နေပြည်တော်(ဇန်နဝါရီ ၂၀ရက်၊ ၂၀၁၇ခုနှစ်)။ ။ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် နေပြည်တော်၊ တပ်မတော်ဆေးရုံကြီးတွင် ဇန်နဝါရီ ၁၉ရက်၊ နံနက်ပိုင်းက ဝဲဘက်မျက်စိအတွင်းတိမ်အား ခွဲစိတ်ကုသရာ အောင်မြင်စွာ ခွဲစိတ်ကုသမှုပြီးဆုံးကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်ထားသည်။

ဗိုလ်ချုပ်မှူးကြီးအား မျက်စိအထူးကုဆရာဝန်ကြီး ပါမောက္ခဒေါက်တာဦးသန်းအောင်နှင့် ပါမောက္ခ ဒုတိယဗိုလ်မှူးကြီး သန်းအောင်(အငြိမ်းစား)တို့ ဦးစီး၍ မျက်စိအတွင်းတိမ်အား ခွဲစိတ်ပြီး မျက်တွင်းမှန်ဘီလူးအစားထိုးကုသမှု (PHACOEMULSIFICATION+FOLDABLE  IOL  IMPLANTATION) လုပ်ဆောင်ခဲ့ခြင်းဖြစ်သည်။

ဗိုလ်ချုပ်မှူးကြီး မင်းအောင်လှိုင်သည် ဇန်နဝါရီ ၁၆ ရက်နံနက်ပိုင်းကလည်း ယာဘက်မျက်စိအား အောင်မြင်စွာခွဲစိတ်ကုသပြီးစီးခဲ့ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်ထားသေးသည်။

မျက်စိအတွင်းတိမ်ရောဂါသည် မြန်မာနိုင်ငံတွင် အဖြစ်အများဆုံး မျက်စိရောဂါတစ်ခုဖြစ်ပြီး တပ်မတော် ဆေးရုံများတွင်သာမက တပ်မတော်နယ်လှည့်အထူးဆေး ကုသရေးအဖွဲ့များဖြင့်လည်း ပြည်သူလူထု အတွင်းတွင်ပါ လူနာအမြောက်အများကို ခွဲစိတ်ကုသပေးလျက်ရှိကြောင်း သတင်းရရှိသည်။