ပါကစ္စတန်နိုင်ငံ ပန်ဂျပ်ပြည်နယ်တွင် အမျိုးသမီးများအပေါ် ပြစ်မှုကျူးလွန်သည့် လုပ်ရပ်များ ဖြစ်ပွားမှုက မြင့်တက်နေပြီး ၂၀၂၁ ခုနှစ်အတွင်း လိင်ပိုင်းဆိုင်ရာ ပြစ်မှုကျူးလွန်မှုများက ၁၆ ရာခိုင်နှုန်း မြင့်တက်ခဲ့ကြောင်း အမျိုးသမီးများ၏ ဂုဏ်သိက္ခာဆိုင်ရာ ပန်ဂျပ်ကော်မရှင် (PCSW) ၏ အမျိုးသား၊ အမျိုးသမီး တန်းတူရည်တူဖြစ်မှု ဆိုင်ရာ အစီရင်ခံစာတစ်ရပ်က ဒီဇင်ဘာ ၈ ရက်တွင် ထုတ်ဖော်သည်။
ပန်ဂျပ်ပြည်နယ်၌ အမျိုးသမီးများ ပြန်ပေးဆွဲခံရမှု ဖြစ်စဉ်များတွင် ၂၅ ရာခိုင်နှုန်း၊ အမျိုးသမီးများအပေါ် ကိုယ်ထိလက်ရောက် ကျူးလွန်မှုဖြစ်စဉ်များတွင် ၄၇ ရာခိုင်နှုန်း၊ အက်ဆစ်ဖြင့် ပက်သည့် ဖြစ်စဉ်များတွင် ၁၈ ရာခိုင်နှုန်းနှင့် မိသားစုဂုဏ်သိက္ခာအတွက် သတ်ဖြတ်မှုဖြစ်စဉ်များတွင် ၁၇ ရာခိုင်နှုန်းတို့ဖြင့် အသီးသီး မြင့်တက် ခဲ့သည်ဟု ထိုအစီရင်ခံစာတွင် ဖော်ပြထားကြောင်း News International က ဖော်ပြသည်။
အဆိုပါပြည်နယ်တွင် အမျိုးသမီးများအပေါ် အကြမ်းဖက်သူများ အမှုမှ တရားသေလွတ်မြောက်မှုနှုန်းက ၉၅ ရာခိုင်နှုန်းအထိ ရှိသည်။ ပန်ဂျပ်ပြည်နယ် ဘေးကင်းသော မြို့များဆိုင်ရာ အာဏာပိုင်အဖွဲ့ (PSCA) ၏ အမျိုးသမီး များ ဘေးကင်းလုံခြုံမှုရှိစေရေး အက်ပလီကေးရှင်းကို ယေဘုယျ ပုံမှန်အသုံးပြုသူဦးရေက ၂၆၅ ရာခိုင်နှုန်းအထိ မြင့်တက်ခဲ့သည်။
ပါကစ္စတန်၏ ပန်ဂျပ်ပြည်နယ်တွင် အမျိုးသားဦးရေ ၆၀ ဒသမ ၈ သန်းနှင့် အမျိုးသမီးဦးရေ ၅၉ ဒသမ ၂ သန်း နေထိုင်လျက် ရှိသည်။ မိုဘိုင်းဖုန်း ပိုင်ဆိုင်နိုင်မှုအပိုင်းတွင် အမျိုးသားများက အမျိုးသမီးများထက် ပိုများပြားပြီး ရာခိုင်နှုန်းနှိုင်းယှဉ်ချက်က ၆၄ ဒသမ ၃ ရာခိုင်နှုန်း - ၂၅ ဒသမ ၃ ရာခိုင်နှုန်း ဖြစ်သည်။ အင်တာနက်အသုံးပြုနိုင်မှုအပိုင်းတွင်လည်း အမျိုးသားများက အမျိုးသမီးများထက် ပိုများပြီး ရာခိုင်နှုန်း နှိုင်းယှဉ်ချက်က ၂၄ ရာခိုင်နှုန်း-၁၅ ဒသမ ၃ ရာခိုင်နှုန်းဖြစ်သည်။
ပြည်နယ်တွင် ကလေးမွေးဖွားမှုအရေအတွက်သည် ၂၀၂၀ ပြည့်နှစ်က ၁ ဒသမ ၃၂ သန်းမှ ၂၀၂၁ ခုနှစ်တွင် ၁ ဒသမ ၃၇ သန်းကို မြင့်တက်ခဲ့သည်။ အလားတူ လူသေဆုံးမှုအရေအတွက်သည် ၂၀၂၀ ပြည့်နှစ်က ၅၄၀၆၈၁ ဦးမှ ၂၀၂၁ ခုနှစ်တွင် ၅၇၇၆၂၉ ဦးကို မြင့်တက်ခဲ့သည်။
