အမျိုးသားညီညွတ်ရေး အစိုးရ

· ပြည်သူ့ကာကွယ်ရေးတပ်တွေနဲ့ ပူးပေါင်းတိုက်ပွဲဝင်နေသည့် CDM စစ်သည်တစ်ဦး၏ ဇနီးအတွက် မီးဖွားစားရိတ်ထောက်ပံ့ပေးခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက သိရသည်။

· မင်းအောင်လှိုင်ဦးဆောင်သည့် အကြမ်းဖက်စစ်အုပ်စုဟာ နိုင်ငံတော်အာဏာကို လက်နက်အားကိုး၊ လုယူပြီး နောက် ကျေးလက်ရောမြို့ပြပါမကျန် ပြည်သူများ၏ နေအိမ်ကို အတင်းအဓမ္မ ဖျက်ဆီးနေခြင်းကြောင့် ကျူးလွန်သည့်အကြမ်းဖက်စစ်ကောင်စီဝန်ထမ်းများနှင့် အကြမ်းဖက်စစ်‌ကောင်စီအပေါင်းအပါများကို ထိထိ ရောက်ရောက်အရေးယူမည်ဖြစ်ကြောင်း အမျိုးသားညီညွတ်ရေးအစိုးရက ထုတ်ပြန်ကြေညာသည်။

· ရန်ကုန်နှင့် မန္တလေးလို မြို့ပြတွင် နေအိမ်တွေကိုဖြိုဖျက်ခိုင်းနေခြင်းသည် လူထု ပိုမိုကျပ်တည်း ခက်ခဲ စေရန်နှင့် ပြည်သူ့တော်လှန်ရေးအားပျော့လာစေရန် စစ်ကောင်စီဘက်က ဆောင်ရွက်မှုဆိုပြီး အမျိုးသား ညီညွတ်ရေး အစိုးရမှ ပြောသည်။

တော်လှန်ရေး လှုပ်ရှားမှုများ

· လောင်းလုံးမြို့နယ် ဒေသခံပြည်သူများ ဦးဆောင်ကာ ယနေ့ ဒီဇင်ဘာလ ၁၁ ရက်နေ့တွင် စစ်အာဏာရှင် တော်လှန်ရေး ဆန္ဒပြခဲ့ကြောင်း သိရသည်။

· မန္တလေးတိုင်း၊ ဝမ်းတွင်းမြို့နယ်၊ သဲတောလေးကျေးရွာတွင် နေထိုင်သော ပျူစောထီး မောင်ရှိန်ကို WTRF အဖွဲ့မှ ပစ်ခတ်တိုက်ခဲ့ပြီး သေဆုံးသွားကြောင်း ယင်းအဖွဲ့ထံမှ သိရသည်။

· ထိုင်းနိုင်ငံ၊ ဘန်ကောက်မြို့၊ ဖိကဆင် ၁၂၂ လမ်း ဆွမ်းလောင်းပွဲ၌ UG Family အဖွဲ့က ယနေ့ ဒီဇင်ဘာလ ၁၁ ရက်နေ့တွင် နွေဦးတော်လှန်ရေး ရန်ပုံငွေ ရရှိရေး အလှူခံ ရရှိငွေ လိုက်လံကောက်ခံလျက်ရှိပြီး ဘတ်ငွေ ၁၀၈၀၀ ဘတ် ရရှိကြောင်း သိရသည်။

· တောင်ကိုရီးယားနိုင်ငံ၊အူဆန်မြို့နှင့် ဂွမ်ဂျူးလေး (မန်းရတနာပုံမြန်မာဆိုင်) များတွင် မြန်မာနိုင်ငံစစ်အာဏာ သိမ်းမှု အလိုမရှိကြောင်း ဆန့်ကျင်ဆန္ဒပြပွဲ၊နွေဦးတော်လှန်ရေးထောက်ပို့နိုင်ရေး အတွက်ရန်ပုံငွေရရှိရေး နှိုးဆော် စည်းရုံးရေးပွဲများကို ဒယ်ဂူးဆရာတော် ဦးဆောင်၍ ကျင်းပသည်။

· မလေးရှား NLD(OC)က ကြီးမှူး၍ စစ်တပ်၏ စစ်ကြောင်းထိုး၊ သတ်ဖြတ်၊ မီးရှို့မှုကြောင့် အတိဒုက္ခ ရောက် နေရ သည့် စစ်ဘေးရှောင်ပြည်သူများ အတွက် ရန်ပုံငွေ ရှာဖွေရေး ဖျော်ဖြေပွဲကို မလေးရှားနိုင်ငံ Selayan ရှိ IDEAL Convention Centerတွင် ကျင်းပခဲ့ကြသည်။

· အမေရိကန်၊ နယူးယောက်တွင် "လူ့အခွင့်အရေးတွေပြန်ရဖို့ အမိမြန်မာပြည် ကိုကယ်တင်စို့ " ကြွေးကြော်သံဖြင့် ချီတက် ဆန္ဒပြခဲ့ကြသည်။

· အိန္ဒိယနိုင်ငံ ၊ မီဇိုရမ်ပြည်နယ် ၊ အိုက်ဇောလ်မြို့တွင် အပြည်ပြည်ဆိုင်ရာလူ့အခွင့်အရေးနေ့နှင့် စစ်ဘေးရှောင်များအတွက် ရန်ပုံငွေဈေးရောင်းပွဲကို Network for Myanmar မှ ဦးစီးကျင်းပခဲ့ကြောင်း သိရသည်။

· အကြမ်းဖက်စစ်တပ်နှင့်ပူးပေါင်းဆောင်ရွက်နေပြီး အမေရိကန်ဒေါ်လာ သန်း ပေါင်း များစွာ စစ်ကောင်စီ အတွက် ဝင်ငွေရှာပေးနေသည့် ထိုင်း PTT ကုမ္ပဏီ ၏ ထုတ်ကုန်များ၊ ဖက်စပ် ကုမ္ပဏီများ၏ ထုတ်ကုန်များကို သပိတ် မှောက် ဆန့် ကျင်ရန် ပြည်သူများကို သွေးစွန်း ငွေဖြတ်တောက်ရေးအဖွဲ့က နှိုးဆော် သည်။

· ပဲခူးတိုင်း၊ ပြည်ခရိုင်၊ ပေါက်ခေါင်းမြို့နယ်၊ လှည်းကူးကျေးရွာအုပ်စု၊ ကောင်းစည်ကျေးရွာ အနောက်ဘက်ရှိ စစ်တပ်ပိုင် Mytel တာဝါတိုင်ကို ပြည်သူ့ကာကွယ်ရေးတပ်ဖွဲ့များဖြစ်ကြသည့် ရိုးမရာဇာအဖွဲ့နှင့် သခင်ကိုယ်တော် မှိုင်းတို့က မိုင်းဆွဲတိုက်ခိုက်ခဲ့ကြောင်း သိရသည်။

· ရန်ကုန်တွင် စစ်အာဏာရှင် ဆန့်ကျင်ရေးနှင့် သေဒဏ်ကျ အကျဉ်းသား များ အတွက် လူငယ်များက ယနေ့ နံနက်ပိုင်း မြို့နေရာအနှံ့အပြားတွင် ဆန္ဒပြကြ သည်။

· အကြမ်းဖက်စစ်အာဏာရှင် အမြစ်ဖြတ် ချေမှုန်းရေး စစ်ကိုင်းတိုင်း၊ ယင်းမာပင်-ဆားလင်းကြီး ရွာပေါင်းစုံ သပိတ်စစ်ကြောင်းသည် ဒီဇင်ဘာ ၁၁ ရက် ယနေ့နံနက်၌ ၆၄၀ ရက်မြောက် အဖြစ် ချီတက်ဆန္ဒပြကြသည်။

· မကွေးတိုင်း၊ မြိုင်မြို့နယ်တွင်ခရီးသွားပြည်သူများကို ဆက်ကြေး ကောက် နေ သည့် ကိုင်းတောမရေစက်တွင်း စောင့် အကြမ်း ဖက်စစ်ကောင်စီ ၅ ဦးကို မိုင်း ဆွဲတိုက်ခိုက်ရာ ၂ ဦးသေပြီး နှစ်ဦးဒဏ်ရာရသွားကြောင်း မြိုင် ပကဖ တပ်ရင်း ၁ ခေါင်းဆောင် ဗိုလ်လင်္ကျာကပြောသည်။

· တနင်္သာရီတိုင်း၊ ပုလောမြို့နယ်ရှိ လက္ကူးကျေးရွာတွင် ဒေသခံများ၏ တိုင်တန်းချက် အရ ပြည်သူ့ ကာကွယ်ရေး တပ်ဖွဲ့က ရှောင်တခင် ဝင်ရောက်စစ်ဆေးရာ မူးယစ်ဆေးဝါးများ သိမ်းဆည်းရမိကြောင်း မြိတ်ခရိုင် တပ်ရင်း (၁) ပြန်ကြားရေးအဖွဲ့ထံက သိရသည်။

· တနင်္သာရီတိုင်း လောင်းလုံးမြို့နယ်ရှိ မောင်းမကန်ကျေးရွာရှိ နယ်မြေရဲစခန်း တိုက်ခိုက်ခံရပြီး နောက် အဆိုပါရဲစခန်းမှ ရဲတပ်ဖွဲ့ဝင်သုံးဦး လက်နက်နှင့်အတူထွက်ပြေးသွားကြောင်း ဒေသခံများ၏ ပြောဆိုချက်အရ သိရသည်။

တိုင်းရင်းသား လက်နက်ကိုင်များ

· ပအိုဝ်းပြည်သူများအနေဖြင့် ပအိုဝ်းအမျိုးသားလွတ်မြောက်ရေးတိုက်ပွဲ၊ စစ်အာဏာရှင်စနစ်အမြစ်ပြတ်ချေ မှုန်းရေးနှင့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး တိုက်ပွဲတို့တွင် ပအိုဝ်းအမျိုးသား ဖက်ဒရယ်ကောင်စီ(PNFC) နှင့်အတူ ဆထက်ထမ်းပိုးလက်တွဲ၍ တိုက်ပွဲဝင်ကြရန် PNFCက ယနေ့ ပန်ကြားလိုက်သည်။

· ချင်းအမျိုးသားအဖွဲ့ချုပ် (CNO) ဗဟိုကောင်စီ၏ (၂၉-၁၀-၂၀၂၂) ရက်နေ့ ပုံမှန်အစည်းအဝေး ဆုံးဖြတ်ချက် အရ “ချင်းအမျိုးသားအဖွဲ့ချုပ် (ကလေးဒေသကော်မတီ)” အား “ချင်းအမျိုးသားအဖွဲ့ချုပ် (အထက်ချင်းတွင်း ဒေသကော်မတီ)” ဟုအမည်ပြောင်းလဲသတ်မှတ်လိုက်သည်။

· ကရင်အမျိုးသားအစည်းအရုံး ဗဟိုဌာန ချုပ်တွင် ပြုလုပ်သည့် ၇၄ကြိမ်မြောက် နိုင်ငံတကာလူ့အခွင့်အရေးနေ့ အခမ်းအနား၌ “ကိုယ့်ကျိုးမစွန့်ဘဲ ခေါင်းဆောင်လုပ်ရင် မင်းအောင်လှိုင်လို ငွေဓနတွေ နည်းမှာမဟုတ်ဘူး”ဟု ပဒိုစောသမိန်ထွန်းက ပြောသည်။

· ရှမ်းပြည်နယ်(မြောက်ပိုင်း)၊ နမ့်ဆန်မြို့အနီးတွင် စစ်ကောင်စီတပ်နှင့် တအာင်းတပ်(TNLA)တို့အကြား တိုက်ပွဲဆက်လက်ဖြစ်ပွားနေကာ ဒေသခံ ၁၀၀၀ ကျော် ထွက်ပြေးတိမ်းရှောင်နေရကြောင်း PSLF/TNLA ၏ သတင်းထုတ်ပြန်ချက်အရ သိရသည်။

စစ်ကောင်စီ

· လူ့အခွင့်ရေးကို လေးစားလိုက်နာကျင့်သုံးသည့် လူ့အဖွဲ့စည်းတစ်ရပ် ဖြစ်ထွန်းလာရေးအတွက် သက်ဆိုင်သူ အားလုံးဝိုင်းဝန်းဆောင်ရွက်ရန် အာဏာသိမ်း စစ်ခေါင်းဆောင်မင်းအောင်လှိုင်က ပြောကြား ခဲ့သည်။

· တနင်္သာရီတိုင်း၊ ပင်လယ်ပြင်တွင် စက်လှေပျက်၍ မျောပါနေသည့် ရိုဟင်ဂျာ ၁၅၀ ကျော်ကို စစ်ကောင်စီ၏ မြိတ်ကျွန်းစုရေတပ်စခန်းက ခေါ်ယူထိန်းသိမ်း ထားကြောင်း သိရသည်။

· ဂုဏ်ထူးဆောင်ဘွဲ့ ရရှိသူများအား (၇၅) နှစ်မြောက် စိန်ရတုလွတ်လပ်ရေးနေ့ကို ဂုဏ်ပြုသောအားဖြင့် ချီးမြှင့်မည်ဖြစ်ရာ ကိုယ်တိုင်သော်လည်းကောင်း ၊ မိသားစုဝင်တစ်ဦးမှ ကိုယ်စားသော်လည်းကောင်း ဂုဏ်ထူးဆောင်ဘွဲ့ ချီးမြှင့်အပ်နှင်းခြင်းအခမ်းအနားသို့ တက်ရောက် နိုင်ရေးအတွက် ဆက်သွယ်ကြရန် စစ်ကောင်စီက ထုတ်ပြန်ထားသည်။

ဒီဇင်ဘာ ၁၀ ရက် သုံးသပ်ချက်

· အာဏာသိမ်းပြီးကတည်းက မင်းအောင်လှိုင်ဦးဆောင်သည့်စစ်တပ်သည် နိုင်ငံအနှံ့ လူ့အခွင့်အရေး ဆိုးရွာစွာ ဖောက်ဖျက်ဖိနှိပ်မှုများရှိနေသော်လည်း အကြမ်းဖက်မင်းအောင်လှိုင်က လူ့အခွင့်အရေးနေ့ အခမ်းအနားတွင် လူ့အခွင့်အရေးကို လေးစားလိုက်နာကြပါ၊ သက်ဆိုင်သူများ အားလုံးဝိုင်းဝန်း ဆောင်ရွက်ကြပါဟု နှုတ်မှပြောထွက်ရဲသည်ကို အံ့ဩစိတ်ပျက်ဖွယ်တွေ့ရသည်။

· မြောက်ပိုင်းမဟာမိတ်အဖွဲ့ဝင်ဖြစ်သည့် အေအေနှင့်အပစ်ရပ်ပြီးနောက် ရုတ်တရက် TNLA နယ်မြေတွင် အလုံးအရင်းဖြင့် ထိုးစစ်ဆင်လာသည်။သို့သော် TNLA မှ အငိုက်မိသွားခြင်းမရှိဘဲ အကြမ်းဖက်စစ်တပ်ကို ခုခံနိုင်နေတာကြောင့် လေကြောင်းပစ်ကူ၊လက်နက်ကြီးပစ်ကူ၊လေကြောင်းမှ စစ်ကူချထားပေးခြင်းများ လုပ်ဆောင်နေရသည်။တိုက်ပွဲမှာ ဆက်တိုက်ဖြစ်နေသည့်အတွက် အကြမ်းဖက်စစ်တပ်၏ လက်နက်ကိုင် ခြင်းမနိုင်လျှင် ပြည်သူကို ဒုက္ခပေးလေ့ရှိတာကြောင့် ဒေသခံထောင်နှင့်ချီ၍ နေရပ်စွန့်ခွာထွက်ပြေး လာနေရသည်။