ဇန်နဝါရီ ၃၊ ရန်ကုန် ။ ။ ၂၀၁၈ ခုနှစ်၊ တစ်နှစ်လုံးအတွင်း လွတ်လပ်စွာထုတ်ဖော်ပြောဆိုခွင့်နှင့်ဆိုင်သော တရားစွဲဆိုခံရမှု ၁၀၃ မှု ရှိခဲ့ပြီး တရားစွဲဆိုခံရသူ ၂၁၇ ဦး ရှိခဲ့သည်ဟု ဇန်နဝါရီ ၃ ရက်နေ့က အသံအဖွဲ့မှ ထုတ်ပြန်လိုက်သည်။
ဆက်သွယ်ရေးဥပဒေဖြင့် တရားစွဲဆိုမှု ၅၃ မှု၊ နိုင်ငံတော်အကြည်ညိုပျက်စေမှုဥပဒေ ဖြင့် ၁၄ မှု၊ ငြိမ်းချမ်းစွာ စီတန်းလှည့်လှည်ခွင့်(ငြိမ်းစုစီ ) ဥပဒေဖြင့် ၃၆ မှု ရှိပြီး တရားစွဲဆိုခံရသည့် စုစုပေါင်းအရေအတွက်မှာ ၂၁၇ ဦး ရှိသည်ဟု အဆိုပါ တရားစွဲဆိုခံရမှုအနှစ်ချုပ်စာရင်း ထုတ်ပြန်ချက်တွင် ဖော်ပြထားသည်။
အဆိုပါ အမှုများအနက်မှ သတင်းမီဒီယာများကို တရားစွဲဆိုမှု ၉ မှု ဖြင့် သတင်းသမား ၁၂ ဦး တရားစွဲဆိုခံခဲ့ရ ပြီး ဆက်သွယ်ရေးဥပဒေ ပုဒ်မ ၆၆ (ဃ)၊ နိုင်ငံတော်အကြည်ညိုပျက်စေမှု ပုဒ်မ ၅၀၅ (ခ)၊ အသရေဖျက်မှု ဆိုင်ရာ ရာဇသတ်ကြီးဥပဒေပုဒ်မ ၄၉၉/၅၀၀ တို့ဖြင့် တရားစွဲဆိုခံထားရခြင်း ဖြစ်သည်။
တရားစွဲဆိုခံရမှုနှင့်ပတ်သက်ပြီး ဥပဒေ ၃ ခုသည် မဖြစ်မနေ ပြင်ဆင်ရမည်ဟု အသံ အဖွဲ့တည်ထောင်သူ မောင်ဆောင်းခက ပြောသည်။
“အထူးသဖြင့်တော့ ကျွန်တော်တို့ စောင့်ကြည့်တဲ့ဥပဒေသုံးခု ၊ ငြိမ်းစုစီဥပဒေရယ်၊ ဆက်သွယ်ရေးဥပဒေရယ်၊ နိုင်ငံတော်အကြည်ညိုပျက်စေမှုရယ် အဲ့ဒီဟာတွေက မဖြစ်မနေ ပြင်ရမယ့်ဥပဒေတွေဖြစ်တယ် ဆိုတာ ထပ်ပြီးတော့ မီးမောင်းထိုးဖော်ပြတာပါ ” ဟု မောင်ဆောင်းခက ပြောသည်။
လွတ်လပ်စွာထုတ်ဖော်ပြောဆိုခွင့် လှုပ်ရှားမှုအဖွဲ့ အသံ (Athan) ကို ၂၀၁၈ ခုနှစ်၊ ဇန်နဝါရီတွင် စတင် ဖွဲ့စည်း ခဲ့ခြင်း ဖြစ်ကာ ၂၀၁၈ ခုနှစ် အောက်တိုဘာ ၁၈ ရက်က အသံအဖွဲ့၏ လွတ်လပ်စွာထုတ်ဖော်ပြောဆိုခွင့် (အစိုးရသက်တမ်းဝက် အစီရင်ခံစာ) ထုတ်ပြန်ထားခဲ့သေးသည်။