အာဖဂန်နစ္စတန်နိုင်ငံတွင် အိမ်ထောင်စု ၇၉ ရာခိုင်နှုန်းခန့်သည် ရေရှားပါးမှုကို အကြီးအကျယ် ကြုံတွေ့နေရပြီး ၎င်းတို့အတွက် သန့်ရှင်းပြီး ဘေးကင်းစိတ်ချရသည့် ရေကို အသုံးပြုနိုင်ရေးက ခက်ခဲလျက် ရှိကြောင်း ကုလသမဂ္ဂ၏ အပြည်ပြည်ဆိုင်ရာ ကလေးများရန်ပုံငွေအဖွဲ့ (UNICEF) ၏ စစ်တမ်းတစ်ရပ်ကို ကိုးကားပြီး Khaama Press က ဖော်ပြသည်။
ထိုနိုင်ငံတွင် ပြီးခဲ့သည့် နှစ်များအတွင်း မိုးခေါင်မှုနှင့် အခြားသော ပြဿနာများကြောင့် ရေရှားပါးမှုများကို ဖြစ်ပေါ်စေခဲ့သည်။
“ရေရှားပါးမှု ပြဿနာက ကြီးလေးပါတယ်။ အာဖဂန်နစ္စတန်မှာ ဒီပြဿနာကို ကိုင်တွယ်ဖြေရှင်းဖို့ ယူနီဆက်ဖ် အနေနဲ့ အကူအညီပေးသွားပါမယ်။ နောက်နှစ်မှာ လူ ၉ သန်းအတွက် သန့်ရှင်းပြီး ဘေးကင်းတဲ့ ရေရရှိစေဖို့က မိမိတို့အဖွဲ့ရဲ့ အဓိက ဦးစားပေးဖြစ်ပါတယ်” ဟု ယူနီဆက်ဖ် အာဖဂန်နစ္စတန်၏ ပြောရေးဆိုခွင့်ရှိသူ ဆယ်လမ် အယ်လ်-ဂျနာဘီက ပြောကြောင်း Khaama Press က ဖော်ပြသည်။
နိုင်ငံတွင် ရေရှားပါးမှုနှင့်ပတ်သက်ပြီး အာဖဂန်အိမ်ထောင်စုများက စိုးရိမ်ပူပန်လျက် ရှိသည်။ ရေ ပမာဏက စိုးရိမ်ဖွယ်ရာ ကျဆင်းနေခဲ့ပြီး ရေတွင်းအများစုသည် ရေခန်းခြောက်နေသည့်အတွက် မိမိတို့အနေဖြင့် သန့်ရှင်းသော ရေ ဖြည့်ဆည်းထောက်ပံ့နိုင်ရေး အခက်အခဲနှင့် ကြုံနေရကြောင်း ကဘူးလ်ဒေသခံတချို့က ပြောသည်။
ခက်ခဲသော စီးပွားရေးအခြေအနေများနှင့် ရင်ဆိုင်နေရသည့် သာမန်ပြည်သူတို့အနေဖြင့် လက်ရှိအချိန်တွင် မိုးခေါင်မှုနှင့် ရေရှားပါးမှုက နောက်ထပ်အခက်အခဲပြဿနာတစ်ခု ဖြစ်လာခဲ့သည်။
