၂၀၂၁ ဖေဖော်ဝါရီ ၁ ရက်နေ့မှာ စစ်ကောင်စီက တရားမဝင် အာဏာသိမ်းပြီးတဲ့ နောက်ပိုင်း စစ်ကောင်စီကို ဆန့်ကျင်တဲ့ ပြည်သူတွေကြားမှာ အကြမ်းမဖက် အာဏာဖီဆန်ရေး (CDM) ဆိုတဲ့ စကားလုံး စတင် တွင်ကျယ် ခဲ့ပြီး ဆန္ဒထုတ်ဖော်ပွဲတွေမှာ လက်သုံးချောင်းထောင် ဆန္ဒပြခဲ့တာ အများအသိ ဖြစ်ပါတယ်။
လက်သုံးချောင်းထောင်ပြီး စစ်ကောင်စီရဲ့ အာဏာကို ဖီဆန် ဆန့်ကျင်တဲ့သူတွေထဲမှာ ပထမဆုံး ထင်ထင်ရှားရှား ရှိသူကတော့ အားလုံး သိကြတဲ့ သံအမတ်ကြီး ဦးကျော်မိုးထွန်းပဲ ဖြစ်ပါတယ်။
စစ်ကောင်စီ အာဏာသိမ်းပြီးတဲ့နောက်မှာ သံအမတ်ကြီး ဦးကျော်မိုးထွန်း လက်သုံးချောင်း မထောင်ခင် ကတည်းက ရှေ့နေတွေ၊ ဆရာဝန်တွေ၊ သူနာပြုတွေ၊ ပညာရေးဝန်ထမ်းတွေ၊ မီးရထား ဝန်ထမ်းတွေ အပါအဝင် ဌာနပေါင်းစုံက အရာထမ်းနဲ့ ဝန်ထမ်းတွေဟာ အကြမ်းမဖက်အာဏာဖီဆန်ပြီး CDM လုပ်ခဲ့ကြပါတယ်။
