မုံရွာ၊ မတ် ၁၁။ ။ စစ်ကိုင်းမြို့နယ်၊ ဝက်လက်မြို့နယ်နှင့် အရာတော်မြို့နယ်တို့အား ဆက်သွယ်ထားသော ဖွံ့ဖြိုးရေးလမ်းမကြီးမှာ အလွန်ပျက်စီးလျှက်ရှိပြီး အမြန်ဆုံးပြုပြင်ရန် လိုအပ်နေကြောင်း စစ်ကိုင်းမြို့နယ် တိုင်းဒေသကြီး လွှတ်တော် ကိုယ်စားလှယ် ဒေါ်စုမြတ်ထက်က ပြောသည်။
အဆိုပါသုံးမြို့နယ်အား ဆက်သွယ်ထားသော သိမ်ချောင်း-ကျောင်းကုန်း-သလဲဘာ ဖွဲ့ဖြိုးရေးလမ်းမကြီးမှာ ပျက်စီးနေသည့်အတွက် အမြန်ဆုံး ပြန်လည်ပြုပြင်ရန်လိုအပ်လျှက်ရှိကြောင်း ၎င်းကဆိုသည်။
"ဒီလမ်းမကြီးဟာ ဟိုးအရင်က မြေသားလမ်းအဖြစ် ရှိနေပါတယ်။ နိုင်ငံတော်အစိုးရနဲ့ ဒေသခံတွေ ပူးပေါင်းပြီး တော့ ကတ္တရာလမ်းအဖြစ် ခင်းခဲ့ကြပါတယ်။ ၇ နှစ်သာ ရှိသေးပေမယ့် အလွန်အမင်း ပျက်စီးလျှက်ရှိပါတယ်။ ပြန်လည်ပြုပြင်ပေးဖို့လိုအပ်နေပါတယ်။" ဟု ဒေါ်စုမြတ်ထက်က ပြောသည်။
အဆိုပါ ဖွံ့ဖြိုးရေးလမ်းမကြီးသည် စစ်ကိုင်းမြို့နယ်နှင့် ဝက်လက်မြို့နယ်တို့တွင် သိမ်ချောင်း၊ ပေါက်မ၊ မင်းရွာ၊ ရွှေစည်းခုံ၊ ကျောက်ကုန်း၊ သရက်ချို စသည့်ကျေးရွာလမ်းပိုင်းတို့ပါဝင်ပြီး အရှည်အားဖြင့် ၇ ဒသမ ၆ မိုင် ရှိပြီး လမ်းဦးစီးဌာနပိုင် စစ်ကိုင်း-ရွှေဘိုလမ်းနှင့်ထပ်မံဆက်သွယ်ထားသော ဦးစားပေး အဆင့် ၁ လမ်းဖြစ်ကြောင်း သိရသည်။
ယင်းလမ်းပိုင်းသည် စစ်ကိုင်းမြို့နယ်အတွင်း၌ ၆ ဒသမ ၂ မိုင် ပါဝင်ပြီး ဝက်လက်မြို့နယ်အတွင်း၌ ၁ ဒသမ ၄ မိုင် ပါဝင်ကြောင်း၊ စစ်ကိုင်းတိုင်းဒေသကြီး စက်မှု၊လက်မှုနှင့်လမ်းပန်းဆက်သွယ်ရေး ဝန်ကြီးဌာနမှ သိရသည်။
စစ်ကိုင်းတိုင်းဒေသကြီး၊ လမ်းပန်းဆက်သွယ်ရေးဝန်ကြီး ဦးသန်းညွှန့်ဝင်းက ပျက်စီးနေသောဖွံ့ဖြိုးရေးလမ်းအား မြေပြင်အခြေအနေကွင်းဆင်းကြည့်ရှု့ပြီး ဘဏ္ဍာရေးနှစ်အလိုက် ပြင်ဆင်ရန်ပုံငွေထားရှိကာ လျာထားဆောင်ရွက်ပေးသွားမည်ဖြစ်ကြောင်း ပြောကြားသည်။
အဆိုပါ ဖွံ့ဖြိုးရေးလမ်းမကြီးကို ကျေးရွာ(၇)ရွာ၊ အိမ်ခြေ(၉၅၀)၊ လူဦးရေ (၆၇၄၁)ဦး တို့ မှီခိုသွားလာနေရသော ဖွံ့ဖြိုးရေးလမ်းပိုင်းဖြစ်ကြောင်း သိရသည်။
