အာဏာသိမ်းပြီးနောက် ၂၀၂၁ ခုနှစ် ဖေဖော်ဝါရီလ ၁ ရက်မှစ၍ ကျန်းမာရေးဝန်ထမ်း ၇၀ ဦးခန့် သတ်ဖြတ်ခံရကြောင်း အမျိုးသားညီညွတ်ရေးအစိုးရ (NUG) က မတ်လ ၁ ရက်နေ့ ရက်စွဲဖြင့် ထုတ်ပြန်ထားသည်။
ထို့အပြင် ကျန်းမာရေးဝန်ထမ်း ၉၀၀ ဦးခန့် ဖမ်းဆီးခံခဲ့ရပြီး ၊ ၇၈၀ ဦး ကျော် ထိခိုက်ဒဏ်ရာရခဲ့ကာ၊ ဆေးရုံ ဆေးခန်းပေါင်း ၁၆၀ ကျော် ဖျက်ဆီးခံခဲ့ရကြောင်း ဆိုသည်။
၂၀၂၃ ခုနှစ် ဇန်နဝါရီလနှင့် ဖေဖော်ဝါရီလ နှစ်လအတွင်း ကျန်းမာရေးကဏ္ဍဆိုင်ရာ အဆောက်အဦများအပေါ် လေကြောင်းတိုက်ခိုက်မှုများနှင့်ကျန်းမာရေးဝန်ထမ်းများအား ဖမ်းဆီးသတ်ဖြတ်ခြင်းများကို စစ်ကောင်စီက ဆက်တိုက်ကျူးလွန်ခဲ့ကြောင်း အဆိုပါဖြစ်စဥ်များနှင့်အတူ ထုတ်ပြန်ချက်တွင် ဖော်ပြထားသည်။
အကြမ်းဖက်စစ်ကောင်စီက ဇန်နဝါရီလ ၁၀ရက်နေ့နှင့် ၁၁ရက်နေ့ ချင်းအမျိုးသားတပ်ဦး (CNF) ဌာနချုပ် တည်ရှိရာ Camp Victoria စခန်းအား လေကြောင်းတိုက်ခိုက်မှု ပြုလုပ်ခဲ့ခြင်းကြောင့် ချင်းအမျိုးသားတပ်ဦးမှ ရဲမေ နှစ်ဦးနှင့် ရဲဘော် သုံးဦး ကျဆုံးခဲ့ရပြီး ပြင်ပလူနာကုသဆောင်၊ ဆေးစတိုနှင့် လူနေအိမ်များ ပျက်စီးဆုံးရှုံးခဲ့သည့်ဖြစ်စဉ် အပါအဝင် အခြားဖြစ်စဉ် ခြောက်ခုကိုလည်း ဖော်ပြထားသည်။
" NUG က ထုတ်ပြန်တဲ့အချက်အလက်တွေထက် တကယ့်မြေပြင်မှာ ဒီထက်ပိုဆိုးတဲ့ သတ်ဖြတ်မှုတွေအပြင် စာရင်းထဲမပါဘဲ သတ်ဖြတ်ခံရတာ၊ ဖမ်းဆီးခံရတာတွေလည်းရှိတယ်" ဟု ရှမ်းပြည်နယ်တောင်ပိုင်းရှိ၊ တော်လှန်ရေးရဲဘော်တစ်ဦးက မှတ်ချက်ပြုပြောဆိုသည်။
တစ်ဖက်တွင်လည်း အစိုးရဝန်ထမ်းများ၊ အုပ်ချုပ်ရေးမှူးများနှင့် အရပ်သားအပါအဝင် စုစုပေါင်း သေဆုံးသူ ၅,၀၀၀ ကျော်နှင့် ဒဏ်ရာရရှိသူ ၄,၀၀၀ ကျော် ရှိခဲ့ကြောင်း အကြမ်းဖက်စစ်ကောင်စီ၏ ကာလုံအစည်းအဝေးမှတ်တမ်းတွင် ဖော်ပြထားလေသည်။
စာတည်း ။ ။ ဖူးသိမ်ကျ
စာမူတည်းဖြတ်။ ။ သန့်ဇော်(သန်လျင်)
