မေ ၁၇

ထိုင်းနိုင်ငံ၏ စီးပွားရေးသည် ပထမသုံးလပတ်ကာလအတွင်း ကျုံ့သွားခဲ့ကြောင်း  မေလ ၁၇ ရက်တွင် ထုတ်ပြန်သည့် တရား၀င်ဒေတာအချက်အလက်များက ပြသနေသည်။ အဓိကကျသည့် ခရီးသွားလုပ်ငန်းကဏ္ဍကို အထိနာစေခဲ့သည့် ကိုရိုနာဗိုင်းရပ်စ်ဆိုင်ရာ ပိတ်ပင်ကန့်သတ်မှုများက ထိုင်း စီးပွားရေးအပေါ် ရိုက်ခတ်ထားခဲ့သည်။

ထိုင်းနိုင်ငံ၏ စီးပွားရေးသည် ယမန်နှစ်က ၆ ဒသမ ၁ ရာခိုင်နှုန်း ကျုံ့ခဲ့ပြီး ယင်းသည် ၁၉၉၇ အာရှဘဏ္ဍာရေးအကျပ်အတည်းနောက်ပိုင်း အဆိုး၀ါးဆုံးသော စီးပွားရေး ကျုံ့မှုဖြစ်ခဲ့သည်။

ပထမသုံးလတွင် နိုင်ငံ၏ ဂျီဒီပီသည် ၂ ဒသမ ၆ ရာခိုင်နှုန်း ကျုံ့ခဲ့ကြောင်း ထိုင်း အမျိုးသား စီးပွားရေးနှင့် လူမှု ဖွံ့ဖြိုးတိုးတက်ရေး ကောင်စီရုံး (NESDC) က ပြောသည်။

ထို့ပြင် NESDC သည် ၂၀၂၁ ခုနှစ် နိုင်ငံ စီးပွားရေး ပြန်လည် နာလန်ထူမှုအတွက် အလားအလာခန့်မှန်းချက်ကိုလည်း ယခင်ခန့်မှန်းချက်ဖြစ်သည့် ၂ ဒသမ ၅ နှင့် ၃ ဒသမ ၅ ရာခိုင်နှုန်းကနေ ၁ ဒသမ ၅ နှင့် ၂ ဒသမ ၅ ရာခိုင်နှုန်းကို လျှော့ချခန့်မှန်းခဲ့သည်။

တင်းကျပ်သည့် ခရီးသွားလာမှု ကန့်သတ်ချက်များကြောင့် နိုင်ငံခြားဧည့်သည် ပုံမှန်၀င်ရောက်မှုကို လျော့ကျစေခြင်းနှင့်အတူ ထိုင်းနိုင်ငံသည် ယခုအခါ ကိုရိုနာဗိုင်းရပ်စ် တတိယလှိုင်းတစ်ခုနှင့် ရင်ဆိုင်ထားရသည့်အတွက် စီးပွားရေး လည်ပတ်မှုများအပေါ် ကန့်သတ်ပိတ်ပင်မှုအသစ်များ ချမှတ်ထားရသည်။

ထိုင်းနိုင်ငံတွင် ယခုအခါ ကိုရိုနာဗိုင်းရပ်စ် ကူးစက်ခံရသူစုစုပေါင်း ၁၁၁,၀၀၀ ကျော်အထိ ရှိနေကြောင်း သိရသည်။