တရုတ်သည် အမေရိကန်ကုမ္ပဏီများအား နောက်ဆုံး ပိတ်ဆို့အရေးယူမှုအဖြစ် Lockheed Martin ကုမ္ပဏီနှင့် Raytheon Technologies ၏ ကုမ္ပဏီခွဲတစ်ခုတို့အား ထိုင်ဝမ်သို့ လက်နက်များရောင်းချမှုနှင့်ပတ်သက်၍ အမည်ပျက်စာရင်းသွင်းကာ တရုတ်နိုင်ငံနှင့် ၎င်းကုမ္ပဏီများအကြား တင်သွင်းမှုနှင့်တင်ပို့မှုများကို ဖေဖော်ဝါရီလ ၁၆ ရက်နေ့မှစကာ ပိတ်ပင်လိုက်သည်။
အမေရိကန်စစ်တပ်က တရုတ်သူလျှိုမိုးပျံပူဖောင်းအား ပစ်ချပြီးနောက် ဆက်ဆံရေးတင်းမာမှု မြင့်တက်နေချိန် တရုတ်က အချုပ်အခြာအာဏာနှင့် လုံခြုံရေးကို ထိခိုက်စေသည့် သက်ဆိုင်ရာ အမေရိကန်အဖွဲ့အစည်းများကို တန်ပြန်စီမံချက်များလုပ်ဆောင်မည်ဟု သတိပေးပြီးနောက် ၁ ရက်အကြာတွင် ယခုကဲ့သို့ ဒဏ်ခတ်ပိတ်ဆို့မှုများ ပြုလုပ်လာခြင်းဖြစ်သည်။
Lockheed Martin Corp နှင့် Raytheon Technologies Corp ၏ လက်အောက်ခံ Raytheon Missile and Defence Corp တို့ကို တရုတ်နိုင်ငံနှင့် ဆက်စပ်သော သွင်းကုန်နှင့် ပို့ကုန်လုပ်ငန်းများတွင် ပါဝင်ပတ်သက်ခြင်းမှ တားမြစ်ကြောင်း တရုတ်ကူးသန်းရောင်းဝယ်ရေးဝန်ကြီးဌာန၏ထုတ်ပြန်ချက်တွင် ဖော်ပြထားသည်။
“ဒါတွေက မလိုလားအပ်တဲ့ လုပ်ဆောင်ချက်တွေဖြစ်တယ်လို့ မိမိတို့ ရှုမြင်သုံးသပ်ပါတယ်” ဟု အိမ်ဖြူတော်ပြန်ကြားရေးတာဝန်ခံ ကရင်းဂျောန်ပီရာက ဖေဖော်ဝါရီလ ၁၆ ရက်နေ့တွင် သတင်းထောက်များအား ပြောကြားခဲ့သည်။
Raytheon Technologies သည် Pratt & Whitney လေယာဉ်အင်ဂျင်များအပြင် လေယာဉ်ဘီးအုံနှင့် ထိန်းချုပ်မှုစနစ်ပစ္စည်းများကို တရုတ်နိုင်ငံ၏ လေကြောင်းလုပ်ငန်းသို့ ရောင်းချသည်။
“ကုမ္ပဏီအနေဖြင့် နိုင်ငံခြား အစိုးရအဖွဲ့များနှင့် စီးပွားရေးလုပ်ဆောင်ရာတွင် အမေရိကန်အစိုးရ၏ မူဝါဒအတိုင်း လုပ်ဆောင်သည်” ဟု နိုင်ငံပေါင်း ၇၀ ကျော်သို့ တင်ပို့ရောင်းချနေသည့် Lockheed ကုမ္ပဏီက ဆိုသည်။
အမေရိကန်ကုမ္ပဏီ Lockheed သည် တောင်ကယ်ရိုလိုင်းနားကမ်းလွန်တွင် တရုတ်သူလျှိုပူဖောင်းကို ပစ်ချခဲ့သည့် F-22 Raptor တိုက်လေယာဉ်ကို ထုတ်လုပ်သူဖြစ်ပြီး Raytheon မှ ထုတ်လုပ်သော AIM-9X Sidewinder ဒုံးကျည်ကို အသုံးပြုခဲ့သည်။
ကုမ္ပဏီများအား တရုတ်နိုင်ငံတွင် နောက်ထပ် ရင်းနှီးမြှုပ်နှံမှုများ မလုပ်ဆောင်ရန် တားမြစ်လိုက်ပြီး အဆင့်မြင့်အရာရှိများကို နိုင်ငံတွင်း ဝင်ရောက်ခွင့်ကို ပိတ်ပင်လိုက်သည်။ တရုတ်တွင်ရှိသော ၎င်းကုမ္ပဏီဝန်ထမ်းများ၏ အမြဲနေထိုင်ခွင့်ကိုလည်း ဖျက်သိမ်းခဲ့သလို ထိုင်ဝမ်သို့ စာချုပ်ပါ လက်နက်ရောင်းချမှုပမာဏ၏ တန်ဖိုး ၂ ဆ ဖြစ်သော ဒဏ်ငွေကိုလည်း သတ်မှတ်ခဲ့သည်။
ကိုယ်ပိုင်အုပ်ချုပ်ခွင့်ရ ထိုင်ဝမ်သို့ ဒေါ်လာသန်း ၁၀၀ ကျော်တန်ဖိုးရှိ လက်နက်ရောင်းချမှုနှင့်ပတ်သက်ပြီး တရုတ်နိုင်ငံက အဆိုပါကုမ္ပဏီ ၂ ခုအား ပိတ်ဆို့အရေးယူလိုက်ခြင်းဖြစ်သည်။
အမေရိကန်သည် တရုတ်သို့ လက်နက်ရောင်းချခြင်း မရှိပေ။ သို့သော် အမေရိကန်သည် ထိုင်ဝမ်ကို ကိုယ်ပိုင်ခုခံကာကွယ်ရေး နည်းလမ်းများထောက်ပံ့ရေးဟူသော ၁၉၇၉ ခုနှစ် ထိုင်ဝမ်ဆက်ဆံရေး အက်ဥပဒေအရ လုပ်ဆောင်ခြင်းဖြစ်ကာ ထိုင်ဝမ်အတွက် အမေရိကန်လက်နက်ရောင်းချမှုသည် တရုတ်ကို အမြဲ စိတ်ဆိုးဒေါသထွက်စေခဲ့သည်။