သြဂုတ် ၁၀ရက်
၂၀၂၀ခုနှစ် အထွေထွေရွေးကောက်ပွဲမှာ ရန်ကုန်တိုင်းဒေသကြီးအတွင်းမှာရှိတဲ့ မဲဆန္ဒနယ်တွေကနေ ဝင်ရောက်အရွေးချယ်ခံယှဉ်ပြိုင်ကြမယ့် ကိုယ်စားလှယ်လောင်းဟာ စုစုပေါင်း ၉၅၅ ဦး အထိရှိတယ်လို့ ရန်ကုန်တိုင်းဒေသကြီး ရွေးကောက်ပွဲကော်မရှင် ဥက္ကဋ္ဌ ဦးကြည်မြင့်က ပြောပါတယ်။
“အားလုံးစုစုပေါင်း ၉၅၅ ဦး ဝင်ပြိုင်ကြမယ်။ အမျိုးသား၊ပြည်သူ၊တိုင်းဒေသကြီးလွှတ်တော်၊ တိုင်းရင်းသား တို့ကို ဝင်ပြိုင်ကြမယ်။ လွှတ်တော်ကိုယ်စားလှယ်တွေကို မနက်ဖြန်(သြဂုတ်လ ၁၁ရက်)ကစပြီးတော့ စိစစ်ပါမယ်။ အစည်းဝေးခေါ်ထားပါတယ်။ ခရိုင်တွေလည်း မနက်ဖြန်ကစပြီး စိစစ်ပါမယ် “ ဟု ဦးကြည်မြင့် က မဇ္ဈိမသတင်းဌာနကို ပြောပါတယ်။
ရန်ကုန်တိုင်းဒေသကြီးမှာဝင်ရောက်ယှဉ်ပြိုင်မယ့် ကိုယ်စားလှယ် လောင်းတွေဟာဆိုရင် ပြည်သူလွှတ်တော်ကိုယ်စားလှယ်နေရာအတွက် ၂၉၅ ဦး ၊ အမျိုးသားလွှတ်တော်ကိုယ်စားလှယ်နေရာအတွက် ၇၂ ဦး ၊ တိုင်းဒေသကြီးမဲဆန္ဒနယ်(၁)ကိုယ်စားလှယ်နေရာ အတွက် ၂၉၇ဦး ၊ တိုင်းဒေသကြီး မဲဆန္ဒနယ်(၂) ကိုယ်စားလှယ်နေရာအတွက် ၂၇၈ ဦး တို့က ဝင်ရောက် အရွေးချယ်ခံ ယှဉ်ပြိုင်ကြမှာ ဖြစ်ပါတယ်။
တိုင်းရင်းသားရေးရာလူမျိုးမဲဆန္ဒနယ်အတွက် ၁၃ဦး ဝင်ရောက်ယှဉ်ပြိုင်ကြမှာ ဖြစ်ပြီး ရခိုင်တိုင်းရင်းသားလူမျိုးရေးရာဝန်ကြီးနေရာအတွက် ၆ဦး ၊ ကရင်တိုင်းရင်းသားရေးရာ-န်ကြီးနေရာအတွက် ၇ ဦး ဝင်ရောက်ယှဉ်ပြိုင်ကြမှာ ဖြစ်ပါတယ်။
ဒီအထဲမှာတော့ တစ်သီးပုဂ္ဂလကိုယ်စားလှယ်လောင်း ၃၂ ဦးနဲ့ နိုင်ငံရေးပါတီ ၄၃ ပါတီကနေ ဝင်ရောက်ယှဉ်ပြိုင်ကြတာလည်းဖြစ်ပါတယ်။
ရန်ကုန်တိုင်းအတွင်း မဲဆန္ဒနယ်မြေ ၁၅၄ခုရှိပြီ ပြည်သူ့လွှတ်တော် မဲဆန္ဒနယ်မြေ ၄၅ ခု၊အမျိုးသားလွှတ်တော်မဲဆန္ဒနယ်မြေ ၁၂ခု ၊တိုင်းဒေသကြီးနှင့်ပြည်နယ်မဲဆန္ဒနယ်မြေ ၉၀ နဲ့ တိုင်းရင်းသားရေးရာလူမျိုးစုမဲဆန္ဒနယ်မြေ ၇ခု ရှိပါတယ်။
တစ်တိုင်းလုံးအတိုင်းအတာအရ ဆန္ဒမဲပေးနိုင်သူဦးရေကတော့ ၅၆ သိန်း ရှိတယ်လို့ ရန်ကုန်တိုင်းဒေသသကြီး ရွေးကောက်ပွဲကော်မရှင်ရုံးထံက သိရပါတယ်။
၂၀၂၀ ခုနှစ် အထွေထွေရွေးကောက်ပွဲကို ဝင်ရောက်ယှဉ်ပြိုင်ကြမယ့် ကိုယ်စားလှယ်လောင်းတွေအနေနဲ့ ကိုယ်စားလှယ်လောင်းအမည်စာရင်းတွေကို သြဂုတ်လ ၇ ရက်နေ့ နောက်ဆုံးထားတင်သွားရတာ ဖြစ်ပြီး သြဂုတ်လ ၁၀ ရက်နေ့အထိ အမည်စာရင်းကို ပြန်လည်ရုတ်သိမ်းနိုင်တယ်လို့ တိုင်းရွေးကောက်ပွဲကော်မရှင် ကပြောပါတယ်။
လွှတ်တော်ကိုယ်စားလှယ်လောင်းအမည်စာရင်းစိစစ်ခြင်း လုပ်ငန်းတွေကို သြဂုတ်လ ၁၁ ရက်ကနေ့ သြဂုတ်လ ၁၇ ရက်နေ့အထိ သက်ဆိုင်ရာကော်မရှင်အဖွဲ့ခွဲရုံးတွေမှာ စိစစ်သွားတော့မှာပါ။
