ဝီဂါအဓမ္မလုပ်အားပေးခိုင်းစေမှုဖြင့် ထုတ်လုပ်သည့် ကုန်ပစ္စည်းများကို ပိတ်ဆို့ရန် ရည်ရွယ်သော မကြာသေးမီက ထုတ်ပြန်ခဲ့သည့် ဝီဂါများအားအတင်းအဓမ္မစေခိုင်းမှုကာကွယ်ရေးအက်ဥပဒေအရ အမေရိကန်အကောက်ခွန်နှင့် နယ်စပ်ကာကွယ်ရေးဌာန(CBP) သည် တရုတ်နိုင်ငံ ရှင်ကျန်းဒေသမှ သွင်းကုန်များကို စိစစ်လျက်ရှိသည်။
သွင်းကုန်အများစုတွင် ဆိုလာပြားများနှင့် ဆက်စပ်အစိတ်အပိုင်းများ တင်ပို့မှုက အများဆုံးဖြစ်ကြောင်း Fox Business က ဖော်ပြခဲ့သည်။
"ဇွန် ၂၀၂၂ ခုနှစ်မှ ၂၀၂၃ ခုနှစ် ဇန်နဝါရီလအတွင်း တင်ပို့မှု ၂၆၉၂ ကြိမ်သည် ဝီဂါများအား အတင်းအဓမ္မစေခိုင်းမှုတားဆီးရေးအက်ဥပဒေပါ စည်းကမ်းချက်များကို ချိုးဖောက်နိုင်ဖွယ်ကြောင်း CBP ၏ ပြောရေးဆိုခွင့်ရှိသူက FOX Business သို့ ပြောကြားခဲ့သည်။
“ဒီတင်ပို့မှုတွေက အမေရိကန်ဒေါ်လာ ၈၁၇ သန်းကျော်ဖိုးရှိပါတယ်” ဟု ပြောရေးဆိုခွင့်ရှိသူက ထပ်လောင်း ပြောကြားခဲ့သည်။
ဝီဂါအဓမ္မလုပ်အားပေးစေခိုင်းမှုတားဆီးရေးအက်ဥပေဒ (UFLPA) ကို ကွန်ဂရက်လွှတ်တော် ၂ ရပ်လုံးတွင် ပါတီ ၂ ခုလုံး၏ ထောက်ခံမှုဖြင့် အတည်ပြုပြီးနောက် သမ္မတဘိုင်ဒင်က ၂၀၂၁ ခုနှစ် ဒီဇင်ဘာလတွင် လက်မှတ်ထိုးခဲ့ကာ ၂၀၂၂ ခုနှစ် ဇွန်လတွင် ဥပဒေအဖြစ် စတင်အသက်ဝင်လာခဲ့သည်။
UFLPA စတင်အသက်ဝင်လာပြီးနောက် CBP မှ စစ်ဆေးသော တင်ပို့ကုန်ပစ္စည်းများ၏ ထက်ဝက်နီးပါးသည် ဆိုလာပြားများနှင့် နေရောင်ခြည်စွမ်းအင်လုပ်ငန်းတွင် အသုံးပြုသည့် ဆက်စပ်အစိတ်အပိုင်းများဖြစ်ကြောင်း Fox Business သတင်းတွင် ဖော်ပြထားသည်။
စစ်ဆေးရန် ထိန်းသိမ်းထားသော ကုန်ပစ္စည်း ၆ ပုံ ၁ ပုံခန့်မှာ အဝတ်အထည်များဖြစ်သည်။ တင်ပို့မှု၏ ၃ ပုံ ၁ ပုံခန့်ကို စစ်ဆေးပြီးနောက် ခွင့်ပြုခဲ့သည်။
တရုတ်နိုင်ငံ ရှင်ကျန်းပြည်နယ်ရှိ ဝီဂါစခန်းအများအပြားကို တရားဝင်အကျဉ်းထောင်အဖြစ် ပြောင်းလဲခဲ့ပြီး အကျဉ်းသားများကို နှစ်ရှည်ထောင်ဒဏ်များ ချမှတ်ခဲ့ကြောင်း အမေရိကန်အခြေစိုက် နိုင်ငံခြားရေးရာမဂ္ဂဇင်းက မကြာသေးမီက ဖော်ပြခဲ့သည်။
