ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းအား ( ၁၄ ) ကြိမ်မြောက် "ပြည်သူ့ဂုဏ်ရည်ဆု” ဂုဏ်ပြုချီးမြှင့်ကြောင်း ယနေ့ မေလ ၇ ရက်တွင် Citizen of Burma Award ပြည်သူ့ဂုဏ်ရည်အသင်းက ထုတ်ပြန်ထားသည်။

“နွေဦးတော်လှန်ရေး၏ စ ဦး တိုက်ပွဲဖြစ်သည့် အဓမ္မ စစ်အာဏာသိမ်းမှုကို ဆန့်ကျင်တိုက်ပွဲဝင်ခဲ့ကြကုန်သော ပြည်သူ့ဝန်ထမ်းများအား ဂုဏ်ပြုခြင်း အထိမ်းအမှတ် အဖြစ် ကမ္ဘာ့အလယ်တွင် CDMလှုပ်ရှားသူတို့အား ဦးဆောင်ကိုယ်စားပြုခဲ့သူ၊ ကမ္ဘာ့ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းအား “ပြည်သူ့ဂုဏ်ရည်ဆု” ဖြင့် ဂုဏ်ပြု ချီးမြှင့်လိုက်ကြောင်း ကြေညာအပ်ပါသည်" ဟု Citizen of Burma Award က ထုတ်ပြန်ထားသည်။

အဆိုပါ "ပြည်သူ့ဂုဏ်ရည်ဆု"သည် ၂၀၁၀ ခုနှစ်မှစတင်ကာ နှစ်စဉ် ချီးမြှင့်နေသော ဆုဖြစ်ပြီး မြန်မာ့လူ့အဖွဲ့အစည်းအတွက် ကိုယ်ကျိုးစွန့် အနစ်နာခံ ဆောင်ရွက်နေသူများအား ပြည်ပရောက်မြန်မာများစုဖွဲ့ထားသော Citizen of Burma Award ပြည်သူ့ဂုဏ်ရည်အသင်းက ပေးအပ်သောဆုဖြစ်သည်။

အမျိုးသားညီညွတ်ရေးအစိုးရ နိုင်ငံခြားရေးဝန်ကြီးဌာနကလည်း နွေဦးတော်လှန်ရေး ကာလတလျောက် မြန်မာပြည်သူတို့၏ အသံကို နိုင်ငံတကာ စင်မြင့်ထက်တွင် ထင်ဟပ်စေရန် အစွမ်းကုန် ကြိုးပမ်းဆောင်ရွက်ပေးပြီး ဖက်ဒရယ်ဒီမိုကရေစီ နိုင်ငံတော်သစ်အတွက် ကြိုးပမ်းနေကြသည့် မြန်မာပြည်သူများနှင့်အတူ ရပ်တည်ပေးခဲ့သော သံအမတ်ကြီး ဦးကျော်မိုးထွန်းအပါအဝင် ပြည်သူ့ဘက်တော်သား သူရဲကောင်းတို့ကို သမိုင်းမော်ကွန်းတင် ဂုဏ်ပြုအပ်ကြောင်း ထုတ်ပြန်ထားသည်။

ပြည်သူ့ဂုဏ်ရည်အသင်းက ပေးအပ်သော ပထမဆုံး ပြည်သူ့ဂုဏ်ရည်ဆုကို ရန်ကုန်နာရေးကူညီမှုအသင်း ဥက္ကဋ္ဌ ဦးကျော်သူ က ရရှိခဲ့ပြီး အဆိုပါဆုသည် လူမှုအကျိုးပြုလုပ်ငန်း လုပ်ကိုင်သူများနှင့် လူမှုရေးအသင်းအဖွဲ့များအားရည်ရွယ် ပေးအပ်ခဲ့ခြင်းဖြစ်သည်။

တစ်ကမ္ဘာလုံးအတိုင်းအတာဖြင့် COVID-19 ကပ်ရောဂါဖြစ်ပွားနေသော ၂၀၂၀ ခုနှစ်တွင်လည်း COVID-19 ကူးစက်ရောဂါ ကာကွယ်ထိန်းချုပ်ကုသရေးကိစ္စတွင် စွမ်းစွမ်းတမံအနစ်နာခံဆောင်ရွက်ခဲ့ကြသူများအား ဆုချီးမြှင့်ခဲ့ပြီး အမေရိကန်ဒေါ်လာ ၂၈,၅၈၂ ဒေါ်လာ၊ မြန်မာကျပ်ငွေ ၄၀၃ သိန်းကျပ်တိတိကို COVID-19 ရောဂါထိန်းချုပ်ကုသရေး အမျိုးသားအဆင့် ဗဟိုကော်မတီသို့ ပေးအပ်ချီးမြှင့်ခဲ့သည်။

ယခု (၁၄) ကြိမ်မြောက် ပြည်သူ့ဂုဏ်ရည်ဆု ချီးမြှင့်ပွဲအခမ်းအနားအား အမေရိကန်နိုင်ငံ လောစ်အိန်ဂျယ်လိစ် ဌာနခွဲမှ တာဝန်ယူကာ မေလ ၂၁ ရက် ၂၀၂၃ ခုနှစ်တွင် အမေရိကန် နိုင်ငံ Performing Arts Center of Baldwin Park, 4640 Maine Ave, Baldwin Park, CA 91706 ၌ ကျင်းပသွားမည်ဟု သိရသည်။

စာတည်း။ ။ ဖူးသိမ်ကျ

#နွေဦးတော်လှန်ရေး

#ပြည်သူ့ဂုဏ်ရည်အသင်း

#ပြည်သူ့ဂုဏ်ရည်ဆု