ဩစတြေးလျရဲဌာနသည် အမေရိကန်ကို အဓိကပစ်မှတ်ထားသော အွန်လိုင်းမှ ငွေကြေးလိမ်လည်မှုကျူးလွန်သည့် တရုတ်နိုင်ငံသား ၄ ဦးကို ဒီဇင်ဘာ ၉ ရက်တွင် တရားစွဲဆိုခဲ့ပြီး ၎င်းတို့အဖွဲ့ကြောင့် ကမ္ဘာတစ်ဝန်းတွင် အမေရိကန်ဒေါ်လာ သန်း ၁၀၀ ထက်မနည်း ဆုံးရှုံးမှုများ ဖြစ်ပေါ်စေခဲ့သည်ဟု အာဏာပိုင်များက ပြောသည်။

ခေတ်မီဆန်းပြားသော လိမ်လည်မှုတွင် နိုင်ငံခြားငွေလဲလှယ်ရေးလိုင်စင်ရထားသောတရားဝင် အွန်လိုင်းအရောင်းအဝယ်ပလက်ဖောင်းများ ပါဝင်ပတ်သက်နေပြီး ၎င်းတို့က ဖောက်သည်များအား ဆော့ဖ်ဝဲလ်ထည့်ပေးထားသည်ဟု ဩစတြေးလျရဲတပ်ဖွဲ့ (AFP) က ပြောသည်။

တရားခံများမှာ ဆစ်ဒနီမှဖြစ်ပြီး နစ်နာသူအများစုမှာ အမေရိကန်မှဖြစ်ကြသည်။

အကွက်ချလုပ်ဆောင်သော ရာဇဝတ်ဂိုဏ်းအဖွဲ့သည် ရင်းနှီးမြှုပ်နှံမှုအခွင့်အလမ်းများ မပြောမီ ပစ်မှတ်များ၏ ယုံကြည်မှုကို ရယူရန် သတင်းစကားပို့သော ပလက်ဖောင်းများ၊ ချိန်းတွေ့ခြင်းနှင့် အလုပ်ဆိုင်ရာဝက်ဘ်ဆိုက်များအပါအဝင် လူမှုအင်ဂျင်နီယာပညာများကို ရောနှောအသုံးချသည်။

ပစ်မှတ်ထားခံရသူများအား နိုင်ငံခြားငွေနှင့် ခရစ်ပ်တိုငွေကြေးတို့ဖြင့် အရောင်းအဝယ်လုပ်ရသည့် ရင်းနှီးမြှုပ်နှံမှုအက်ပလီကေးရှင်းအတုနှင့်အစစ် ၂ မျိုးလုံးနှင့်ချိတ်ဆက်ပေးထားသည်။ လိမ်လည်သူများသည် ရင်းနှီးမြှုပ်နှံမှုအပေါ် ရလာသည့်အကျိုးအမြတ်ကို လိမ်လည်ဖော်ပြနိုင်စေရန် ၎င်းအက်ပလီကေးရှင်းများကိုလည်း ထိန်းချုပ်ထားသည်။

ဩစတြေးလျရဲတပ်ဖွဲ့မှ စုံထောက် ဆာလမ်ဇိတ်ကာက အွန်လိုင်းပေါ်တွင်သာ တွေ့မြင်ဖူးသည့် လူများနှင့် နိုင်ငံခြားငွေလှယ်မှုလုပ်ငန်း၊ ခရစ်ပ်တိုငွေကြေး သို့မဟုတ် စွန့်စားလုပ်ဆောင်သော ရင်းနှီးမြှုပ်နှံမှုများကို ရှောင်ကြဉ်ရန် ထုတ်ပြန်ချက်တွင် အလေးထားဖော်ပြထားသည်။

အဖမ်းခံထားရသူ ၄ ဦးသည် လိမ်လည်မှုလုပ်ငန်းများကို အစစ်အမှန်ထင်စေရန် ဩစတြေးလျကုမ္ပဏီများတွင် မှတ်ပုံတင်ထားပြီး ရရှိလာသောအကျိုးအမြတ်ငွေမည်းများကို ခဝါချရန် ဩစတြေးလျလုပ်ငန်းဘဏ်အကောင့် များလည်း ဖွင့်လှစ်ထားသည်။