မဇ္စျိမ။ ။ကာကွယ်ရေးဝန်ကြီးဌာနအတွက် ဘတ်ဂျက် ငွေကျပ် ၄၄၀ဘီလီယံကျော် ထပ်မံချထားပေးခြင်းပါဝင်သည့် ၂၀၂၂-၂၀၂၃ ဘဏ္ဍာရေးနှစ် ပြည်ထောင်စု၏ နောက်ထပ် ဘဏ္ဍာငွေခွဲဝေသုံးစွဲရေးဥပဒေကို အာဏာသိမ်းစစ်ကောင်စီက ဒီဇင်ဘာလ ၁၈ရက်နေ့တွင် ပြဋ္ဌာန်းခဲ့သည်။
လက်ရှိ ၂၀၂၂-၂၀၂၃ ဘဏ္ဍာရေးနှစ်အတွက် ဘတ်ဂျက် ငွေကျပ် ၃,၇၀၀ဘီလီယံကျော် သုံးစွဲခွင့် ရရှိခဲ့သည့် ကာကွယ်ရေးဝန်ကြီးဌာနသည် ယခုအခါ ငွေကျပ် ၄၄၀ ဘီလီယံကျော်ကို ဝန်ကြီးဌာနများထဲတွင် အများဆုံး ထပ်မံရရှိခြင်း ဖြစ်သည်။
ယခုပြဋ္ဌာန်းချက်သည် လက်ရှိဘဏ္ဍာရေးနှစ်အတွက် အကျိုးသက်ရောက်မည်ဖြစ်ပြီး ၂၀၂၂-၂၃ ဘဏ္ဍာနှစ် ပြည်ထောင်စု၏ ဘဏ္ဍာငွေအရအသုံးဆိုင်ရာဥပဒေအရ ခွင့်ပြုထားသည့် ဘဏ္ဍာငွေ ခွဲဝေသုံးစွဲခြင်းအပြင် နောက်ထပ်သုံးစွဲခြင်းဖြစ်သည်ဟု မှတ်ယူရမည်ဖြစ်ကြောင်း ဖော်ပြထားသည်။
အဆိုပါ ဥပဒေတွင် စစ်ကောင်စီလက်အောက်ခံ ပြည်ထောင်စုဝန်ကြီးဌာနများနှင့် ဦးစီးဌာန ၃၁ ခု အတွက် ငွေကျပ် ၁,၁၀၀ ဘီလီယံကျော် ထပ်မံချထားပေးပြီး ထိုအထဲတွင် စီမံကိန်းနှင့် ဘဏ္ဍာရေးဝန်ကြီးဌာနက ငွေကျပ် ၃၃၀ ဘီလီယံကျော်ဖြင့် ဒုတိယအများဆုံး ထပ်တိုးရရှိထားသည်ကို တွေ့ရသည်။
ပညာရည်မြှင့်တင်ရေး အကောင်အထည်ဖော် ဆောင်ရွက်နေကြောင်း အစည်းအဝေးအချို့တွင် ပြောဆိုနေသည့် စစ်ကောင်စီဥက္ကဋ္ဌက အာဏာသိမ်းပြီးနောက်တွင် ကာကွယ်ရေးအသုံးစရိတ်ကို တိုးမြှင့်ကာ ပညာရေးအသုံးစရိတ်ကို လျော့ချခြင်းများ ဆောင်ရွက်ခဲ့သည်။
လက်ရှိ ဘဏ္ဍာရေးနှစ်အတွက် ဘတ်ဂျက်သတ်မှတ်ချက်တွင် ပညာရေးဝန်ကြီးဌာနအတွက် ဘတ်ဂျက်ကို NLDအစိုးရလက်ထက်ကထက် ငွေကျပ် ၇၀၀ ဘီလီယံကျော် လျှော့ချကာ ကျပ်၂,၁၀၀ ဘီလီယံကျော်သာ သတ်မှတ်ခဲ့သည်။ ယခုနောက်ထပ်ခွင့်ပြုသည့် သုံးငွေတွင်လည်း ပညာရေးဝန်ကြီးဌာနအတွက် ငွေကျပ် ၉၇ ဘီလီယံကျော်သာ သတ်မှတ်ထားသည်ကို တွေ့ရသည်။
ယခုဘဏ္ဍာနှစ်အတွက် ငွေကျပ် ၈၀၀ဘီလီယံကျော် သုံးစွဲခွင့်ရရှိခဲ့သည့် ကျန်းမာရေးဝန်ကြီးဌာနကိုမူ ထပ်တိုး ကျပ်တစ်ဘီလီယံကျော် ချပေးထားသည်။
ထို့အပြင် စစ်ကောင်စီ၏ စီမံအုပ်ချုပ်ရေးကောင်စီရုံး၊ ပြည်ထောင်စုတရားလွှတ်တော်ချုပ်ရုံး ၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး၊ ပြည်ထောင်စုရွေးကောက်ပွဲကော်မရှင်ရုံး၊ ပြည်ထောင်စုစာရင်းစစ်ချုပ်ရုံးနှင့် ပြည်ထောင်စုရာထူးဝန်အဖွဲ့တို့အတွက် စုစုပေါင်း ငွေကျပ် လေးဘီလီယံကျော် ထပ်တိုးသတ်မှတ်ပေးထားသည်ကိုလည်း တွေ့ရသည်။
စစ်ကောင်စီ၏ ၂၀၂၂-၂၀၂၃ ဘဏ္ဍာရေးနှစ် ပြည်ထောင်စု၏ နောက်ထပ်ဘဏ္ဍာငွေခွဲဝေသုံးစွဲရေးဥပဒေအရ ဝန်ကြီးဌာနများ၊ နိုင်ငံပိုင်စီးပွားရေးအဖွဲ့အစည်းများ၊ စစ်ကောင်စီ၏ ရုံးများ၊ တပ်မြို့စည်ပင်သာယာရေးအဖွဲ့၊ နေပြည်တော်ကောင်စီ၊ နေပြည်တော် စည်ပင်သာယာရေးကော်မတီနှင့် ဗဟိုဘဏ်တို့အတွက် နောက်ထပ် ခွင့်ပြုသည့် သုံးငွေစုစုပေါင်းမှာ ငွေကျပ်၂,၆၀၀ဘီလီယံ ကျော်ရှိသည်။
စာတည်း။ ။ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)
