ပါကစ္စတန်တွင် လူနည်းစုဖြစ်သော အဟ်မဒီမွတ်စလင်အသိုက်အဝန်းသည် အမြဲလိုလို ခွဲခြားဆက်ဆံခံနေရပြီး တစ်ခါတစ်ရံတွင် ဥပဒေဆိုင်ရာနှင့် အစိုးရအာဏာပိုင်တို့၏ အရေးယူမှုများကိုလည်း ကြုံနေရကြောင်း Asian Lite မီဒီယာက ဖော်ပြသည်။

ပါကစ္စတန်နိုင်ငံ ပန်ဂျပ်ပြည်နယ်မှ လူတစ်စုသည် မကြာသေးခင်က အဟ်မဒီလူနည်းစုဝင်တို့၏ သင်္ချိုင်းအုတ်ဂူများကို ဖျက်ဆီးခဲ့သည်။

သံသယရှိသူများက သင်္ချိုင်းမြေပုံမှတ်တိုင် ၄ ခုကို ဖျက်ဆီးကာ အဟ်မဒီ ဆန့်ကျင်ရေး စာသားများ ရေးခြစ်ခဲ့ကြောင်း Friday Times က ဖော်ပြသည်။

ထိုဖြစ်စဉ်သည် ဟာဖီဇာဘတ်ခရိုင် ပရမ်ကော့ခ်အရပ်တွင် နိုဝင်ဘာ ၂၂ ရက်က ဖြစ်ပွားခဲ့ပြီး နောက်မှ သိရှိခဲ့ခြင်းဖြစ်ကြောင်း Jamaat-e-Ahmadiyya အဖွဲ့က ပြောသည်။

ပန်ဂျပ်ပြည်နယ်မှရဲများက ဖေဖော်ဝါရီလတွင် အဟ်မဒီအသိုက်အဝန်း၏ အုတ်ဂူ ၄၅ လုံးကို ဖျက်ဆီးခဲ့သည့် သင်္ချိုင်းတွင်ပင် ယခုဖြစ်ရပ် ဖြစ်ပွားခဲ့ကြောင်း Jamaat-e-Ahmadiyya အဖွဲ့၏ ပြောရေးဆိုခွင့်ရှိ အာမီရာ မာမွတ်က ဆိုသည်။

ပါကစ္စတန်တွင် လူနည်းစုအသိုက်အဝန်းအပေါ် မကျေနပ်မှုများ ကြီးထွားလာခြင်းကို ဝမ်းနည်းစရာကောင်းသော ယခုဖြစ်ရပ်က သက်သေပြနေသည်ဟု မာမွတ်က ပြောသည်။