နိုဝင်ဘာ ၂၀ ၊ ၂၀၂၀

ဖိုင်ဇာနှင့် ဘိုင်အိုတက်သည် သူ့တို့၏ COVID-19 ကာကွယ်ဆေးသည် ၉၅ရာခိုင်နှုန်း ထိရောက်ခြင်းကို ပြသကာ ဆေးအောင်မြင်စွာ စမ်းသပ်နိုင်ခဲ့ပြီဖြစ်ကြောင်း ဗုဒ္ဓဟူးနေ့က ကြေငြာခဲ့သည်။

သူတို့သည် အရေးပေါ်အသုံးပြုရန်အတွက် အစားအသောက်နှင့် ဆေးဝါးကွပ်ကဲရေး ဦးစီးဌာနသို့ ရက်ပိုင်းအတွင်း တင်ပြသွားမည်ဖြစ်ပြီး ကမ္ဘာတစ်ဝှမ်းရှိ တရားဝင်အဖွဲ့များဆီသို့လည်း တင်ပြသွားမည်ဖြစ်ကြောင်း ထိုကုမ္ပဏီများက ဆိုသည်။

ကာကွယ်ဆေးသည် ကူးစက်မှုကို ၉၀ ရာခိုင်နှုန်လျှော့ချနိုင်ကြောင်း အစောပိုင်း လေ့လာတွေ့ရှိမှုများ ကြေညာမှုအပြီး တစ်ပတ်အကြာ၊ Modernaကုမ္ပဏီ မှ အလားတူ ကာကွယ်ဆေးက ၉၄.၅ ရာခိုင်နှုန်း လျှော့ချနိုင်ကြောင်း ပြောကြားပြီးရက်အနည်းငယ်အကြာတွင် ထိုရလဒ်သည် ထွက်ပေါ်လာခြင်းဖြစ်သည်။ ထိုရလဒ်များအရ လာမည့်နှစ်အတွင်း ကာကွယ်ဆေးများ ကျယ်ကျယ်ပြန့်ပြန့်ရရှိနိုင်မည်ဟု မျှော်လင့်ရပြီး အခြားသော ကာကွယ်ဆေးများသည်လည်း ထိရောက်မည်ဟု သက်သေပြနေသည်။

အင်္ဂါနေ့ကပြုလုပ်ခဲ့သော STAT ထိပ်သည်းဆွေးနွေးပွဲတွင် ဖိုင်ဇာဥက္ကဋ္ဌ အဲလ်ဘတ်ဘာလာက ကာကွယ်ဆေး ထိရောက်မှုအကြောင်း အစောပိုင်းတွင် အချက်အလက်များ တွေ့ရခြင်းသည် သူ၏ဘဝတွင် အကောင်းအဆုံးအတွေ့အကြုံဖြစ်ကြောင်း ပြောခဲ့သည်။ “၉၀ရာခိုင်နှုန်းနဲ့အထက် ထိရောက်တယ်လို့ ကြားလိုက်တုန်းက အိပ်မက်မက်နေသလိုပဲ” ဟု သူက ဆိုခဲ့သည်။

 ဖိုင်ဇာက လေ့လာစမ်းသပ်ခဲ့သော ကိုဗစ်-၁၉ ဖြစ်ပွားမှု ၁၇၀ အနက် ၁၆၂ ခုအား အာနိသင်လုံးဝမရှိသောဆေးဝါး(placebo) ထိုးပေးခဲ့ပြီး အဖွဲ့ထဲမှ ၈ဦးကိုသာ ကာကွယ်ဆေး ၂ကြိမ် ထိုးပေးခဲ့သည်။ ပြင်းထန်သော ကိုဗစ်-၁၉ ဖြစ်ပွားမှု ၁၀ ခုတွင် ကိုးဦးသည် placeboထိုးခဲ့သည့် အဖွဲ့မှဖြစ်ပြီး ကာကွယ်ဆေးသည် မပြင်းထန်သည့်အနေအထားမှစ၍ လူနာအား သေစေနိုင်သည့် သို့မဟုတ် ဆေးရုံတက်ရလောက်သည်ထိ ပြင်းထန်သော ရောဂါကိုပါ ကာကွယ်နိုင်ကြောင်း ရှာဖွေတွေ့ရှိမှုပင်ဖြစ်သည်။

 ပြီးပြည့်စုံခြင်းမရှိသေးသည့် Moderna၏ အစောပိုင်း စမ်းသပ်မှုအရ placebo ထိုးသော အဖွဲ့မှ ပြင်းထန်သော ကူးစက်မှု ၁၁ ခုခန့် ရှိခဲ့သည်။

ကာကွယ်ဆေးသည် အလွန်လျှင်မြန်စွာ စမ်းသပ်ဖော်ထုတ်ခဲ့ရသည် ဖြစ်သောကြောင့် ထိရောက်မှုသည် မည်မျှရှည်ကြာမည်ကို သေချာစွာ မသိရပါ။

အမျိုးသား ဓာတ်မတည့်ခြင်းနှင့် ကူးစက်ရောဂါဆိုင်ရာ အင်စတီကျု ဒါရိုက်တာ အန်တိုနီဖော်ဆီက “တစ်ဆင့်ချင်းစီပဲ လုပ်ဆောင်သွားမယ်။ အခုတော့ ထိရောက်မှု ၉၄.၅ ရာခိုင်နှုန်းရှိတာကို လက်ခံထားမယ်။ ထိရောက်မှု ဘယ်လောက်ခံမလဲဆိုတာကိုတော့ နောက်မှ စိတ်ပူကြတာပေါ့”ဟု ယခုအပတ် Moderna ၏ ကြားဖြတ် ဆန်းစစ်မှုအတွက် အင်္ဂါနေ့က ပြုလုပ်ခဲ့သော STAT ထိပ်သီးဆွေးနွေးပွဲတွင် ပြောကြားခဲ့သည်။

 စေတနာ့ဝန်ထမ်း ၄၃,၆၆၁ ပါဝင်ခဲ့သော လေ့လာမှုအရ ကာကွယ်ဆေးနှင့် ပတ်သတ်၍ လုံခြုံရေးဆိုင်ရာ စိုးရိမ်ဖွယ်များ မရှိကြောင်း ဖိုင်ဇာက ဆိုခဲ့သည်။ ယေဘုယျဖြစ်ပွားနိုင်သော ဘေးထွက်ဆိုးကျိုးများအတွက် လေ့လာမှုမှ လူနာ အယောက်၈၀၀၀ ခန့်ကို စောင့်ကြည့်ခဲ့သည်။ လူ ဦး ရေ၏ ၂ ရာခိုင်နှုန်းကျော်တွင် ဖြစ်ပွားနိုင်သော တစ်ခုတည်းသောပြင်းထန်သော ဘေးထွက်ဆိုးကျိုးများမှာ ဒုတိယဆေးထိုးပြီးနောက် လူနာ၏ ၃.၇ရာခိုင်နှုန်းတွင် ဖြစ်ပွားသော ပင်ပန်းနွမ်းနယ်ခြင်းနှင့် ၂ ရာခိုင်နှုန်းတွင်ဖြစ်ပွားသော ခေါင်းကိုက်ခြင်းဖြစ်သည်။

အသက်အရွယ်ကြီးသူများသည် လူငယ်များထက် ဘေးထွက်ဆိုးကျိုး နည်းပါးခဲ့သည်။ လေ့လာမှုတွင် ပါဝင်သူ အယောက် ၁၉,၀၀၀ ခန့်အား ဒုတိယအကြိမ် ကာကွယ်ဆေးထိုးပြီး အနည်းဆုံး နှစ်လကြာ လေ့လာခဲ့သည်။
 
ဖိုင်ဇာ၏ နောက်ဆုံးရလဒ်များသည် အလားတူ နည်းပညာကို အသုံးပြုကာ လက်တွေ့စမ်းသပ်မှုမှ စေတနာ့ဝန်ထမ်း ၃၀,၀၀၀ မှ ကြားဖြတ်ရလဒ်အနေဖြင့် ကိုဗစ်-၁၉ ကူးစက်မှုကို ၉၄.၅ ရာခိုင်နှုန်း လျှော့ချနိုင်ခဲ့သည့် Moderna၏ ကိုဗစ်-၁၉ ကာကွယ်ဆေး အစီရင်ခံစာ အတိုင်းပင်ဖြစ်သည်။ Moderna သည် ကိုဗစ်-၁၉ လက္ခဏာပြလူနာ ၉၅ ဦးအား လေ့လာခဲ့ပြီး ကူးစက်ခံရသူများမှ ငါးဦးကိုသာ ကုမ္ပဏီက ကာကွယ်ဆေးပေးခဲ့သည်။
 
Moderna ၏ လေ့လာချက်အရ ပြင်းထန်သော ကိုဗစ်-၁၉ လူနာ ၁၁ဦးရှိခဲ့ပြီး အားလုံးသည် placebo ထိုးခဲ့သော အဖွဲ့မှဖြစ်ကြသည်။ Moderna က လေ့လာစမ်းသပ်တဲ့အချိန်အတွင်းတွင် လုံခြုံရေးဆိုင်ရာ စိုးရိမ်ဖွယ်များမရှိခဲ့ကြောင်း ပြောခဲ့သည်။ လူနာ ၂ ရာခိုင်နှုန်းကျော်ခန့်သည် ပင်ပန်းနွမ်းနယ်ခြင်း၊ ကြွက်သားများနာကျင်ခြင်း၊ ခေါင်းကိုက်ခြင်းနှင့် နာကျင်ခြင်း စသည့် ပြင်းထန်သော လက္ခဏာများ ခံစားခဲ့ရသည်။ ထိုဖြစ်ပွားမှုများသည် ခဏသာဖြစ်ကြောင်း ကုမ္ပဏီက သတင်းစာရှင်းလင်းပွဲတွင် ပြောကြားခဲ့သည်။

 ဖိုင်ဇာကဲ့သို့ပင် Moderna သည် လည်း အရေးပေါ်အသုံးချနိုင်ခွင့်ရရှိရန် လုံခြုံရေးအချက်အလက်များကို ထပ်မံစုဆောင်းပြီးချိန်တွင် FDA သို့ လာမည့်အပတ်များအတွင်း တင်ပြရန် စီစဉ်ထားသည်။ ၎င်းသည် ကိုဗစ်-၁၉ ကူးစက်ခံရနိုင်ချေမြင့်မားသော လူများထံသို့ ကာကွယ်ဆေးဖြန့်ချိစေနိုင်လိမ့်မည်။

 ဖိုင်ဇာနှင့် Moderna တို့သည် သူတို့၏ ကာကွယ်ဆေးများတွင် messenger RNA သို့မဟုတ် Mrna ကို အသုံးပြုကြသည်။ ဒြပ် mRNA ၏ အမျှင်တစ်ခုချင်းစီသည် ကိုဗစ်-၁၉ကို  ဖြစ်ပေါ်စေသော ဗိုင်းရပ်စ် SARS-CoV-2 ၏ မျက်နှာပြင်တွင် တွေ့ရသောပရိုတိန်းတစ်မျိုးကို ဖြေရှင်းရန် ဖန်တီးထားသည်။ ထို mRNA အမျှင်သည် ခန္ဓာကိုယ် ဆဲလ်များအတွင်း ဝင်ရောက်ကာ ထိုပရိုတိန်းအားထုတ်လုပ်ရန် တည်ဆောက်ထားသည်။ အကယ်၍ ထိုလူနာသည် ဗိုင်းရပ်စ်ကူးစက်ခံရပါက ခုခံအားစနစ်သည် ၎င်းအား ပြင်ပ ကျူးကျော်သူအဖြစ် သတ်မှတ်ကာ ကိုဗစ်-၁၉ ကို ကာကွယ်နိုင်သည့် ပဋိဇီဝပစ္စည်းများထုတ်လုပ်ပေးမည်ဖြစ်သည်။

 ကာကွယ်ဆေးနှစ်မျိုးစလုံးအတွက် အထောက်အပံ့များသည် လပေါင်းများစွာ အကန့်အသတ်ဖြင့်သာ ရှိနေနိုင်သည်။ Pfizer က နှစ်အကုန်တွင် ဆေးလုံးပေါင်း သန်း၅၀ခန့် ထုတ်လုပ်နိုင်မည်ဖြစ်ကြောင်း ပြောသည်။ ဆေးနှစ်လုံးထိုးရန်လိုအပ်သော Moderna သည်လည်း ထိုအချိန်အတွင်း ဆေးလုံးပေါင်း သန်း ၂၀ ခန့် ထုတ်နိုင်မည့်အကြောင်း ကတိပြုထားသည်။ ၂၀၂၁ ခုနှစ်တွင် ဖိုင်ဇာသည် ဆေးလုံးပေါင်း ၁.၃ ဘီလီယံခန့် ၊ Moderna က  သန်း ၅၀၀ နှင့် တစ်ဘီလီယံအကြား ထုတ်လုပ်ရန် မျှော်မှန်းထားသည်။

 ဖိုင်ဇာ-ဘိုင်အိုတက် ကာကွယ်ဆေးသည် လွန်စွာအေးသော အပူချိန်တွင် ထိန်းသိမ်းထားရန် လိုအပ်ပြီး ကာကွယ်ဆေး ထုတ်ယူရန်အတွက် စိုးရိမ်ပူပန်မှုများ မြင့်တက်လာစေသည်။ အင်္ဂါနေ့တွင် ဘာလာက ဖြန့်ဝေခြင်း ပြဿနာများအား ထိန်းသိမ်းလုပ်ဆောင်နိုင်ရန် မျှော်လင့်ကြောင်း ပြောခဲ့သည်။ “ ဒီလုပ်ဆောင်ချက်ကြီး တစ်ခုလုံး ဘယ်လိုအဆင်ပြေပြေပြီးသွားလဲဆိုတာ လူတွေ အံ့ဩကြမယ်ထင်တယ်” ဟု သူက ဆိုသည်။

Federal Operation Warp Speed initiative မှ သုနေသန ထောက်ပံ့မှုငွေကြေး လက်မခံခဲ့သော ဖိုင်ဇာသည် အမေရိကန် အစိုးရအား အမေရိကန်ဒေါ်လာ ၁.၉ ဘီလီယံအတွက် ဆေးအလုံးပေါင်း ၁၀၀ မီလီယံခန့်ပေးရန် သဘောတူထားခဲ့သည်။ အမေရိကန်သည် ဆေးလုံး မီလီယံ ၄၀၀ ခန့်ထပ်မံ ဝယ်ယူရန် ရွေးချယ်နိုင်သည်။ Moderna သည် သူ၏ ကာကွယ်ဆေးအတွက် ဖက်ဒရယ်ထောက်ပံ့ငွေ အမေရိကန် ဒေါ်လာ တစ်ဘီလီယံခန့် ရရှိခဲ့ပြီး အမေရိကန်အား ဒေါ်လာ ၁.၅ ဘီလီယံအတွက် ဆေးလုံးပေါင်း ၁၀၀ မီလီယံ ပေးရန် သဘောတူညီခဲ့သည်။
 
ဖိုင်ဇာ စမ်းသပ်မှုတွင် ပါဝင်ခဲ့သော အမေရိကန် စေတနာ့ဝန်ထမ်း ၃၀ရာခိုင်နှုန်းများသည် လူဖြူများမဟုတ်ကြောင်း ကုမ္ပဏီက ဆိုခဲ့သည်။ အမေရိကန် ပါဝင်သူ ၄၅ရာခိုင်နှုန်းသည် အသက် ၅၆ နှင့် ၈၅ အကြားဖြစ်ပြီး ပြင်းထန်သော ကိုဗစ်-၁၉ ကူးစက်နိုင်ခြေ မြင့်မားသူများဖြစ်ကြသည်။ Moderna ၏ စေတနာ့ဝန်ထမ်း ၃၀,၀၀၀ ပါဝင်သော စမ်းသပ်မှုမှ ၃၇ရာခိုင်နှုန်းခန့်သည် လူဖြူများမဟုတ်ကြောင်း ကုမ္ပဏီက ဆိုသည်။