တရုတ်သည် ကမ္ဘာ့စိန်ခေါ်မှုများစွာထဲတွင် မိတ်ဖက်ဖြစ်သလို စနစ်ကျသော ယှဉ်ပြိုင်ဘက်လည်းဖြစ်ကြောင်း ဂျာမနီနိုင်ငံခြားရေးဝန်ကြီး အန်နာလီနာဘဲဘော့က ဒီဇင်ဘာ ၅ရက်တွင် ပြောကြားလိုက်သည်။
နယူးဒေလီမြို့၌ အိန္ဒိယပြည်ပရေးရာဝန်ကြီး အက်စ်ဂျိုင်ရှန်ကာနှင့် ပြုလုပ်သည့် ပူးတွဲသတင်းစာရှင်းလင်းပွဲတွင် အန်နာလီနာက အထက်ပါအတိုင်း မှတ်ချက်ပြုလိုက်ခြင်းဖြစ်သည်။
တရုတ်ဆိုင်ရာ စိုးရိမ်ပူပန်မှုများနှင့်ပတ်သက်ပြီး ဘဲဘော့က "ဥရောပမိတ်ဆွေတွေအနေနဲ့ ညွန့်ပေါင်းသဘောတူစာချုပ်မှာ ထည့်သွင်းထားတဲ့ ၃ ပွင့်ဆိုင်ချဉ်းကပ်မှုအရ လုပ်ဆောင်ပါတယ်။ အပိုင်း ၃ ပိုင်းပါတဲ့ မဟာဗျူဟာကို အကောင်အထည်ဖော်နေပါတယ်။ တရုတ်ကို ကမ္ဘာ့စိန်ခေါ်မှုတွေထဲက မိတ်ဖက်၊ ပြိုင်ဘက်နဲ့ စနစ်ကျတဲ့ ယှဉ်ပြိုင်ဘက်အဖြစ် မြင်ပါတယ်” ဟု တုံ့ပြန်ခဲ့သည်။
တရုတ်သည်လွန်ခဲ့သည့်နှစ်အနည်းငယ်အတွင်း များစွာပြောင်းလဲလာကြောင်းနှင့် ကြုံတွေ့ရမည့် စိန်ခေါ်မှုများကို အကဲဖြတ်ရန် အရေးကြီးပြီဖြစ်ကြောင်းလည်း ဘဲဘော့က သတင်းစာရှင်းလင်းပွဲတွင် ပြောကြားခဲ့သည်။
တရုတ်မဟာဗျူဟာတွင် ပါဝင်သော အချက်အသစ်မှာ အင်ဒို-ပစိဖိတ် မဟာဗျူဟာဖြစ်ပြီး ဂျာမနီသည် အင်ဒို-ပစိဖိတ်ဒေသတွင် ကျယ်ကျယ်ပြန့်ပြန့် ပါဝင်လာမည်ဖြစ်ကြောင်း ဘဲဘော့က ဆိုသည်။
ဂျာမနီသည် ယခုအချိန်အထိ တရုတ်ကို ပိုမို အာရုံစိုက်နေရဆဲဖြစ်သလို အိန္ဒိယ၊ ဂျပန်တို့နှင့် ဆက်ဆံရေးရှိသော်လည်း တခြားအိမ်နီးချင်းနိုင်ငံများစွာနှင့်ဆက်ဆံရေးမရှိဟု ဆိုသည်။
ဂျာမနီ၏စံတန်ဖိုးများကိုအလေးမထားသောနိုင်ငံတစ်ခုကို အလွန်အမင်း မှီခိုနေရသည်ကိုလည်း ဘဲဘော့က ဝန်ခံခဲ့သည်။
