စစ်ကိုင်းတိုင်း၊ ယင်းမာပင်မြို့နှင့်ဆားလင်းကြီးမြို့နယ်တို့ရှိ စစ်ကောင်စီတပ်စခန်းများကို တော်လှန်ရေးနေ့ အထိမ်းအမှတ်အဖြစ် မတ်လ ၂၇ ရက်နေ့ကတိုက်ခိုက်ခဲ့ကြောင်း ကာကွယ်ရေး တပ်ဖွဲ့များမှ ပြောသည်။
ယင်းမာပင်မြို့နှင့် ဆားလင်းကြီးမြို့တို့တွင် အဖွဲ့ သုံးဖွဲ့ခွဲကာ တိုက်ခိုက်ခဲ့ခြင်းဖြစ်ပြီး အဖွဲ့ (၁) အနေဖြင့် မတ်လ ၂၇ ရက်၊ နံနက် ၂ နာရီခွဲတွင် ယင်းမာပင်မြို့သစ်တောရုံးဝန်းနှင့် မြို့အဝင်မှ စစ်ကောင်စီဂိတ်များကို ၈၀ မမ ဖြင့်ပစ်ခတ်ခဲ့ကြောင်းဆိုသည်။
အဆိုပါတိုက်ခိုက်မှုကို နယ်ခံ ပ.က.ဖ များနှင့်ပူးပေါင်းဖော်ဆောင်ခဲ့ခြင်းဖြစ်ပြီး လက်နက်ကြီးကျည်ကြောင့် စစ်သားအချို့သေဆုံးနိုင်ချေရှိသည်ဟု Salingyi Special Task Force - SSTF တာဝန်ရှိသူက ပြောသည်။
ဒေသခံကာကွယ်ရေးတပ်အဖွဲ့ (၂) အနေ့ဖြင့် ယင်းနေ့၊ မွန်းလွဲပိုင်း၌ ဆားလင်းကြီးမြို့ရှိ ရွှေမုဋ္ဌောကျောင်းအနီးနှင့် ရဲစခန်းတို့အား စစ်ကောင်စီတပ်သားများတန်းစီနေစဉ် ၆၀ မမ ကွန်မန်ဒိုစိန်ပြောင်းဖြင့်ပစ်ခတ်ခဲ့၍ တပ်သား နှစ်ဦးသေနိုင်ကြောင်းဆိုသည်။
ထို့အတူ အဖွဲ့ (၃) အနေဖြင့် ယင်းနေ့ ညနေ ၃ နာရီခွဲခန့်တွင် ယင်းမာပင်မြို့ရဲစခန်းနှင့် ဝါတိုက်ရုံးတို့ကို ဒရုန်းများအသုံးပြုတိုက်ခိုက်ခဲ့ပြီး စစ်သားနှင့်ရဲ ခုနစ်ဦးထိခိုက်ကာ ငါးဦး သေဆုံးနိုင်ကြောင်း ဆိုပြန်သည်။
မတ်လ ၂၇ ရက်နေ့ တိုက်ခိုက်မှုများအား Shar Htoo Waw နည်းပညာအဖွဲ့၊ စစ်ကိုင်းခရိုင် တပ်ရင်း -(၄ )MSPDF အညာသား ပြောက်ကျားတပ်ဖွဲ့၊ Phoenix အထူးပြောက်ကျားတပ်ဖွဲ့၊ Salingyi Special Task Force - SSTF တပ်ခွဲ "SPACE MAN" Drone အဖွဲ့၊ မြောက်ယမားအဖွဲ့ တို့ ပူးပေါင်းကာ လုပ်ဆောင်ခဲ့ကြောင်းသက်ဆိုင်ရာအဖွဲ့များမှသိရသည်။
စာတည်း ။ ။ Alden
စာမူတည်းဖြတ်။ ။သန့်ဇော်(သန်လျင်)
