ဇွန် ၁၈ ။ ။ နောင်တက်လာမည့် အမေရိကန်သမ္မတသစ် ဘယ်သူပဲဖြစ်လာပါစေ အတူတကွ လက်တွဲလုပ်ဆောင်သွားရန် အသင့်ရှိနေသည်ဟု ရုရှ သမ္မတ ဗလာဒီမာ ပူတင်က ဇွန်လ ၁၇ ရက်တွင် ပြောကြားလိုက်သည်။ ဥရောပ ထိပ်တန်းအရာရှိကြီးများ၊ နိုင်ငံတကာကုမ္မဏီများမှ အမှုဆောင်အရာရှိချုပ်များနှင့် နှစ်ရက်တာ တွေ့ဆုံဆွေးနွေးပြီးနောက် ပူတင်က ယခုကဲ့သို့ ရုရှ-အမေရိကန် နှစ်နိုင်ငံ ပြန်လည်သင့်မြတ်ရေးစကားကို ဆိုလိုက်ခြင်းလည်းဖြစ်သည်။
ရုရှ သမ္မတ ပူတင်သည် ဇွန်လ ၁၆ နှင့် ၁၇ ရက်နေ့တို့က ဥရောပကော်မရှင်ဥက္ကဌ၊ အီတလီဝန်ကြီးချုပ် နှင့် ကမ္ဘာ့ထိပ်တန်းကုမ္မဏီကြီးများမှ စီအီးအိုများနှင့် စိန့်ပီတာစဘက်ဂ်မြို့တွင် တွေ့ဆုံဆွေးနွေးမှုများ ပြုလုပ်ထားခဲ့သည်။
အထက်ပါတွေ့ဆုံဆွေးနွေးမှုများအတွင်း မိမိတို့ ရုရှအနေဖြင့် အမေရိကန်သမ္မတသစ် ဘယ်သူနှင့်မဆို အတူတကွလုပ်ဆောင်နိုင်သည်ဟု ပူတင်က ပြောကြားသွားခြင်းဖြစ်သည်။
" ကျွန်တော်တို့က အမေရိကန်သမ္မတသစ်ရဲ့ လုပ်ဆောင်ချက်ကိုပဲ ကြည့်သွားမှာပါ၊ ပြောစကားတွေကို ကြည့်သွားမှာမဟုတ်ပါဘူး၊ နောက်ပြီး နှစ်နိုင်ငံ ဆက်ဆံရေး ပုံမှန်ပြန်ဖြစ်ဖို့ နည်းလမ်းတွေလည်း ရှာချင်ပါတယ်၊ စီးပွားရေးပိုင်းရော နိုင်ငံတကာလုံခြုံရေးပိုင်းမှာပါ တိုးမြင့်ပူးပေါင်းသွားလိုပါတယ်" ဟု ပူတင်က ပြောကြားသွားခဲ့သည်။
တစ်ချိန်တည်းမှာပင် မကြာမီကျင်းပတော့မည့် ဘရာဇီး အိုလံပစ်ပြိုင်ပွဲတွင် ရုရှ ပြေးခုန်ပစ်အားကစားသမားများ ဝင်ရောက်ယှဉ်ပြိုင်ခွင့် ပိတ်ပင်ခံရမှုအပေါ်တွင်လည်း ပူတင်က ပြစ်တင်ပြောဆိုသွားခဲ့သေးသည်။
