ကုလသမဂ္ဂ လုံခြုံရေးကောင်စီ၏ သမိုင်းတွင် ပထမဆုံး မြန်မာအရေး ဆုံးဖြတ်ချက်ကို Burmese Rohingya Organisation UK က ယနေ့တွင် ကြိုဆိုသော်လည်း ရိုဟင်ဂျာများအား လူမျိုးတုံးသတ်ဖြတ်မှု အဆုံးသတ်ရေးအတွက် လက်တွေ့ကျသော ခြေလှမ်းများ မပါရှိခြင်းနှင့် မြန်မာစစ်တပ်ဆီ လက်နက်များနှင့် ဘဏ္ဍာငွေများ စီးဝင်နေခြင်းတို့အား မတားဆီးနိုင်ခြင်းကြောင့် စိတ်ပျက်မိကြောင်း ဖော်ပြသည်။
“အခု ဆုံးဖြတ်ချက်ဟာ ရိုဟင်ဂျာအကျပ်အတည်းရဲ့ ရင်းမြစ်ပြဿနာတွေကို ကိုင်တွယ်ဖြေရှင်းရေးနဲ့ ဒုက္ခသည်များအတွက် ဘေးကင်းလုံခြုံစွာ ဆန္ဒအလျောက် နေရပ်ပြန်နိုင်ရေးကို ပြောဆိုထားတယ်၊ ဒါပေမဲ့ ဒါမျိုး ဖြစ်လာဖို့အတွက် လက်တွေ့ကျတဲ့ ခြေလှမ်း မပါဘူး၊ စကားလုံးသက်သက်ပဲ”ဟု Burmese Rohingya Organisation UK ၏ ဥက္ကဋ္ဌ ဦးထွန်းခင်က ပြောသည်။
“နိုင်ငံတကာ ရာဇဝတ်မှု တရားရုံး ICC ဆီ လွှဲပြောင်းပေးတာလည်း မပါဘူး၊ လူမျိုးတုံးသတ်ဖြတ်မှုအတွက် တာဝန်ရှိတဲ့သူတွေကို ဒဏ်ခတ်ပိတ်ဆို့ အရေးယူတာမျိုးတွေလည်း မပါရှိဘူး၊ ခနော်နီခနော်နဲ့ စက်လှေနဲ့ ပင်လယ်ထဲ သီတင်းပတ်ကြာ မျောပါနေတဲ့ ရိုဟင်ဂျာတွေ ကယ်ဆယ်ခံရတာမျိုး မရှိနေတဲ့အချိန်မှာ ကုလသမဂ္ဂ လုံခြုံရေးကောင်စီအဖွဲ့ဝင်တွေဟာ ရိုဟင်ဂျာဒုက္ခသည်တွေကို ကာကွယ်ပေးရေးဆိုပြီး ပြောနေဆိုနေတယ်”ဟု ၎င်းက ပြောသည်။
မြန်မာအရေး ပထမဆုံးသော ဆုံးဖြတ်ချက်ကို ကုလသမဂ္ဂ လုံခြုံရေးကောင်စီက တရုတ်၊ ရုရှနှင့် အိန္ဒိယတို့၏ ကြားနေခြင်းနှင့်အတူ ဒီဇင်ဘာ ၂၁ ရက်တွင် အတည်ပြုချမှတ်ခဲ့သည်။ အဆိုပါ သုံးနိုင်ငံသည် ဆုံးဖြတ်ချက်၌ ပြင်းထန်သော အသုံးအနှုန်းများကို နုတ်ပယ်တည်းဖြတ်ရန် အပြင်းအထန် တောင်းဆိုခဲ့ကြသည်။
ပထမဆုံး ဆုံးဖြတ်ချက် ထွက်ပေါ်လာအောင် သံတမန်ရေး အားထုတ်မှုများကို Burmese Rohingya Organisation UK က အသိအမှတ်ပြုသော်လည်း ပြင်းထန်ထိရောက်သော စကားလုံးအသုံးအနှုန်းများကို ထုတ်ပယ်တည်းဖြတ်ထားသဖြင့် သင်္ကေတတန်ဖိုးသက်သက်သာ ရှိသည်။ ဗီတိုအာဏာရှိသော တရုတ်နှင့် ရုရှ၏ အနေအထားကြောင့် လုံခြုံရေးကောင်စီသည် ယခု ဆုံးဖြတ်ချက်ဖြင့် လက်တွေ့ကျသော အရေးယူမှုများဆီ ဖော်ဆောင်ရေးမှာ ဖြစ်နိုင်ခြေ နည်းပါးသည်။
Burmese Rohingya Organisation UK သည် ၂၀၀၅ ခုနှစ်အတွင်း စတင်တည်ထောင်ချိန်မှစကာ မြန်မာအား အရေးယူရန် ကုလသမဂ္ဂ လုံခြုံရေးကောင်စီအား တောင်းဆိုနေခြင်း ဖြစ်သည်။ ၎င်းတို့က မြန်မာနိုင်ငံ၏ အခြေအနေအား ICC သို့ လွှဲပြောင်းပေးရေး၊ နိုင်ငံတကာ တရားရုံး ICJ ၏ အမိန့်အရ ဖြစ်ပွားဆဲ လူမျိုးတုံးသတ်ဖြတ်မှုများကို ကာကွယ်တားဆီးရန် ယာယီလုပ်ငန်းစဉ်များ အကောင်အထည် မဖော်ခြင်းအား အားချင်းဆွေးနွေးရန်၊ စစ်တပ်အား ကမ္ဘာလုံးဆိုင်ရာ လက်နက်တင်ပို့မှု တားမြစ်ပြီး ဘဏ္ဍာငွေကို ဖြတ်တောက်မည့် ပစ်မှတ်ထား ဒဏ်ခတ်ပိတ်ဆို့မှုများ ချမှတ်ရန်နှင့် မြန်မာနိုင်ငံသို့ အရပ်ဘက်သုံး လေယာဉ်ဆီများ တင်ပို့နေခြင်းကို တားမြစ်ရန်တို့အား တောင်းဆိုထားသည်။
“နိုင်ငံတကာ ဥပဒေနဲ့ ငြိမ်းချမ်းရေးမြှင့်တင်ရေးကို ကိုင်စွဲရတဲ့ နိုင်ငံတကာအဖွဲ့အစည်းတွေရဲ့ လုပ်ကိုင်ဆောင်ရွက်ဖို့ ပျက်ကွက်တာကို ကျွန်တော်တို့ ထပ်တစ်ကြိမ် မြင်တွေ့နေရတာပဲ၊ ရိုဟင်ဂျာနဲ့ မြန်မာနိုင်ငံက အခြားသူတွေဟာ တန်ဖိုးပေးဆပ်နေရတယ်”ဟု ဦးထွန်းခင်က ပြောသည်။ “နောက်ထပ် တိုးတက်မှုတွေ မြင်ရဖို့ မရရှိတဲ့ ကုလသမဂ္ဂ လုံခြုံရေးကောင်စီရဲ့ ပြင်ပကနေ လက်တွေ့ကျတဲ့ အရေးယူမှုတွေ အတူတကွ လုပ်ဆောင်ဖို့ အမေရိကန်၊ အီးယူ၊ ဗြိတိန်နဲ့ ကနေဒါတို့လို စာနာထောက်ထားတတ်တဲ့ နိုင်ငံတွေက ကုလသမဂ္ဂ အထူးကိုယ်စားလှယ်တွေကို ကျွန်တော်တို့ ထောက်ခံတယ်”ဟု ၎င်းက ပြောခဲ့သည်။
(မိုးသဲ ဘာသာပြန်သည်။)
