အိန္ဒိယနိုင်ငံ ပန်ဂျပ်ပြည်နယ် ဖာဇီလ်ခါခရိုင် မွမ်ဘိခိရွာအနီးရှိ အိန္ဒိယနှင့် ပါကစ္စတန်နယ်စပ်တွင် ဖေဖော်ဝါရီလ ၁ ရက်နေ့ အစောပိုင်းက သံသယဖြစ်ဖွယ် မောင်းသူမဲ့ ဒရုန်းတစ်စင်းလှုပ်ရှားမှုကို နယ်ခြားစောင့် တပ်ဖွဲ့ဝင်များက သံသယရှိသဖြင့် ပစ်ခတ်ခဲ့ရာ ဘိန်းဖြူ ၂ ဒသမ ၆၂၂ ကီလိုဂရမ်ကို သိမ်းဆည်းရမိခဲ့သည်။
နယ်စပ်တွင် တပ်စွဲထားသော နယ်ခြားလုံခြုံရေးတပ်ဖွဲ့ (BSF) သည် ၂၀၂၃ ခုနှစ် ဖေဖော်ဝါရီလ ၁ ရက် ညပိုင်းက ပါကစ္စတန် နယ်စပ်ဒေသ ဖာဇီလ်ခါနှင့်မွမ်ဘိခိကျေးရွာများကို ဖြတ်သန်း၍ အိန္ဒိယပိုင်နက်အတွင်းသို့ ဝင်ရောက်လာသည့် မီးနီလင်းနေသော သံသယဖြစ်ဖွယ်ဒရုန်းတစ်စင်းကို မြင်တွေ့ခဲ့ရသည်။
တပ်ဖွဲ့ဝင်များသည် ဒရုန်းကို ပစ်ချခဲ့ကာ နယ်မြေတစ်ခုလုံး ပိတ်ဆို့ပြီး ရဲတပ်ဖွဲ့နှင့် သက်ဆိုင်ရာ တာဝန်ရှိသူများထံ အကြောင်းကြားခဲ့သည်။
ထို့ပြင် နယ်ခြားစောင့်တပ်ဖွဲ့ဝင်များသည် နယ်မြေရှင်းလင်းမှုအတွင်း အလေးချိန် ၂ ဒသမ ၆၂၂ ကီလိုဂရမ်ရှိ ဘိန်းဖြူဟု ယူဆရသည့် မှောင်ခိုပစ္စည်း ၃ ထုပ်ကို မီးအချက်ပြကိရိယာ ၁ ခုနှင့်အတူ မွမ်ဘိခိ ရွာအနီး ဂျုံစိုက်ကွင်း အတွင်းမှ သိမ်းဆည်းရမိခဲ့သည်။
အလားတူ ကဘူးလ်ရှားကျေးရွာအနီး ပတ်ဝန်းကျင်တွင် ရှာဖွေမှုလုပ်ဆောင်ရာ BSF တပ်ဖွဲ့ဝင်များသည် ၂ ဒသမ ၆၁၂ ကီလိုဂရမ် အလေးချိန်ရှိသည့် ဘိန်းဖြူဟု ယူဆရသော နောက်ထပ် မှောင်ခိုပစ္စည်း အထုပ် ၃ ထုပ်ကို မီးအချက်ပြ ကိရိယာနှင့် အတူ ဂျုံစိုက်ခင်းတွင်းမှ သိမ်းဆည်းရမိခဲ့သည်။
သိမ်းဆည်းရမိသော မူးယစ်ဆေးဝါး မှာ စုစုပေါင်းအလေးချိန် ၅ ဒသမ ၂၃၄ ကီလိုဂရမ်နှင့် မီးအချက်ပြ ကိရိယာ (Blinker) ၂ ခုဖြစ်ပြီး ၎င်း စက် ၂ ခုလုံးတွင် ဘက်ထရီ ၁ လုံးစီ ပါရှိသည်။
မူးယစ်ဆေးဝါးထိန်းချုပ်ရေးဗျူရို (NCB) သည် ဇန်နဝါရီလ ၂၁ ရက်နေ့က ပန်ဂျပ်ပြည်နယ် လူဒီယာနာမှ နိုင်ငံတကာသို့ မူးယစ်ဆေးဝါး မှောင်ခိုဖြန့်ဖြူး ရောင်းချခြင်းကို ဦးဆောင်လှုပ်ရှားနေသည့် အမျိုးသား ၁ ဦးကို ဖမ်းဆီးခဲ့ပြီး ၎င်းပိုင်ဆိုင်သော အရက်ဆိုင် ၅၃ ခုနှင့် ဆိုင်ခွဲ ၁၃ ခုကို ဖမ်းဆီးခဲ့သည်။
ဘိန်းဖြူ ၃၄ ၄၆၆ ကီလို၊ မော်ဖင်း ၅ ၄၇၀ ကီလို၊ ဘိန်း ၅၅၇ ဂရမ်နှင့် မူးယစ်ဆေးဝါးမှုန့် ၂၃ ၆၄၅ ကီလိုတို့ကို သိမ်းဆည်းရမိခဲ့ပြီး လူ ၁၆ ဦးကို ဖမ်းဆီးရမိခဲ့ကြောင်း NCB မှ ထုတ်ပြန်ထားသည်။
ပန်ဂျပ်ရဲတပ်ဖွဲ့သည် ဇန်နဝါရီလ အစောပိုင်းက မူးယစ်ဆေးဝါးဂိုဏ်းကြီးကို ဖြိုခွင်းရာတွင် မူးယစ်ဆေးဝါး မှောင်ခိုရောင်းချသူ ၂၅၈ ဦးကို ဖမ်းဆီးခဲ့ပြီး ၁ ပတ်အတွင်း ရူပီး ၂၀ ဒသမ ၅ သိန်းတန်ဖိုးရှိ မူးယစ်ဆေးဝါး ကီလိုဂရမ် ၁၀၀ ကျော်ကို သိမ်းဆည်းရမိခဲ့သည်။
တာဝန်ရှိသူများက မူးယစ်ဆေးဝါး မှောင်ခိုရောင်းချသူ ၂၅၈ ဦးကို ဖမ်းဆီးခဲ့ပြီး မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ အက်ဥပဒေ (NDPS) အရ အမှုအစီရင်ခံစာ ၁၉၄ ခုကို မှတ်ပုံတင်သွင်းအရေးယူထားကြောင်း ဇန်နဝါရီ ၁၆ ရက်က သတင်းထုတ်ပြန်ခဲ့သည်။
