စက်တင်ဘာ ၈
မြောင်မြို့နယ်အတွင်း သုံးနာရီခန့်ကြာတိုက်ပွဲတွင် စစ်ကောင်စီတပ်သားသုံးဦးသေဆုံးပြီး စစ်ကားတစ်စီးပျက်စီးသွားကြောင်း ကာကွယ်ရေးတပ်ဘက်ကပြောသည်။
စစ်ကိုင်းတိုင်းဒေသကြီး၊ မြောင်မြို့နယ်၊ မြစ်ဆုံရွာအနီးတွင် ပြည်သူ့ကာကွယ်ရေးတပ်ဖွဲ့များနှင့် စစ်ကောင်စီတပ်တို့ နံနက် ၉ နာရီမှစတင်ကာ ပစ်ခတ်မှုဖြစ်ပြီး မွန်းတည့်ချိန်အထိကြာမြင့်ခဲ့သည်။
"စစ်ကောင်စီဘက်က လက်နက်ကြီးတွေနဲ့အဆက်မပြတ်ထုလို့ ကျွန်တော်တို့တပ်ဆုတ်လိုက်ရတဲ့ အနေအထားပါ။ ကျွန်တော်တို့ဘက်က အကျအဆုံးမရှိပေမဲ့ သူတို့ဘက်က သုံး ယောက်ကျသွားတယ်။ စစ်ကားတစ်စီးကိုလဲ ဖောက်ခွဲလိုက်တာ ပျက်စီးသွားပါတယ်" ဟု ကာကွယ်ရေးတပ်အဖွဲ့ဝင်တစ်ဦးက ပြောသည်။
ယမန်နေ့က မြောင်မြို့နယ်၊ ပေါက်ချောင်းရွာ ရှိ PDF စခန်းကို စစ်ကောင်စီတပ်ဖွဲ့တပ်ကဝင်စီးခဲ့သေးသည်။ PDF အဖွဲ့ အထိအခိုက်မရှိ ဆုတ်ခွာနိုင်ခဲ့သည်ဟု သိရသည်။
