ဖေဖော်ဝါရီလ ၃ ။ ။ ဂျပန်နိုင်ငံသား ဓါတ်ပုံ ဆရာ Ruru ၏ ကမ္ဘာအရပ်ရပ်ကနေ ရိုက်ကူးထားသည့် ဓာတ်ပုံများကို ရန်ကုန်မြို့ ဗိုလ်တစ်ထောင်မြို့နယ် ၄၃ လမ်း ရှိ 43 Art Gallery မှာ ဖေဖော်ဝါရီလ ၂ရက်နေ့ကနေ ဖေဖော်ဝါရီလ ၁၁ ရက်နေ့ထိ ပြသသွားမည်ဖြစ်သည် ။
အဆိုပါ ဓာတ်ပုံပြပွဲတွင် ကမ္ဘာအရပ်ရပ်ကမတူညီသည့် ရှုခင်းပုံများ၊ လူနေမှုစရိုက်ပုံများ၊ တိရစ္ဆာန်ပုံများ နှင့် စုစုပေါင်း ၄၈ ပုံကို ပြသရောင်းချသွားမည်ဖြစ်ပြီး ဓာတ်ပုံ တစ်ပုံလျှင် ငွေကျပ် ၅ သောင်းနှင့် ရောင်းချသွားမည်ဖြစ်သည်။
"သူက ရှုခင်းလည်းပါတယ် ။ လူနေမှုစရိုက်လည်း ပါတယ်။ အဓိက ကတော့ သူပြချင်တဲ့ မတူညီတဲ့ လူနေမှုဓလေ့လေးတွေကို ပြချင်တာပါ လူမျိူးချင်းမတူ၊ ဓလေ့လေးတွေ ကွဲပြားတာကို ပြချင်တဲ့ သဘောပါ" ဟု ရှုခင်းဓာတ်ပုံဆရာ ထိန်လင်းက ပြောသည်။
ယင်းဓာတ်ပုံပြပွဲတွင်ရှိသည့် ဓာတ်ပုံပေါင်း ၄၈ ပုံထဲမှ ပုဂံတွင် ရိုက်ကူးထားသည့် မြန်မာ့ဓလေ့ လူနေမှုစရိုက်ပုံကို ရည်ညွှန်းထားသည့် ဓာတ်ပုံပါ ပြသခဲ့သည်။