မင်္ဂလာပါ…………….။
ဒီတစ်ပတ်တော့ ပိတ်ရက်မှာ ကုန်ကျစရိတ် နည်းနည်းနဲ့ ထမင်းမြိန်မယ့် ဟင်းတစ်ခွက် ချက်ရအောင်။ ပါ၀င်ပစ္စည်းအမယ်လည်း မများ ၊ ချက်ရတာလည်း လွယ်ကူလှတဲ့ ၀က်နံရိုးမျှစ်ချဉ်ဟင်းပါ။
အခု ဟင်းချက်ဖို့ လိုအပ်တာတွေ ပြင်ဆင်ကြရအောင်။
လိုအပ်တာတွေကတော့
မျှစ်ချဉ်ဖူးနုနု ၂၅သား
၀က်နံရိုးနု ၂၅သား ( အတုံးသေးသေးတုံးဆားဆနွင်း နယ်ထားပါ)
ကြက်သွန်ဖြူ နီ အနည်းငယ်
ငရုတ်အပုမှုန့် အနည်းငယ်
ငံပြာရည် အနည်းငယ်
ကိုင်းခရမ်းချဉ်သီး အနည်းငယ်တို့ပဲ ဖြစ်ပါတယ်။
ဟင်းချက်ဖို့ စုံပြီဆိုရင် ငရုတ်အပုမှုန့်ရယ် ကြက်သွန်အဖြူ၊ အနီရယ်ကို ညက်အောင်ထောင်းထားပါ။ မျှစ်ချဉ်ကို ရေ ၃ ထပ်ဆေးပြီး အိုးထဲထည့်ပါ။ နံရိုးထည့်ပါ။ ငံပြာရည် ထည့်ပါ။ ခရမ်းချဉ်သီး ညှပ်ထည့်ပါ ။ အကုန်စုံရင် လက်အိပ်စွပ်ပြီး သမအောင် နယ်ပါ။ရေ အသား မြှုပ်ရုံ ထည့်ပါ ၊ ဆီ အနည်းငယ်ထည့်ပါ။ ပြီးရင်တော့ မီးအေးအေးနဲ့ ချက်ပါ။
ဟင်းအိုးတည်နေတုန်း အိုးမကပ်အောင် ဂရုစိုက် မွှေပေးပါ။ ရေခမ်းဆီပြန်ပြီး ၀က်သားနူးရင်တော့ ၀က်နံရိုးမျှစ်ချဉ်ဟင်းရည် ရပါပြီ.။
၀က်နံရိုးနုနုလေးနဲ့ မျှစ်ချဉ်အဖူးနုနုလေးကို ရောချက်ထားတဲ့ အရသာ ပြည့်ဝတဲ့ ဟင်းလေးရပါပြီ။ ကုန်ကျစရိတ်လည်း သိပ်မများပေမယ့် မိသားစုများများစားလို့ ရမယ့် ဟင်းတစ်မယ်ပါ။ ဒီအစီအစဉ်ကို စနေနေ့ ညနေတိုင်း တင်ဆက်ပေးမှာဖြစ်တာမို့ တနင်္ဂနွေနေ့ အားလပ်ရက်မှာ တစ်ပျော်တစ်ပါး ချက်ပြုတ်စားနိုင်ကြပါပြီ။