ပါကစ္စတန်နိုင်ငံတွင် နှစ်သစ်ကူးပွဲတော်ကျင်းပချိန်၌ အောင်ပွဲခံ သေနတ်ပစ်ခတ်မှုအတွင်း ကျည်ထိမှန်မှုကြောင့် လူ ၂၂ ဦး ထက်မနည်း ထိခိုက်ဒဏ်ရာရခဲ့ကြောင်း Geo News က ဖော်ပြသည်။
ကရာချိမြို့နေရာအနှံ့အပြားတွင် သေနတ်မိုးပေါ်ထောင် ပစ်ခတ်မှုကြောင့် ကလေး ၁ ဦးနှင့် အမျိုးသမီး များအပါအဝင် လူအမြောက်အများ ထိခိုက်ဒဏ်ရာရခဲ့သည်။
လက်နက်များကိုင်ဆောင်ခြင်းကို တားမြစ်ထားသော်လည်း ၂၀၂၃ နှစ်သစ်သို့ ရောက်ရှိခြင်းအထိမ်းအမှတ် ည ၁၂ နာရီထိုးချိန်တွင် ဆိပ်ကမ်းမြို့တော် ကရာချိ၌ တရစပ် သေနတ်ပစ်ခတ်သံများ ထွက်ပေါ်ခဲ့ခြင်းဖြစ်သည်။
ထိခိုက်ဒဏ်ရာရသူ ၈ ဦးအား ပြည်သူ့ဆေးရုံသို့လည်းကောင်း ၊ တခြား ၄ ဦးအား ဂျင်းနာ့ဟ်ဆေးရုံသို့ လည်းကောင်း၊ အမျိုးသမီးများနှင့် ကလေးငယ်များ အပါအဝင် ဒဏ်ရာရသူ ၁၀ ဦးကို အက်ဘာစီရှာဟိဒ်ဆေးရုံသို့ လည်းကောင်း အသီးသီးပို့ဆောင်ခဲ့ရသည်ဟု ဆေးရုံသတင်းရင်းမြစ်များက ပြောသည်။
စုစုပေါင်း လူ ၂၂ ဦး ထိခိုက်ဒဏ်ရာရခဲ့ကြောင်း ကယ်ဆယ်ရေးအရင်းအမြစ်များထံမှ သိရှိရကြောင်း Geo News က ဖော်ပြခဲ့သည်။
ထို့ပြင် ရဲတပ်ဖွဲ့သည် ကိုရန်ဂျီမြို့တွင် မိုးပေါ်သေနတ်ထောင်ပစ်သူ ၃ ဦးကိုလည်း ဖမ်းဆီးခဲ့ပြီး အသက်အန္တရာယ်ပြုရန်ကြိုးပမ်းအားထုတ်မှုဖြင့် တရားစွဲဆိုခဲ့သည်။
ဥပဒေစိုးမိုးရေးအဖွဲ့များသည် မြို့အတွင်း၌ လူဆိုး ၁၀ ဦးကျော်ကိုလည်း ဖမ်းဆီးခဲ့သည်။