ရှင်ကျန်းတွင် လူ့အခွင့်အရေးချိုးဖောက်မှုများတွင် ပါဝင်ပတ်သက်နေသည့် ကုမ္ပဏီများတွင် ကနေဒါပင်စင် ရန်ပုံငွေများစွာကို ရင်းနှီးမြှုပ်နှံထားကြောင်း ဗြိတိန်အခြေစိုက် လူ့အခွင့်အရေးအဖွဲ့ Hong Kong Watch နှင့် Sheffield Hallam တက္ကသိုလ်မှ ပါမောက္ခလော်ရာ မာဖီ၏ အစီရင်ခံစာတွင် ဖော်ပြထားသည်။

ကနေဒါဖက်ဒရယ်ရန်ပုံငွေ ၃ခု နှင့် ပြည်နယ်ပင်စင်ရန်ပုံငွေ ၆ ခုထက်မနည်းသည် ရှင်ကျန်းရှိ လူ့အခွင့် အရေး ချိုးဖောက်မှုများတွင် ပတ်သက်နေသည့် တရုတ်ကုမ္ပဏီများတွင် ရင်းနှီးမြှုပ်နှံထားကြောင်း Toronto Star က သတင်းဖော်ပြလိုက်သည်။

ဝီဂါလူနည်းစုအား အတင်းအကျပ် လုပ်အားပေးစေခိုင်းခြင်း သို့မဟုတ် ထိန်းသိမ်းထားသည်ဟု စွပ်စွဲခံထားရ သည့် တရုတ် အစိုးရ၏ အလုပ်သမားလွှဲပြောင်းရေး အစီအစဉ်တွင် ပါဝင်နေသည့် ကုမ္ပဏီများတွင်လည်း အနောက်နိုင်ငံ အများအပြား၏ ပင်စင်ရန်ပုံငွေများကို ရင်းနှီးမြှုပ်နှံထားသည်။

"လူသားမျိုးနွယ်အပေါ် ကျူးလွန်သော ရာဇဝတ်မှုအား သွယ်ဝိုက်သောအားဖြင့် ရန်ပုံငွေထောက်ပံ့ခြင်း-- စုဆောင်းငွေများက တရုတ်ထိန်းသိမ်းရေးစခန်းများနှင့် အတင်းအဓမ္မလုပ်အားပေးစေခိုင်းသူများကို ထောက်ပံ့ ပေးနေခြင်း" ခေါင်းစဉ်ဖြင့် အစီရင်ခံစာတွင် ကနေဒါရန်ပုံငွေလုပ်ငန်းများသည် အတိုင်းအတာအမျိုးမျိုးဖြင့် ရင်းနှီးမြှုပ်နှံထားကြောင်း စွပ်စွဲခံထားရသည်ဟု Toronto Star က ဖော်ပြခဲ့သည်။

အစီရင်ခံစာတွင် ရင်းနှီးမြှုပ်နှံမှုစီမံခန့်ခွဲမှုကုမ္ပဏီ Morgan Stanley မှ လုပ်ကိုင်နေသော ရင်းနှီးမြှုပ်နှံမှုရန်ပုံငွေ များဖြစ်သည့် အဓိကကမ္ဘာလုံးဆိုင်ရာအညွှန်းကိန်း ၃ ခုမှ အဓိက စတော့များကို သုံးသပ်လေ့လာခဲ့သည်။

Morgan Stanley ၏ China Index တွင် ဖော်ပြထားသော ကုမ္ပဏီ ၁၂ ခုအနက် ၆ ခုသည် ထိန်းသိမ်းရေး စခန်းများတည်ဆောက်လုပ်ရာတွင် ပါဝင်နေပြီး ၆ ခုသည် အလုပ်သမား လွှဲပြောင်းမှုတွင် ပါဝင်နေကြောင်း လေ့လာသူများက ပြောကြားခဲ့သည်။

ထွန်းသစ်စဈေးကွက်အညွှန်းကိန်းတွင် ကုမ္ပဏီ ၁၃ ခုမှ ၇ ခုသည် တရုတ်အစိုးရက ပံ့ပိုးပေးသော အလုပ်သမား လွှဲပြောင်းရေးအစီအစဉ်များမှ အလုပ်သမားများကို အသုံးပြုခဲ့ပြီး စခန်းတည်ဆောက်ရေးတွင် ၆ ခု ပါဝင်ခဲ့သည် ဟု အစီရင်ခံစာတွင် ဖော်ပြထားသည်။

အမေရိကန်မပါသည့် ကမ္ဘာ့နိုင်ငံများအားလုံးအညွှန်းကိန်းတွင် ကုမ္ပဏီ ၄ ခုတွင် ၂ ခုသည် အလုပ်သမား လွှဲပြောင်းရေး အစီအစဉ်များမှ အလုပ်သမားများ ရယူခဲ့ကြောင်း စွပ်စွဲခံထားရပြီး ၂ ခုမှာ စခန်းတည်ဆောက် ရေးတွင် ပါဝင်ပတ်သက်နေသည်ဟု Toronto Star က ဖော်ပြခဲ့သည်။