၂၀၁၅-၂၀၁၆ ဘဏ္ဍာနှစ်တွင် ကျန်းမာရေးကဏ္ဍအတွက် ၇၅၃ ဘီလီယံကျပ် (ကန် ဒေါ်လာ ၆၀၂သန်း) ချထားခဲ့ရာ ၂၀၁၁-၂၀၁၂ ဘဏ္ဍာနှစ် ခွဲဝေမှုထက် ၈ ဒသမ ၇ ဆခန့် ပိုတိုးပေးထားသည်ဟု ဒုတိယသမ္မတ ဒေါက်တာစိုင်းမောက်ခမ်းက ဇူလိုင် ၂၈ တွင်ပြောသည်။
ယင်းသို့ ဘဏ္ဍာငွေ တိုးပေးခဲ့သဖြင့် အဓိကလိုအပ်သော ဆေးနှင့် ဆေးပစ္စည်းများကို ၂၀၁၁ ခုနှစ်ကထက် ၃၅ ဆ တိုးမြှင့်ဝယ်ယူနိုင်ခဲ့ပြီး အမေရိကန်ဒေါ်လာ ၁၁၂ သန်းဖိုးခန့် ဖြစ်သည်ဟု နေပြည်တော်၌ ကျင်းပနေသည့် အမျိုးသားအဆင့်ကျန်းမာရေးညီလာခံ၌ ပြောကြားသည်။
ဆရာဝန်နှင့် သူနာပြုများ ခန့်ထားမှုများကို မြှင့်တင်နိုင်ခဲ့သည့်ပြင် ပြည်သူ့ကျန်းမာရေးစောင့်ရှောက်မှု လုပ်ငန်း များတွင်လည်း လူနာများမှ စိုက်ထုတ်ကုန်ကျရငွေသည် ၂၀၁၁ ခုနှစ်တွင် ၈၀ ရာခိုင်နှုန်းရှိခဲ့ရာမှ ၂၀၁၄ ခုနှစ် တွင် ၆၀ ရာခိုင်နှုန်းအထိ လျှော့ချနိုင်ခဲ့သည်ဟု ဆက်လက်ပြောဆိုသည်။