ကချင်ပြည်နယ်၊ ဖားကန့်မြို့နယ်မှာ အခုနှစ်ဆန်းပိုင်းကစလို့ စစ်ကောင်စီက အရပ်သား ပြည်သူတွေကို ဖမ်းဆီးထိန်းသိမ်းမှု ပိုမိုလုပ်ဆောင်လာနေတယ်လို့ ဒေသခံတွေက မဇ္ဈိမကို ပြောပါတယ်။
အခု ဒီရက်ပိုင်းအတွင်း ဖားကန့်မှာ ဖမ်းဆီးခံရတဲ့ အရပ်သားပြည်သူက အယောက် ၃၀ ကျော် ရှိလာနေတယ်လို့ ဒေသခံတွေက ဆိုပါတယ်။
ပြီးခဲ့တဲ့ မတ်လ ၆ ရက်နေ့ ည ၆ နာရီကျော်လောက်က အိမ်စီးကားတွေနဲ့ အရပ်ဝတ် ဝတ်ဆင်ကာ လက်နက်ကိုင်ဆောင်ထားတဲ့ လူတစ်စုဟာ လုံးခင်းရပ်ကွက်ကို ဝင်ရောက်လာပြီး လူငယ်အယောက် ၃၀ လောက်ကို ဖမ်းဆီးခေါ်ဆောင်သွားတာ ဖြစ်ပါတယ်။
စစ်တပ်အာဏာသိမ်းပြီးနောက် နှစ်နှစ်နီးပါးကြာ အင်တာနက် ဖြတ်တောက်ခံခဲ့ရတဲ့ ဖားကန့်ဒေသမှာ အခုလို အသက် ၂၀ ကနေ ၃၀ ကြား လူငယ်တွေ အများစု ဖမ်းဆီးထိန်းသိမ်းခံနေရတာပါ။
