ယခုလအတွင်း ဦးစားပေးဆွေးနွေးမယ့်အကြောင်းအရာတွေထဲမှာ မြန်မာ့အရေးလည်း ပါဝင်တယ်လို့ ကုလသမဂ္ဂဆိုင်ရာ ဗြိတိန်သံအမတ်ကြီး Barbara Woodward က ဇူလိုင်လ ၃ ရက်နေ့က သတင်းထောက်တွေကို ပြောကြားလိုက်ပါတယ်။
ကုလသမဂ္ဂ လုံခြုံရေးကောင်စီရဲ့ ဇူလိုင်လအတွက် အလှည့်ကျဥက္ကဋ္ဌနေရာကို ဗြိတိန်နိုင်ငံက တာဝန်ယူမှာဖြစ်ပြီး၊ လတ်တလော ဖြစ်နေတဲ့ မြန်မာ၊ ဆီးရီးယား၊ ကွန်ကိုနဲ့၊ ယူကရိန်းနိုင်ငံက စစ်ရေးပဋိပက္ခတွေအတွင်း လိင်ပိုင်းဆိုင်ရာအကြမ်းဖက်ခံရမှုတွေ တိုးလာနေတာကို တွေ့ရတယ်လို့ သူကပြောပါတယ်။
မြန်မာနိုင်ငံက လူ့အခွင့်အရေးလှုပ်ရှားသူ အမျိုးသမီးတွေ၊ လိင်ပိုင်းဆိုင်ရာ အကြမ်းဖက်ခံရမှုကနေ လွတ်မြောက်လာသူတွေရဲ့ ပြောပြချက်တွေကို လုံခြုံရေးကောင်စီမှာ ကြားနာဖို့ရှိတယ်လို့လည်း ဗြိတိန်သံအမတ်ကြီးကပြောပါတယ်။
