တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်ဝဲရစ်ကျေးရွာမှ အမျိုးသား ၂၀ ကျော်ကို စစ်ကောင်စီတပ်ဖွဲ့က ဧပြီလ ၂၄ ရက်နေ့ နံနက်ပိုင်းတွင် ဝင်ရောက်ဖမ်းဆီးသွား ကြောင်း ဒေသခံများထံမှ သိရသည်။
ဝဲရစ်ကျေးရွာအတွင်း စစ်ကြောင်းထိုးဝင်ရောက်လာသည့်စစ်ကောင်စီတပ်ဖွဲ့က လမ်းတွင်တွေ့သော ဒေသခံ အမျိုးသားများကို ဖမ်းဆီးခေါ်ဆောင်သွားခြင်းဟုဆိုသည်။
“ ဝဲရစ်ကျေးရွာက ဘုန်းကြီးကျောင်းထဲမှာ ဖမ်းဆီးထားတယ်လို့ သိရတယ်။ ဘာကြောင့် ဖမ်းဆီးတယ်ဆို တာ တိတိကျကျမသိရသေးဘူး” ဟု သရက်ချောင်းမြို့ ဒေသခံတစ်ဦးက ပြောသည်။
ဧပြီလ ၂၃ ရက်နေ့ကလည်း အဆိုပါစစ်ကောင်စီတပ်ဖွဲ့က ရငဲကျေးရွာမှ ဒေသခံ ၇၀ နီးပါးကို ဖမ်းဆီး စစ်ဆေးရိုက်နက်ပြီးပြန်လွှတ်ပေးခဲ့ကာ အမျိုးသား ၁၀ ဦးကို ထပ်မံဖမ်းဆီးခဲ့ကြောင်း ဒေသခံများ၏ ပြောဆိုချက်အရ သိရသည်။
“ မနေ့က ရငဲရွာခံတွေကို ဖမ်းဆီးတာလည်း ဒီစစ်တပ်ပါပဲ။ ဒီနေ့လည်း ထပ်ပြီးဖမ်းနေတာ”ဟု အထက်ပါ ဒေသခံက ပြောသည်။
သရက်ချောင်းမြို့နယ်ရှိ ကနက်သီရိရွာ ပိန္နဲကျွန်းဘုန်းကြီးကျောင်းတွင် (မဘသ) ဆရာတော် ဦးသီလ၏ ကျောင်း၌ စစ်ကောင်စီတပ်ဖွဲ့ကဦးဆောင်ပြီး ကျောင်းရေစက်ချပွဲပြုလုပ်နေ၍ တိုက်ပွဲဖြစ်ပွားခြင်းမရှိဘဲ အကြောင်းမဲ့ ဖမ်းဆီးစစ်ဆေးနေခြင်းဖြစ်ကြောင်း ဒေသခံများကပြောဆိုသည်။
စာတည်း ။ ။ Alden
စာမူတည်းဖြတ်။ ။စောဖေ