ဇန်နဝါရီလ ၂၈ ရက်
မန္တလေးမြို့၊ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်တွင် ဇန်နဝါရီလ ၂၇ ရက် နေ့ညက စစ်ကောင်စီခန့် ရာအိမ်မှူးတစ်ဦး သေနတ်ဖြင့်ပစ်သတ်ခံလိုက်ရကြောင်း သတင်းရရှိသည်။
"ဧည့်စာရင်းတိုင်ချင်လို့ဆိုပြီး လူလေးယောက်၀င်လာတယ်၊ ရာအိမ်မှူး အိမ်ထဲကထွက်လာတော့ သေနတ်နဲ့ ပစ်သတ်သွားတာ” ဟု ဒေသခံတစ်ဦးက ပြောသည်။
သေနတ်ဖြင့်ပစ်သတ်ခံရသူမှာ သင်ပန်းကုန်းရပ်ကွက်၊ အကွက်အမှတ် ညည/၄၀၊ ၅၅(အေ)လမ်းနှင့် ၁၁၇ လမ်းထောင့် မန္တလေး-လားရှိုးမီးရထားလမ်းအနီးနေထိုင်သူ စစ်ကောင်စီခန့် ရာအိမ်မှူးဦးခင်မောင်ငြိမ်း (အသက် ၆၆ နှစ်)ဆိုသူဖြစ်ပြီး၊ ၎င်းအား ဇန်နဝါရီ ၂၇ ရက် ညနေ ၆ နာရီခွဲခန့်တွင် ဒေသကာကွယ်ရေး ပြောက်ကျားတပ်ဖွဲ့တစ်ခုက နေအိမ်ထဲအထိ ၀င်ရောက်ပစ်ခတ်သတ်ဖြတ်သွားခြင်းဖြစ်ကြောင်းသိရ သည်။
သေနတ်ဖြင့်ပစ်ခတ်ခံရမှုကြောင့် ဦးခင်မောင်ငြိမ်းတွင် ဝဲနှုတ်ခမ်းအောက်မှပါးစပ်အတွင်းသို့ ဖောက်၀င် ဒဏ်ရာတစ်ချက်နှင့် ယာခါးဖောက်၀င် ဒဏ်ရာတစ်ချက်တို့ရရှိပြီး၊ မန္တလေးပြည်သူ့ဆေးရုံကြီးသို့ ပို့ဆောင် စဉ် သေဆုံးသွားခြင်းဖြစ်ကြောင်း စစ်အုပ်စုသတင်းရပ်ကွက်မှသိရသည်။
အဆိုပါတိုက်ခိုက်မှုနှင့်ပတ်သက်၍ ဒေသအခြေစိုက်ပြည်သူ့ကာကွယ်ရေးတပ်ဖွဲ့တစ်ခုဖြစ်သော AST-MDY အောင်စည်တော်စစ်ဆင်ရေးက ၎င်းတို့လက်ချက်ဖြစ်ကြောင်း ယနေ့ ဇန်နဝါရီလ ၂၈ ရက်နေ့တွင် သတင်းထုတ်ပြန်လာသည်။
“အုပ်ကြီးမှာ ၎င်း၏နေအိမ်ရှေ့တွင် နှုတ်ခမ်းနီဒဏ်ရာဖြင့်သေဆုံးသွားပြီး၊ ကျွန်ုပ်တို့ အောင်စည်တော် စစ်ဆင်ရေးအဖွဲ့သားများ အန္တရာယ်ကင်းစွာဆုတ်ခွာနိုင်ခဲ့သည်”ဟု ထုတ်ပြန်ချက်တွင်ဖော်ပြသည်။
မန္တလေးမြို့တွင် ပြီးခဲ့သည့်ဇန်နဝါရီလ ၁၅ ရက်နေ့ကလည်း မဟာအောင်မြေမြို့နယ် ဗောဓိကုန်းရပ်ကွက် မှ အုပ်ချုပ်ရေးမှူးတစ်ဦး နေအိမ်အတွင်းသေနတ်ဖြင့် ပစ်သတ်ခံခဲ့ရသည်။
စာတည်း။ ။စောဖေ
စာမူတည်းဖြတ်။ ။စောဖေ