အာဖဂန်နစ္စတန်တွင် ယမန်နှစ် ဩဂုတ်လလယ်က အမေရိကန်တပ်ဖွဲ့များ ပြန်လည်ထွက်ခွာပြီး တာလီဘန်တို့ အာဏာပြန်ရပြီးနောက်ပိုင်း အဆိုပါနိုင်ငံ၏ စီးပွားရေးသည် နက်ရှိုင်းသော အကျပ်အတည်းတစ်ခုအောက် ကျရောက်ခဲ့ရသလို အထူးတလည်စိုးရိမ်ဖွယ်ရာ စားနပ်ရိက္ခာ ရှားပါးမှုကိုလည်း ဖြစ်ပေါ်စေခဲ့သည်။
ထို့ပြင် ပြည်သူ ၉၇ ရာခိုင်နှုန်းသည်လည်း ဆင်းရဲနွမ်းပါးမှုမျဉ်းအောက်တွင် ကျရောက်နေကြောင်း ရွှေ့ပြောင်းသွားလာနေထိုင်ခြင်းဆိုင်ရာ နိုင်ငံတကာ အဖွဲ့အစည်း (IOM) က အီးယူမိတ်ဖက်များနှင့် ချိတ်ဆက်လုပ်ဆောင်သည့် စစ်တမ်းတစ်ရပ်တွင် ဖော်ပြသည်။
မိုးခေါင်မှုနှင့် ညံ့ဖျင်းသည့် စီမံအုပ်ချုပ်မှုတို့ကြောင့် အာဖဂန် လူဦးရေ၏ ထက်ဝက်ကျော်သည် အစားအစာ မလုံလောက်မှုနှင့် အကြီးအကျယ် ကြုံတွေ့နေရပြီး အဆိုပါ အခြေအနေက ၎င်းတို့၏ အသက်မွေးဝမ်းကျောင်းများ အပေါ် အပျက်သဘောဆောင် သက်ရောက်မှုဖြစ်စေသလို ကျေးလက်ဒေသများရှိ ပြည်သူအများ အပြားအတွက်လည်း ဝင်ငွေရင်းမြစ်များကို ပြောင်းလဲခွဲထုတ်ရန် ရွေးချယ်စရာ အနည်းအကျဉ်းမျှသာ ရှိစေကြောင်း TOLOnews က ဖော်ပြသည်။
“အာဖဂန် လူဦးရေရဲ့ ၆၀ ရာခိုင်နှုန်းနီးပါးဟာ ရာသီဥတုဒဏ်ကြောင့် ထိခိုက်ခံစားနေရတယ်” ဟု စစ်တမ်းတွင် ဖော်ပြသည်။
အာဖဂန်နစ္စတန်ရှိ အားရစရာမကောင်းသည့် ဂျုံထောက်ပံ့မှုများနှင့် ပတ်သက်ပြီး စိုးရိမ်ပူပန်စရာများကိုလည်း စိုက်ပျိုးရေး၊ ဆည်မြောင်းနှင့် မွေးမြူရေးဝန်ကြီးဌာနက ထုတ်ဖော်ခဲ့သည်။
“အာဖဂန်နစ္စတန်မှာ ရာသီဥတု ပြောင်းလဲမှုတွေနဲ့အတူ နှစ်စဉ် ဂျုံ မက်ထရစ်တန်ချိန် ၄ ဒသမ ၇ သန်းကနေ ၅ သန်းအကြား ကျွန်တော်တို့ ထုတ်လုပ်နေပါတယ်” ဟု ဝန်ကြီးဌာနမှ အရာရှိတစ်ဦးဖြစ်သည့် မိုဟာမက် ကာဆင် အိုဘိုင်ဒီက ပြောသည်။
