ဇွန် ၁၆
အကြမ်းဖက် စစ်ကောင်စီတပ်သားတွေမီးတင်ရှို့ခဲ့လို့ ထွက်ပြေးနေရတဲ့ ပေါက်မြို့နယ် ကင်းမရွာက ရွာသူ/ရွာသားတွေအရေးပေါ် အကူအညီလိုအပ်နေ တယ်လို့ ဒေသခံတစ်ဦးက မဇ္စျိမကိုပြောပါတယ်။
"ကျွန်တော်စောင့်ရှောက်နေတဲ့ဘက်မှဆိုရင် လူဦးရေ ၁၅၀ လောက်တော့ရှိပြီ ၊ လိုက်ပြီးစာရင်းကောက်နေတုန်းပါ၊ ချက်ချင်းပြေးလာကြရတာဆိုတော့ စားစရာလဲအများကြီးမပါဘူး၊ ရေရောပဲ၊ နောက်အမိုးအကာလုပ်ဖို့ တွေလဲယူမလာရတော့ မိုးရွာရင်တော့ ခက်ပြီ" လို့ ရွာသားတွေနဲ့ အတူပြေးနေတဲ့ သူကပြောပြပါတယ်။
ထွက်ပြေးတိမ်းရှောင်သူတွေထဲမှာ နာမကျန်းဖြစ်နေတဲ့ သက်ကြီးရွယ်အိုတွေနဲ့ ကလေးငယ်တွေပါဝင်တဲ့အတွက် ဆေးဝါးလိုအပ်မှုတွေရှိနေတယ်လို့သိရပါတယ်။ လက်ရှိအချိန်ထိ အချို့မိသားစုတွေဟာ တစ်ကွဲတစ်ပြားဖြစ်နေသေးကြောင်း အဲ့ဒီဒေသခံကဆိုပါတယ်။
မနေ့က ကင်းမရွာ ပစ်ခတ်မှုဖြစ်စဉ်အတွင်းမှာ ကျေးရွာဘုန်းကြီးကျောင်းဝန်းထဲ ပုန်းအောင်းနေသူ ရွာသားလေးဦး ကို စစ်ကောင်စီတပ်သားတွေပစ်ခတ်ခဲ့လို့ တစ်ဦးပေါင်ကိုထိမှန်ခဲ့တယ်လို့ သိရပါတယ်။ထွက်ပြေးနေတဲ့အထဲ အဆိုပါ ဒဏ်ရာရသူပါ ပါဝင်ပြီး ဒဏ်ရာကမစိုးရိမ်ရဘူးလို့သိရပါတယ်။
ဒီကနေ့မနက်ပိုင်းမှာတော့ မီးရှို့ခံရလို့ အိမ်အနည်းသာ ကျန်နေတဲ့ ကင်းမရွာဟာ ပြာပုံအဖြစ်ကျန်ရစ်နေပါတယ်။ မီးလောင်မှုအတွင်း နာမကျန်းဖြစ်နေသူ အဘိုးအဖွား လေးဦးအပါအဝင် ကျေးရွာမှာ မွေးမြူထားတဲ့ တိရိစ္ဆာန်အများစုလဲ မီးလောင်သေဆုံးခဲ့ရပါတယ်။
