လူအစုအပြုံလိုက် သတ်ဖြတ်ခံရမှုနှင့် ကြုံတွေ့ရနိုင်သည့် အန္တရာယ်ရှိသော နိုင်ငံများစာရင်းတွင် ပါကစ္စတန်သည် ထိပ်ဆုံးတွင် ရှိနေသည်ဟု အမေရိကန် think-tank (နိုင်ငံရေး၊ စီးပွားရေး၊ လူမှုရေးအကြံပေးအဖွဲ့) တစ်ခုဖြစ် သည့် Early Warning Project ၏ အစီရင်ခံစာသစ်တစ်ရပ်တွင် ဖော်ပြသည်။

“ပါကစ္စတန်မှာ တီရစ်-အီ-တာလီဘန် ပါကစ္စတန် (တီတီပီ) အဖွဲ့ရဲ့ အကြမ်းဖက်မှုတွေ တိုးလာတာ အပါအဝင် လုံခြုံရေးနဲ့ လူ့အခွင့်အရေးဆိုင်ရာ စိန်ခေါ်မှု ပေါင်းစုံနဲ့ ရင်ဆိုင်နေရတယ်” ဟု Early Warning Project ၏ အစီရင်ခံစာတွင် ထုတ်ဖော်ထားကြောင်း al Arabiya News က ဖော်ပြသည်။ Early Warning Project သည် လူအများအပြား အကြမ်းဖက်ခံရနိုင်သည့် အန္တရာယ်ရှိသော နိုင်ငံများကို ခွဲခြားရွေးထုတ်သည့် သုတေသန အဖွဲ့တစ်ခုဖြစ်သည်။

ပါကစ္စတန်တာလီဘန် (TTP) အဖွဲ့၏ အကြမ်းဖက်မှုက နိုင်ငံရေး၊ စီးပွားရေး အကျပ်အတည်းများနှင့် ရင်ဆိုင်ကြုံတွေ့ရလျက်ရှိသည့် ပါကစ္စတန်နိုင်ငံအတွက် အဓိကစိန်ခေါ်မှုတစ်ခု ဖြစ်ကြောင်း အစီရင်ခံစာတွင် ရေးသားသည်။

တီရစ်-အီ-တာလီဘန် ပါကစ္စတန် (TTP) အဖွဲ့သည် အစိုးရနှင့် သဘောတူထားသည့် အပစ်ရပ်စဲရေး သဘောတူညီချက်ကို မကြာသေးခင်က ဖျက်သိမ်းခဲ့မှုက ပါကစ္စတန်၏ လုံခြုံရေးအတွက် ကြီးလေးသော စိန်ခေါ်မှုတစ်ခု ဖြစ်စေခဲ့သည်။

အဆိုပါအဖွဲ့သည် ပြီးခဲ့သည့် ဇွန်လက အစိုးရနှင့် သဘောတူခဲ့သော အပစ်ရပ်စဲမှုကို ဖျက်သိမ်းပြီး နိုင်ငံတစ်ဝန်း တိုက်ခိုက်မှုများ လုပ်ဆောင်ရန် အဖွဲ့သားများကို ညွှန်ကြားထားသည်။