အမျိုးသားညီညွတ်ရေး အစိုးရ

· Burma Act ပါဝင်သည့် အမေရိကန်အမျိုးသားကာကွယ်ရေးလုပ်ပိုင်ခွင့် အက်ဥပဒေ(NDAA)မူကြမ်းကို အမေရိကန်အထက်လွှတ်တော်အတည်ပြုမှုအပေါ် အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက ဒီဇင်ဘာ ၁၆ ရက်က ကျေးဇူးတင်ကြောင်း ထုတ်ပြန်လိုက်သည်။

· အမျိုးသားညီညွတ်ရေးအစိုးရ၊ ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေးကို ဒီဇင်ဘာ ၁၅ ရက်က ကျင်းပ ပြုလုပ်ခဲ့ပြီး ကြားကာလဒေသန္တရ ပြည်သူ့အုပ်ချုပ်ရေး ဖော်ဆောင်မှု ဗဟိုကော်မတီ ဥက္ကဋ္ဌ၊ ပြည်ထောင်စုဝန်ကြီးချုပ် မန်းဝင်းခိုင်သန်းက တော်လှန်ရေး ဖြစ်စဉ်ကို အနာဂတ်ကာလများမှာ အရှိန်အဟုန်ဖြင့် ပြောင်းလဲမှုကြီး ဖြစ်ပေါ်တိုးတက်ရန် အားလုံး အတွက် အခွင့်အလမ်းအဖြစ် သတ်မှတ်ကာ အစွမ်းကုန်ကြိုးစား ဆောင်ရွက်ရန် တိုက်တွန်းပြောသည်။

· အမျိုးသားကာကွယ်ရေးလုပ်ပိုင်ခွင့်အက်ဥပဒေ (NDAA) မူကြမ်းကို အမေရိကန်အထက်လွှတ်တော်က အတည်ပြုလိုက် ကြောင်း NUG ဝန်ကြီး ဦးအောင်မျိုးမင်းက လူမှုကွန်ရက်တွင် ရေးသားထားသည်။

· ပင်လယ်ထဲမျောပါနေသည့် ရိုဟင်ဂျာဒုက္ခသည်‌များကို မြန်မာနိုင်ငံက စစ်ကောင်စီထံကို အတင်း အကျပ်ပြန်ပြီး ပို့ဆောင်နေသည်နှင့်ပတ်သက်ပြီး အမျိုးသားညီညွတ်ရေးအစိုးရ၊ လူ့အခွင့်အရေး ဝန်ကြီးဌာနက ဒီဇင်ဘာ ၁၆ ရက်က ကြေညာချက်တစ်စောင်ထုတ်ပြန်လိုက်သည်။

· အကြမ်းဖက်စစ်ကောင်စီတပ်သည် ကမ္ဘာပေါ်တွင် နောက်ထပ်မြောက်ကိုရီးယားလို နိုင်ငံတစ်နိုင်ငံ ထပ်ပေါ်အောင် လုပ်နေခြင်း ဖြစ်သည်ဟု အမျိုးသားညီညွတ်ရေးအစိုးရ၊ အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဒေါက်တာ ဆာဆာက စပိန်သတင်းစာ EL ESPAÑOL နှင့် တွေ့ဆုံမေးမြန်းခန်းတွင် ပြောကြားလိုက်သည်။

· ပြည်ထောင်စုလွှတ်တော် ကိုယ်စားပြုကော်မတီ၏ လုပ်ငန်းဆောင်ရွက်ချက်အပေါ် ကရင်ပြည်နယ်၊ ရှမ်းပြည်နယ်၊ ရန်ကုန်တိုင်း နှင့် ဧရာဝတီတိုင်းတို့မှ CRPH ကိုယ်စားလှယ်များကို ရှင်းလင်းတင်ပြသည့် အစည်းအဝေးကို ဒီဇင်ဘာ ၁၅ ရက်က ဗီဒီယိုကွန်ဖရင်ကတစ်ဆင့် ပြုလုပ်ခဲ့သည်။

တော်လှန်ရေး လှုပ်ရှားမှုများ

· NUG ၊ NUCC နှင့် CRPH ကို ထောက်ခံရန်၊ PDF နှင့် EAO များကို နည်းပညာ အကူအညီ ပေးရန်၊ MOGE ၊ စစ်တပ်၏ ဝင်ငွေများကို ပိတ်ဆို့ရန် ပါဝင်သည့် အမေရိကန် အမျိုးသားကာကွယ်ရေး ဥပဒေကို အမေရိကန်အထက်လွှတ်တော်က အတည်ပြုလိုက်ပြီး အမေရိကန်သမ္မတ ဘိုင်ဒင်က လက်မှတ်ထိုး ထုတ်ပြန်ရန်သာ ကျန်ရှိတော့ကြောင်း သိရသည်။

· Burma Act ပါဝင်သည့် အမေရိကန်အမျိုးသားကာကွယ်ရေး လုပ်ပိုင်ခွင့်အက်ဥပဒေ (NDAA) မူကြမ်းသည် အကြမ်းဖက် စစ်ကောင်စီကို ရာဇသံပေးပြီး နောက်ဆုံးသတိပေးလိုက်ခြင်း ဖြစ်သည်ဟု အမေရိကန်၊ Carleton College နိုင်ငံရေးသိပ္ပံဌာန၏ ပါမောက္ခ ဒေါက်တာထွန်းမြင့်က ဧရာဝတီ သတင်းဌာ၏ မေးမြန်းမှုကို မှတ်ချက်ပြု ပြောကြားခဲ့သည်။

· နိုင်ငံတကာရာဇဝတ်မှုခုံရုံး (ICC) အနေဖြင့် မြန်မာနိုင်ငံက အကြမ်းဖက်စစ်ကောင်စီက ၎င်းတို့ကျူး လွန်နေသည့် ပြစ်မှုများကနေ ကင်းလွတ်ခွင့်ရနေသည်ကို ချက်ခြင်း အဆုံးသတ်စေပြီး ချက်ခြင်း အရေးယူသင့်နေပြီဖြစ်သည်ဟု မြန်မာနိုင်ငံဆိုင်ရာ အထူးအကြံပေးကောင်စီ (SAC-M) က အစီရင်ခံစာ တစ်စောင် ထုတ်ပြန်လိုက်သည်။

· ကုလသမဂ္ဂညီလာခံများတွင် မြန်မာနိုင်ငံကိုယ်စားပြုနေရာအတွက် အကြမ်းဖက် စစ်ကောင်စီကို ငြင်းဆိုပြီး အမျိုးသားညီညွတ်ရေးအစိုးရ နှင့် သံအမတ်ကြီး ဦးကျော်မိုးထွန်းတို့ကို ကိုယ်စားပြုခွင့် ပေးလိုက်သည့်အပေါ် ဗြိတိန်အခြေစိုက် Myanmar Accountability Project (MAP) အဖွဲ့က ကြိုဆိုကြောင်း ပြောကြားခဲ့သည်။

· အကြမ်းဖက်စစ်ကောင်စီ၏ မတရား သေဒဏ်ချမှတ်ခံရသည့် ဒဂုံတက္ကသိုလ်ကျောင်းသားများနှင့် တစ်သားတည်း ရပ်တည်ကြောင်း ဆန္ဒပြမှုကို ဂျပန်နိုင်ငံတွင် ယမန်နေ့က ပြုလုပ်ခဲ့သည်။

· အကြမ်းဖက်စစ်ကောင်စီအဖွဲ့အခြေစိုက်ရာ နေပြည်တော်၊ ပျဉ်းမနားမြို့၊ နန်းစိန်ကိတ်ဆိုင်အနီးတွင် ဒီဇင်ဘာ ၁၅ ရက်၊ ညနေ ၆ နာရီခန့်က ဗုံး ၂ လုံး ပြင်းထန်စွာပေါက်ကွဲခဲ့ကြောင်း ဒေသခံများက ပြောသည်။

· ရန်ကုန်တိုင်း၊ အင်းစိန်မြို့နယ်၊ BPI ဆေးဝါးစက်ရုံအနီးရှိ အကြမ်းဖက်နှိမ်နင်းရေးတပ်ထဲသို့ ၁၀၇ မမ ရှော့တိုက်ဒုံး ၂ လုံးဖြင့် ဒီဇင်ဘာ ၁၅ ရက်၊ ည ၈ နာရီခွဲခန့်က မြို့ပြ UG များက ပစ်ခတ်တိုက်ခိုက်ခဲ့ရာ ပစ်ခတ်ခံရသည့် တပ်အတွင်းသို့ ဆေးရုံကားတချို့ ဝင်ရောက်သွားသဖြင့် စစ်သားထိခိုက်သေဆုံးမှု ရှိနိုင်သည်ဟု ဒေသပြည်သူများက ပြောသည်။

· ယင်းမာပင်-ဆားလင်းကြီး ရွာပေါင်းစုံသပိတ် သပိတ်စစ်ကြောင်း ဦးဆောင်ကာ ဒီဇင်ဘာ ၁၆ ရက်တွင် အကြမ်းဖက် စစ်အာဏာရှင်တော်လှန်ရေး ချီတက်ဆန္ဒပြခဲ့ကြောင်း သိရသည်။

· ယင်းမာပင်မြောက်ခြမ်း ရွာပေါင်းစုံ သပိတ်စစ်ကြောင်း ဦးဆောင်ကာ ဒီဇင်ဘာ ၁၆ ရက်တွင် စစ်အာဏာ ရှင်တော်လှန်ရေး ချီတက် ဆန္ဒပြခဲ့ကြသည်။

· စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းရွာရှိ အကြမ်းဖက်စစ်တပ် လက်အောက်ခံ ပျူစောထီးစခန်းကို ဒီဇင်ဘာ ၁၅ ရက်၊ ညနေ ၅ နာရီခန့်က ဝင်ရောက် တိုက်ခိုက်ခဲ့ရာ ပျူစောထီး ၁၅ ဦး သေဆုံးသွား ကြောင်း မြန်မာ့တော်ဝင် နဂါးတပ်တော် (MRDA) တပ်ဖွဲ့ထံမှ သိရသည်။

· စစ်ကိုင်းတိုင်း၊ ထီးချိုင့်မြို့နယ်ရှိ ကျေးရွာများကို မီးရှို့ဖျက်ဆီးခဲ့သည့် စစ်ကောင်စီတပ်သည် အင်းတော်မြို့နယ်သို့ ပြီးခဲ့သည့်ရက်ပိုင်းက ဝင်ရောက်လာပြီး ဒီဇင်ဘာ ၁၆ ရက်၊ နေ့လယ်ပိုင်းတွသ် အင်းတော်မြို့နယ် ဂျုံးဂျကျေးရွာသစ်ကို မီးစရှို့နေသည် ဟု အင်းတော်ပြည်သူ့ကာကွယ်ရေးတပ် (PDF) ရဲဘော်က ပြောသည်။

· စစ်ကိုင်းတိုင်း၊ မင်းကင်းမြို့နယ်၊ တောင်တွင်းချောင်ဒေသရှိ ပျူစောထီးကြီးစိုးရာ ကျော်ရွာအား တစ်ပတ်အတွင်း ငါးကြိမ်တိုက်ခိုက်ရာ ပျူစောထီးတပ်ဖွဲ့ဝင်များ ထိခိုက်သေဆုံးမှုများရှိကြောင်း ရွှေတြိဂံပြည်သူ့ကာကွယ်ရေးတပ်ရင်းGTF က သတင်းထုတ်ပြန်သည်။

· စစ်ကိုင်းတိုင်း၊ ကလေးမြို့နယ် မြောက်ပိုင်း၊ နန်းချောင်းကျေးရွာကို မီးရှို့ဖျက်ဆီးပြီး နှစ်ရက်ကြာ တပ်စွဲထားသော စစ်ကောင်စီတပ်နှင့် Hyenas Survey Corps (HSC) မဟာမိတ်တပ်ပေါင်းစုတို့ ဖြစ်ပွားခဲ့သည့် အပြန်အလှန် ပစ်ခတ်မှု ရုပ်သံကို ပူးပေါင်းတပ်ပေါင်းစုက ဒီဇင်ဘာ ၁၅ ရက်တွင် ထုတ်ပြန်ထားသည်။

· စစ်ကိုင်းတိုင်း ၊ ကန့်ဘလူ မြို့နယ် နှင့် ကောလင်းမြို့နယ် အစပ်ရှိ ကျေးရွာများအား ဒီဇင်ဘာ ၁၅ ရက်၊ နေ့လယ်ပိုင်းက တစ်ရွာဝင်တစ်ရွာထွက် မီးလိုက်ရှို့နေသည့် စစ်ကောင်စီတပ် မိုင်းဆွဲတိုက်ခိုက် ခံရ ကြောင်း ဒေသခံသတင်းရင်းမြစ်များထံက သိရသည်။

· စစ်ကိုင်းတိုင်း၊ ကလေးမြို့နယ် အခြေစိုက် Ranger Kalay Defend Force-RKDF တပ်ဖွဲ့က ကျည်၊ ခဲယမ်း လိုအပ်ချက် ဖြည့်တင်းနိုင်ရေးအတွက် “ ပြည်သူ့ဆွဲကြိုး ရဲဘော်ကျည်ဖိုး ” အမည်ဖြင့် ကံစမ်းမဲ အစီ အစဉ် ပြုလုပ်လျက် ရှိသည်။

· စစ်ကိုင်းတိုင်း အထက်ပိုင်း ၊ ကသာခရိုင်၊ အင်းတော်မြို့နယ်သို့ စစ်ကောင်စီတပ်သားများ ထပ်မံ စစ်ကြောင်း ထိုးဝင်လာ၍ ဒေသခံများအနေဖြင့် ပျက်စီးဆုံးရှုံးမှု နည်းအောင် ကြိုတင်ပြင်ဆင်ကြရန် Indaw Revolution (IR) မှ ယနေ့ ဒီဇင်ဘာ ၁၅ ရက်တွင် အသိပေးထုတ်ပြန်ထားသည်။

· စစ်ကိုင်းတိုင်း ၊ မုံရွာခရိုင်တပ်ရင်း၊ သံမဏိတပ်ရင်းအတွက် လိုအပ်လျက်ရှိသော ကာကွယ်ရေးသုံး ပစ္စည်းများ နှင့် အခြားလိုအပ်မှုများ ဖြည့်တင်းနိုင်ရန်အတွက် ကံစမ်းမဲလက်မှတ်များဝယ်ယူပြီး ပါဝင်ကြရန် သံမဏိ Force - MPDF Battalion က ဖိတ်ခေါ်ထားသည်။

· စစ်ကိုင်းတိုင်း ၊ တမူးမြို့တွင် စစ်အာဏာရှင်လက်အောက်မှ ရုန်းထွက်ပြီး CDM ပြုလုပ်ခဲ့သော ဝန်ထမ်းများကို ထောက်ပံ့ကူညီသည့် CDM Support team အဖွဲ့ဝင် တချို့ဖမ်းဆီးခံခဲ့ရပြီး အခြားအဖွဲ့ဝင်များကို ဖမ်းဆီးရန် လိုက်လံရှာ‌ဖွေနေကြောင်း တမူးမြို့ခံတစ်ဦးက ပြောသည်။

· မကွေးတိုင်း၊ ရေစကြိုမြို့နယ်တွင် ဒီဇင်ဘာ ၁၅ ရက်၊ နံနက်ပိုင်းက စစ်ကောင်စီတပ် နှင့် ဒေသ ကာကွယ်ရေး ပူးပေါင်းတပ်ဖွဲ့တို့တိုက်ပွဲဖြစ်ပွားခဲ့ပြီး စစ်ကောင်စီဘက်က ၄ ဦး သေဆုံးကာ ၇ ယောက် ဒဏ်ရာရရှိခဲ့သည်ဟု Urban Underground Revolution Force (ရေစကြို)ထံက သိရသည်။

· မကွေးတိုင်း၊ မင်းတုန်းမြို့နယ်ရှိ စစ်ကောင်စီသတင်းပေးဟုဆိုသူ တစ်ဦးကို ယမန်နေ့က ပစ်ခတ်လိုက်ကြောင်း သရက်၊ ကံမ၊ မင်းတုန်း ပူးပေါင်း ပြည်သူ့ကာကွယ်ရေးတပ်ဖွဲ့(EAGLE FORCE)က သတင်းထုတ်ပြန်သည်။

· မကွေးတိုင်း၊ ထီးလင်းမြို့နယ် ရွှေအောင်သာရွာမှ ထီးလင်းဘက်သို့ ထွက်လာသည့် စစ်ကောင်စီ စစ်ကြောင်းသည် ညောင်ဟောင်းကျေးရွာအနီးတွင် ကင်းထောက်အဖွဲ့ နှင့် ဒီဇင်ဘာ ၁၄ ရက်က ထိတွေ့တိုက်ပွဲ ဖြစ်ပွားပြီး စစ်ကောင်စီဘက်က လေးဦး သေဆုံးကာ ထိခိုက်ဒဏ်ရာ ရရှိသူများရှိကြောင်း YRA-ထီးလင်းအဖွဲ့ တာဝန်ရှိသူတစ်ဦးက ပြောသည်။

· မန္တလေးတိုင်း၊ ပြည်ကြီးတံခွန်မြို့နယ်၊ အဆင့်မြင့်ရဲစခန်းကို ဒီဇင်ဘာ ၁၅ ရက်၊ ညနေ ၄ နာရီကျော်ခန့်က ဒေသအခြေစိုက် ပြည်သူ့ကာကွယ်ရေး ပြောက်ကျားများက လက်ပစ်ဗုံးဖြင့် ပစ်ခတ်တိုက်ခိုက်ခဲ့ရာ ရဲနှစ်ဦး သေဆုံးနိုင်ကြောင်း တိုက်ခိုက်မှုတွင် ပါဝင်ခဲ့သည့် Never Give Up Fox Force (NGU:FF) မြေခွေးတပ်ဖွဲ့က သတင်းထုတ်ပြန်သည်။

· တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်၊ ကျေးရွာတစ်ရွာတွင် တော်လှန်ရေးလူငယ်များက ဒီဇင်ဘာ ၁၆ ရက် ၊ နံနက် အစောပိုင်းတွင် စစ်အာဏာရှင်ဆန့်ကျင်ရေး ဟောပြောခြင်းများ၊ လက်ကမ်း စာစောင်ဖြန့်ဝေခြင်းများ နှင့် အကြမ်းဖက်စစ်အာဏာရှင် ဆန့်ကျင်ရေး ဆန္ဒထုတ်ဖော်လှုပ်ရှား ကြသည်။

· 'နန်းထိုက်အောင်စစ်ဆင်ရေး' အဖြစ် တောင်ငူမြို့နယ်ရှိ ဇီးပင်သာကျေးရွာမှ စစ်ကောင်စီ ခန့် အုပ်ချုပ်ရေးမှူး ဇော်ခင်အား တောင်ငူခရိုင် PDF တပ်ရင်း (၃၅၀၁)၊ တပ်ခွဲ -၁ (ပါဝါအဖွဲ့ နှင့် ပူးပေါင်းအဖွဲ့) တို့က ပစ်ခတ်လိုက်ကြောင်း ပဲခူးတိုင်းစစ်ဒေသခွဲက ယနေ့ ထုတ်ပြန်သည်။

· ကရင်ပြည်နယ်၊ မြဝတီမြို့နယ်၊ သင်္ကန်းညီနောင်ရှိ လျှပ်စစ်ဓာတ်အားခွဲရုံတွင် ဒီဇင်ဘာ ၁၅ ရက်၊ ညပိုင်းက ဗုံးပေါက်ကွဲမှုဖြစ်ပွားကာ ထရန်စဖော်မာ ၃ လုံးပျက်စီးခဲ့သည်ဟု ဒေသခံများထံမှ သိရသည်။

· ကရင်ပြည်နယ်၊ ကော့ကရိတ်မြို့နယ်၊ အာရှလမ်းမကြီးပေါ် ကော့နွဲ့ကျေးရွာ အနီး တောနော်ရေတံခွန် ပတ်ဝန်းကျင်တွင် ရှိနေသော တံတားတစ်ခု ယနေ့ နံနက်ပိုင်းက မိုင်းခွဲခံရပြီး ပျက်စီးသွားသဖြင့် ကားများ သွားမရတော့ကြောင်း ဒေသပြည်သူများ နှင့် ခရီးသွားပြည်သူများက ပြောသည်။

· မွန်ပြည်နယ်၊ ရေးမြို့နယ်ရှိ စစ်ကောင်စီ၏ အမြောက်တပ်ကို ရေးဘီလူးအဖွဲ့က ဒီဇင်ဘာ ၁၆ ရက်၊ နံနက် ၉ နာရီခွဲခန့်က သွားရောက်ပစ်ခတ်မှု ပြုလုပ်ခဲ့ရာ စစ်ကောင်စီဘက်က ထိခိုက်သေဆုံးမှုများ ရှိနိုင်ကြောင်း ယင်းအဖွဲ့ထံမှ သိရသည်။

· ရှမ်းပြည်နယ် (တောင်ပိုင်း) ၊ အောင်ပန်းမြို့တွင် ပြည်သူ့ကာကွယ်ရေးတပ်ဖွဲ့ (PDF) နှင့် ဆက်စပ် နေသည်ဟုဆိုကာ လူငယ် ၁၂ ဦးကို စစ်ကောင်စီတပ်က ဖမ်းဆီးသွားကြောင်း ဒေသခံများထံက သိရသည်။

တိုင်းရင်းသား လက်နက်ကိုင်များ

· ကရင်ပြည်နယ်၊ ကော့ကရိတ်မြို့နယ်ရှိ လှိုင်း၀ ၊ ငါးတိုင်၊ ကျုံဒိုး စစ်ကောင်စီ တပ်စခန်းများကို ဒီဇင်ဘာ ၁၆ ရက်၊ နံနက်ပိုင်းက စတင်ပြီး Lion Battalion Commando Special Force စစ်ကြောင်းက ဦးဆောင်ပြီး KNLA ၊ PDF ပူးပေါင်းတပ်များက ဝင်ရောက်တိုက်ခိုက်ရာ ဗိုလ်မှူး၊ ဗိုလ်ကြီး အပါအဝင် စစ်တပ်ဘက်မှ ၄ ဦးသေဆုံးကြောင်း Lion Battalion Commando Special Force စစ်ကြောင်းမှ တာဝန်ရှိသူတစ်ဦးက ပြောသည်။

· ကရင်ပြည်နယ်၊ KNU တပ်မဟာ (၅) ထိန်းချုပ်နယ်မြေ၊ ဖာပွန်ခရိုင်တွင် KNU နှင့် စစ်ကောင်စီတပ် တို့အကြား ဒီဇင်ဘာ ၁၃ ရက်တွင် တိုက်ပွဲ ငါးကြိမ် ဖြစ်ပွားခဲ့ရာ စစ်ကောင်စီတပ်ဘက်က ဒုတပ်ရင်းမှူး တစ်ဦး ဒဏ်ရာရခဲ့ပြီး နှစ်ဦးသေဆုံးသွားကြောင်း KNU တပ်မဟာ (၅) ထံမှ သိရသည်။

· စစ်ကောင်စီတပ် နှင့် တအာင်းအမျိုးသား လွတ်မြောက်ရေးတပ်မတော် PSLF/TNLA တို့အကြား ဒီဇင်ဘာ ၇ ရက်မှ ၁၂ ရက်ထိ ဖြစ်ပွားခဲ့သည့် တိုက်ပွဲအတွင်း စစ်ကောင်စီတပ်ဘက်မှ သေဆုံးသူ ၁၅ ဦးသေဆုံးပြီး နှစ်ဦး ဖမ်းဆီးခံရကြောင်း TNLA တပ်ဖွဲ့ထံမှ သိရသည်။

· တအာင်းဒေသ နမ့်ဆန်မြို့နယ်အတွင်း ဖြစ်ပွားခဲ့သော တိုက်ပွဲများကြောင့် ထွက်ပြေးတိမ်းရှောင် နေရ သည့် ဒေသခံတချို့ နေရပ်ပြန်လာခဲ့ကြသည်ဟု တအာင်းတပ်မတော် (PSLF/TNLA) ၏ သတင်းနှင့် ပြန်ကြာရေးဌာနမှ သတင်းထုတ်ပြန်ထားသည်။

· ကရင်နီ (ကယား) ပြည်နယ်၊ ဒီးမော့ဆိုမြိုနယ်၊ စံပြ (၆) မိုင် နှင့် ဘက်သလိန်ကျေးရွာဘက်ကို အကြမ်းဖက်စစ်တပ်က စစ်ကြောင်းထိုးခဲ့သည့်အတွက် ဒီဇင်ဘာ ၁၃ ရက်က ကရင်နီအမျိုးသားများ ကာကွယ်ရေး တပ် KNDF/B09 နှင့် ထိတွေ့တိုက်ပွဲ (၃) ကြိမ်ဖြစ်ပွားခဲ့ပြီး အဆိုပါ ထိတွေ့တိုက်ပွဲများအတွင်း အကြမ်းဖက် စစ်ကောင်စီတပ်ဘက်မှ ထိခိုက်ဒဏ်ရာရမှု (၃၀)ဦးခန့် ရှိခဲ့ကြောင်း ကရင်နီ အမျိုးသားများ ကာကွယ်ရေးတပ် (KNDF) က ယနေ့ ထုတ်ပြန်သည်။

စစ်ကောင်စီ

· စစ်ကောင်စီက လျှို့ဝှက်ဝယ်ယူထားသော ရုရှား တိုက်ခိုက်ရေး နှင့် ဘက်စုံသုံး Kamov KA-28 Helix ရဟတ်ယာဉ် ၂ စီး၊ SU-30 တိုက်လေယာဉ်များ၊ တရုတ် FTC 2000 G လေယာဉ်များကို စစ်ကောင်စီ ခေါင်းဆောင် မင်းအောင်လှိုင်က လေတပ် ၇၅ နှစ် ပြည့် စိန်ရတုနေ့တွင် တက်ရောက်ပြီး ထုတ်ပြခဲ့သည်။

· မြန်မာစစ်တပ်အနေဖြင့် ဝေဟင်၊ မြေပြင်၊ ရေပြင် နှင့် ရေအောက် Dimension လေးခု စလုံးတွင် စွမ်းအားပြည့် စစ်ဆင်နိုင်တော့မည်ဟု အာဏာသိမ်း စစ်ခေါင်းဆောင် မင်းအောင်လှိုင်က ဒီဇင်ဘာ ၁၅ ရက်က မိတ္ထီလာ တပ်နယ်ရှိ လေကြောင်း အတက်သင် လေတပ်စခန်းဌာနချုပ်တွင် ကျင်းပသည့် စစ်ကောင်စီလေတပ် ၇၅ နှစ်မြောက် စိန်ရတုနှစ်ပတ်လည်နေ့ အခမ်းအနားတွင် ကြွားလုံးထုတ်သည်။

· မြန်မာနိုင်ငံအစိုးရ နှင့် ကုလသမဂ္ဂစီမံကိန်း ဝန်ဆောင်မှုရုံးတို့ကြား လက်ရှိ နှင့် ဆက်လက်ပူးပေါင်း ဆောင်ရွက်ရန် ကိစ္စများကို စစ်ကောင်စီ နိုင်ငံခြားရေးဝန်ကြီး ဝဏ္ဏမောင်လွင် နှင့် ဗန်ကောက်မြို့ အခြေစိုက် ကုလသမဂ္ဂ စီမံကိန်းဝန်ဆောင်မှုရုံး၏ အာရှဒေသဆိုင်ရာ ညွှန်ကြားရေးမှူး မစ္စတာ ဆန်ဂျေးမာသာတို့ ဒီဇင်ဘာ ၁၅ ရက်က နေပြည်တော်တွင် တွေ့ဆုံဆွေးနွေးခဲ့ကြသည်။

· မန္တလေး နှင့် စစ်ကိုင်းတိုင်းတို့မှ ငလျင်ဒဏ်ကြောင့်ပျက်စီးသွားသည့် စေတီပုထိုးတော်များ နှင့် ရှေးဟောင်းအဆောက်အဦးများအား အမြန်ဆုံးပြုပြင်ထိန်းသိမ်းသွားမည်ဖြစ်သည်ဟု စစ်ကောင်စီ လက်အောက်ခံ ရှေးဟောင်းသုတေသန နှင့် အမျိုးသားပြတိုက်ဦးစီးဌာနမှ သိရသည်။

· တစ်ပတ်တွင် သုံးရက်ပြေးဆွဲပေးနေသည့် ရန်ကုန်-မန္တလေး အမှတ်(၅) အဆန်/အမှတ်(၆)အစုန် လေအိတ်ရထား ခရီးစဉ်ကို ဒီဇင်ဘာ (၂၁) ရက်ကနေ ဇန်နဝါရီ (၂) ရက်အထိ ကာလတိုအနေဖြင့် နေ့စဉ်ပြေးဆွဲပေးသွားမည် ဖြစ်သည်ဟု စစ်ကောင်စီ လက်အောက်ခံ မြန်မာ့မီးရထားကနေ သိရသည်။

· ယခု၂၀၂၂-၂၀၂၃ ဘဏ္ဍာနှစ်အတွင်း ပုလဲထုတ်လုပ်မှုအနေဖြင့် လျာထားချက်ထက် ပိုမိုထုတ်လုပ်နိုင်မည် ဖြစ်သည်ဟု စစ်ကောင်စီ လက်အောက်ခံ မြန်မာ့ပုလဲထုတ်လုပ်ရေးနှင့် ရောင်းဝယ်ရေးလုပ်ငန်းကနေ သိရသည်။

· NLD အစိုးရ၏ ဗဟိုဘဏ် ဒုဥက္ကဋ္ဌ ဦးဘိုဘိုငယ်ကို ဖမ်းဆီးပြီး ၂ နှစ်ပြည့်ခါနီးမှာ မန္တလေး အိုးဘိုထောင်တွင်း စစ်ကောင်စီတရားရုံးက ထောင်ဒဏ် နှစ် ၂၀ ချလိုက်ကြောင်း စစ်ကောင်စီ တရားရေးအသိုင်းအဝိုင်းကနေ စုံစမ်းသိရသည်။

ဒီဇင်ဘာ ၁၆ ရက် သုံးသပ်ချက်

· နိုင်ငံတကာအနေဖြင့် စစ်ကောင်စီကို အသိအမှတ်မပြုဘဲ ဖိအားပေးမှုများ ပိုမိုလုပ်ဆောင်လာသည်ကို တွေ့ရသည်။ ယခုလည်း NUG ၊ NUCC နှင့် CRPH ကို ထောက်ခံရန်၊ PDF နှင့် EAO များကို နည်းပညာ အကူအညီ ပေးရန်၊ စစ်ကောင်စီ၏ ဝင်ငွေရလမ်းများကို ပိတ်ဆို့ရန် ပါဝင်သည့် အမေရိကန် အမျိုးသား ကာကွယ်ရေး ဥပဒေကို အမေရိကန်အထက်လွှတ်တော်က အတည်ပြုလိုက်ပြီ ဖြစ်သည့်အတွက် စစ်ကောင်စီကို ပိုမိုဖိအားပေးလာနိုင်တော့မည် ဖြစ်သည်။

· နိုင်ငံတစ်ဝန်း လေကြောင်းကနေ အကြမ်းဖက်တိုက်ခိုက်မှုများ ပြုလုပ်နေသည့် စစ်ကောင်စီသည် လျှို့ဝှက်ဝယ်ယူထားသော ရုရှား တိုက်ခိုက်ရေး နှင့် တိုက်လေယာဉ်များကို ထုတ်ပြပြီး စစ်ကောင်စီ ခေါင်းဆောင်က ဝေဟင်၊ မြေပြင်၊ ရေပြင် နှင့် ရေအောက် လေးခုစလုံးတွင် စစ်ဆင်နိုင်တော့မည်ဟု မစားရ ဝခမန်း အရှက်မဲ့စွာ လေလုံးထွားပြနေသည်ကို တွေ့ရသည်။