တရုတ်နိုင်ငံအနေဖြင့် ကူးစက်ရောဂါဆိုင်ရာအချက်အလက်များကို တိတိကျကျနှင့် အချိန်နှင့် တစ်ပြေးညီတင်ပြရန် ကမ္ဘာ့ကျန်းမာရေးအဖွဲ့(WHO)အကြီးအကဲ တက်ဒရော့စ်အက်ဒါနွမ်ဂေဘရေယဲဆွတ်က တရုတ်တာဝန်ရှိသူများနှင့် တွေ့ဆုံစဉ် ထပ်မံတောင်းဆိုခဲ့ကြောင်း WHO ဝက်ဘ်ဆိုက်ထုတ်ပြန်ချက်တွင် ဖော်ပြထားသည်။
ဗိုင်းရပ်စ်ဗီဇဆိုင်ရာအချက်အလက်၊ ဆေးရုံတက်ကုသသူဦးရေ၊ အထူးကြပ်မတ်ကုသဆောင် (ICU) ၌ ရှိသူဦးရေနှင့် သေဆုံးမှုများအပါအဝင် ရောဂါသက်ရောက်မှုဆိုင်ရာအချက်အလက်များ၊ ကာကွယ်ဆေးများဖြန့်ဖြူးခြင်းနှင့် အထူးသဖြင့် ရောဂါအခံရှိသူများနှင့် အသက် ၆၀ ကျော်သူများအား ကာကွယ်ဆေးထိုးပေးမှုအခြေအနေများကို အဆင့်မြင့်အရာရှိများအစည်းအဝေးတွင် WHO က တောင်းဆိုခဲ့သည်။
ပြင်းထန်သောရောဂါကို ကာကွယ်ရန်နှင့် အသက်အန္တရာယ်စိုးရိမ်ရသူများ မသေဆုံးစေရေးအတွက် ကာကွယ်ဆေးထိုးခြင်းနှင့် အားဖြည့်ဆေးထိုးခြင်း၏ အရေးပါပုံကိုလည်း WHO က ထပ်လောင်းပြောကြားခဲ့သည်။
ကူးစက်ရောဂါပျံ့နှံ့မှုနှင့် ကာကွယ်မှုဆိုင်ရာပညာရပ်၊ ဗီဇမျိုးကွဲများကို စောင့်ကြည့်ခြင်း၊ ကာကွယ်ဆေး ထိုးခြင်း၊ ကုသခြင်း၊ ဆက်သွယ်ရေးနှင့် သုတေသနနှင့်ဖွံ့ဖြိုးတိုးတက်မှုကဏ္ဍများတွင် တရုတ်၏ ပြောင်းလဲလာသော မဟာဗျူဟာနှင့် လုပ်ဆောင်ချက်များအကြောင်းကို တရုတ်အမျိုးသားကျန်းမာရေးကော်မရှင်နှင့် နိုင်ငံရောဂါထိန်းချုပ်ရေးနှင့် ကာကွယ်ရေးစီမံကွပ်ကဲမှုအဖွဲ့တို့က WHO အား ရှင်းလင်းတင်ပြခဲ့သည်။
WHO က ဆေးဘက်ဆိုင်ရာစီမံခန့်ခွဲမှုနှင့် သက်ရောက်မှုအကဲဖြတ်ချက်များ ပိုမိုကောင်းမွန်အောင်ဆောင်ရွက်ရန် တရုတ်ကို တိုက်တွန်းခဲ့ပြီး နှောင့်နှေးကြန့်ကြာမှုများမရှိစေရေးအတွက် ယင်းကဏ္ဍများနှင့် ကာကွယ်ဆေးထိုးမှုဆိုင်ရာ ဆက်သွယ်ရေးကိစ္စရပ်များတွင် ကူညီပံ့ပိုးပေးရန် ဆန္ဒရှိကြောင်း ပြောကြားခဲ့သည်။
ဆေးဘက်ဆိုင်ရာစီမံခန့်ခွဲမှုအပါအဝင် ကိုဗစ်-၁၉ ကျွမ်းကျင်သူကွန်ရက်များတွင် ပိုမိုနီးကပ်စွာပါဝင်ရန် တရုတ် သိပ္ပံပညာရှင်များကို WHO က ဖိတ်ခေါ်ခဲ့သည်။
" တရုတ်နှင့် ကမ္ဘာ့အသိုက်အဝန်းအား အကူအညီပေးရေးအတွက် တိကျသောအန္တရာယ်အကဲဖြတ်မှုများပြု လုပ်ရန်နှင့် ထိရောက်သော တုံ့ပြန်မှုများကို အသိပေးရန် စောင့်ကြည့်ခြင်းနှင့် အချက်အလက်များ အချိန်မီ ထုတ်ပြန်ရေးသည် အရေးကြီးကြောင်း WHO က အလေးပေးပြောကြားခဲ့သည်" ဟု ထုတ်ပြန်ချက်တွင် ဖော်ပြထားသည်။
