ရန်ကုန်၊ ဒီဇင်ဘာ ၁၀ ။ ။ ပြည်တွင်းရှိ ပုဂ္ဂလိဘဏ်ခွဲများ တိုးချဲ့ဖွင့်လှစ်ရာတွင် ဗဟိုဘဏ်သို့ တရားဝင်အကြောင်းကြားခြင်း မရှိသော ဘဏ်များကို ကျပ်သိန်း ၇၀ ဒဏ်ငွေရိုက် အရေးယူသွားမည်ဟု မြန်မာနိုင်ငံတော် ဗဟိုဘဏ် ဒုဥက္ကဋ္ဌ ဦးစိုးသိန်းက ပြောသည်။
“ ခွင့်ပြုချက် မရှိဘဲနဲ့ ဖွင့်ထားတာတွေရှိလို့ရင် ကျွန်တော်တို့ကို တင်ပြရမယ်။ သူတို့ ပိတ်ချင်လည်း ပိတ်၊ မပိတ်ချင်ဘူး ဆက်ဖွင့်မယ်ဆို ဒဏ်ရိုက်မယ်” ဟု ဗဟိုဘဏ် ဒုဥက္ကဋ္ဌ ဦးစိုးသိန်းက ပြောသည်။
ယနေ့ ဒီဇင်ဘာလ ၁၀ ရက်၊ ရန်ကုန်မြို့ ၊ မြန်မာနိုင်ငံဘဏ်များအသင်းတွင် ပြုလုပ်သော မြန်မာနိုင်ငံ၏ ပထမဆုံးသော ချေးငွေသတင်းအချက်အလက်ဌာန ထူထောင်ရန်အတွက် သဘောတူညီမှု လက်မှတ်ရေးထိုးပွဲ အပြီးတွင် ပြောခဲ့ခြင်း ဖြစ်သည်။
ထိုသို့ ဖွင့်လှစ်ရာတွင် အကြောင်းမကြားသည့် ဘဏ်ခွဲများကို ကျပ် သိန်း ၇၀ ဒဏ်ရိုက်မည် ဖြစ်ပြီး လာမည့် ၂၀၁၉ ခုနှစ်၊ ဇန်နဝါရီလမှ စတင်ကာ ကျပ်သိန်း ၂၀၀ အထိ တိုးမြှင့်ဒဏ်ရိုက်သွားမည်ဟု သိရသည်။
“ အရင်တုန်းကတော့ တစ်ခါတလေကြရင် ပြောတာပေါ့။ Central Bank က ရပါတယ်ကွာ။ တို့ လုပ်လို့ ရပါ တယ်။ ကျွန်တော်တို့က အခုတော့ မရတော့ဘူး။ စည်းကမ်းပိုရှိလာဖို့ လိုတယ်” ဟု ဗဟိုဘဏ်ဒုဥက္ကဋ္ဌက ပြောသည်။
နောက်ပိုင်းတွင် ပုဂ္ဂလိကဘဏ်များ စည်းကမ်းရှိလာစေရန်နှင့် စည်းကမ်းမဲ့ မလုပ်စေရန် ရည်ရွယ်ဆောင်ရွက် ခြင်းဖြစ်ကြောင်း ဗဟိုဘဏ်ဒုဥက္ကဋ္ဌက ထည့်သွင်းပြောဆိုသွားသည်။
ဗဟိုဘဏ်မှ ချမှတ်သော စည်းမျဉ်းစည်းကမ်းများသည် ပြည်သူများနှင့် စီးပွားရေးလုပ်ငန်းရှင်များအပေါ် အကျိုး သက်ရောက်မှု မရှိသောကြောင့် မှတ်ချက်မပေးလိုကြောင်း စီးပွားရေးလုပ်ငန်းရှင်တစ်ဦးက ဆိုသည်။
လက်ရှိ မြန်မာနိုင်ငံတွင် ပုဂ္ဂလိဘဏ်လုပ်ငန်း ၁၄ ခု ခန့် ရှိပြီး သက်ဆိုင်ရာဘဏ်ခွဲများကို ရန်ကုန်၊ မန္တလေးနှင့် နေပြည်တော်တွင် အများဆုံးဖွင့်လှစ်ထားကြောင်း တွေ့ရသည်။
ပုဂ္ဂလိဘဏ်ခွဲများကို အရေးယူမှု ရှိ၊ မရှိ လတ်တလော မသိရသေးသော်လည်း မဇ္ဈိမမှ အသေးစိတ် ထပ်မံ တင်ပြသွားမည် ဖြစ်သည်။
