့ကို ဘယ်လိုအကောင်းဆုံး ဆက်သွားမလဲ ဆိုတာနဲ့ပတ်သက်လို့ သူတို့ရဲ့ အိုင်ဒီယာတွေရဲ့ သဘောတရားတစ်ခုကို အမေရိကန် ကိုယ်စားလှယ် အဖွဲ့အနေနဲ့ ရရှိနိုင်ခဲ့ပါတယ်” ၎င်းက ပြောသွားခဲ့သည်။
