စင်္ကာပူရောက် မြန်မာများ ယနေ့ စင်္ကာပူနိုင်ငံရှိမြန်မာသံရုံး၌ စတင်၍ ကြိုတင်မဲပေးခဲ့ပြီး အချိန်မလောက်မှုကြောင့် အချိန်ပိုပေးရန်တောင်းဆိုခဲ့ကြသည်ဟု စင်္ကာပူရောက် မြန်မာတစ်ဦးက ပြောသည်။
'' ၁ နာရီကို ၁၆၀ ဦး လောက်သာ မဲပေးခွင့်ရတော့ ၄ ရက်ထဲဆိုတာ မဖြစ်နိုင်ပါဘူး။ ညနေ ၄နာရီခွဲမှာ သံရုံး အရှေ့တံခါးပိတ်ဖို့ စီစဉ်ပါတယ်။ ဒါပေမယ့် သံရုံးရှေ့ရောက်ဖို့ အချိန် ၃ နာရီကျော်ကြာ နေပူထဲ ကနေတန်းစီလာတဲ့သူတွေ အဆင်မပြေဖြစ်လို့ သတ်မှတ်တဲ့နေရာထိ သွားပါတယ်။ သံရုံးကလည်း ရှင်းပြတယ်၊ သူ့လူတွေ တစ်ညလုံးအလုပ်လုပ်ထားရလို့ သံရုံးထဲဝင်တဲ့သူတွေ အပြီးထိတောင် ၁ နာရီကျော် အချိန်ပေးရဦးမှာလို့ပြောတယ်။ နောက်ဆုံး နှစ်ဘက်ညှိနှိုင်းပြီးတော့ လုပ်ပေးရှာပါတယ် ညနေ ၅ နာရီကျော်အထိ မဲပေးဖို့ အချိန်ပိုပေးနိုင်ရေး တောင်းဆိုနေကြတာပါ။'' ဟု အချိန် ၄ နာရီ ကျော်စောင့်ဆိုင်းခဲ့ရပြီးမှ မဲပေးခဲ့သူ မလင်းလင်းက မဇ္ဈိမသို့ပြောသည်။
သံရုံးရှ့တွင် လာရောက်မဲပေးသူ ၁၅၀၀ ဦး ကျော်နေပူထဲတွင် တန်းစီခဲ့ကြပြီး တစ်ချို့မှာ အချိန်ပို ပေးရန် သံရုံးတာဝန်ရှိသူများထံသွားရောက် ညှိနှိုင်းခဲ့ကြသည်ဟု ၎င်းကဆိုသည်။
တန်းစီနေသူများအား ရေ၊ ခေါက်ဆွဲကြော်၊ ချိုချဉ်များလာရောက် လှူဒါန်းသူများ၊ မဲပေးမည့်သူများ အား မဲပေးနည်းလမ်းညွှန်ပေးသူများ၊ မဲပေးပြီးပြန်ထွက်လာသူများအား Survey ကောက်ခံသူများနှင့် မီဒီယာများရှိနေသည်ဟု သိရသည်။
