ရုရှားနိုင်ငံသို့ ဝင်ရောက်ရန် ငြင်းဆန်ခံခဲ့ရသည့် တရုတ်နိုင်ငံသားများ အား ပြုမူဆက်ဆံမှုအပေါ် ရုရှားရှိ တရုတ်သံရုံးက ပြစ်တင်ဝေဖန်ခဲ့ပြီး အဆိုပါ “အခွင့်အရေးချိုးဖောက်မှု” ဖြစ်ရပ်ကို စုံစမ်းစစ်ဆေးပေးရန် တောင်းဆိုခဲ့ကြောင်း TASS သတင်းအေဂျင်စီက ဖော်ပြသည်။
တရုတ်နိုင်ငံသား ၅ ဦးကို ရုရှားဘက်မှ ဇူလိုင် ၂၉ ရက်နေ့က ပြည်ဝင်ခွင့် ငြင်းပယ်ခဲ့ပြီး ၎င်းတို့၏ ခရီးသွားဗီဇာများကိုပင် ပယ်ဖျက်ခဲ့ကြောင်း တရုတ်သံရုံးက ၎င်း၏ WeChat စာမျက်နှာတွင် ဖော်ပြထားသည်။ ရုရှားသည် ၎င်းတို့အား ၄ နာရီ ကြာ စစ်ဆေးမေးမြန်းခဲ့သည် ဟုလည်း သံရုံးက ဆိုသည်။
ရုရှားအာဏာပိုင်များသည် တရုတ်နိုင်ငံသားများ အား ပြည်ဝင်ခွင့်ဗီဇာ ငြင်းပယ်ရခြင်း မှာ “ရုရှား ပြည်ဝင်ခွင့် လျှောက်ထားရခြင်း ရည်ရွယ်ချက်မှာ ၎င်းတို့၏ ခရီးစဉ် ရည်ရွယ်ချက်နှင့် ကိုက်ညီမှု မရှိသည့် အပြင် ရုရှားဥပဒေ၏ စံနှုန်းများကို ချိုးဖောက်ရာရောက်သော ကြောင့် ဖြစ်” ကြောင်း ရုရှား သံရုံး က ဆိုသည်။
“ဖြစ်ပွားရတဲ့ အကြောင်းရင်းကို ချက်ချင်း စုံစမ်းစစ်ဆေးဖို့ နဲ့ ဒီဖြစ်ရပ်ရဲ့ ဆိုးကျိုး တွေ မရှိလာစေဖို့ အမြင့်ဆုံး ကြိုးပမ်းမှုတွေ လုပ်ဆောင်ရန် တရုတ် သံရုံးက ရုရှားကို တောင်းဆိုထားပါတယ်” ဟု ဖော်ပြထားသည်။ တရုတ်နိုင်ငံသားများ၏ အခွင့်အရေးများကို လေးစားလိုက်နာရန်နှင့် ထိုသို့သော ကိစ္စများ ထပ်မံမဖြစ်ပွားစေရေး အာမခံပေးရန် တရုတ်သံတမန် မစ်ရှင် က တောင်းဆိုခဲ့ကြောင်း TASS သတင်းအေဂျင်စီက ဖော်ပြသည်။
တရုတ်သံတမန်များသည် ရုရှားနိုင်ငံခြားရေးဌာန အပါအဝင် သက်ဆိုင်ရာ ရုရှားအစိုးရ အဖွဲ့များကို မေတ္တာရပ်ခံခဲ့သည်။ ရုရှားဖက်မှ အဆိုပါ ဖြစ်ရပ်ကို သီးခြားကိစ္စရပ်အဖြစ် သတ်မှတ်ပြီး တရုတ်နိုင်ငံသားများကို ခွဲခြား ဆက်ဆံခြင်း မရှိဘဲ လက်ခံရန် အဆင်သင့်ရှိကြောင်း ထုတ်ပြန်ချက်တွင် ဖော်ပြခဲ့သည်။
