မဇ္ဈိမ။ ။ ရန်ကုန်မြို့တွင် ယနေ့ ဒီဇင်ဘာ ၂ ရက် ညနေပိုင်းအချိန်မှစ၍ မြူခိုးအနည်းငယ်ဖုံးလွှမ်းမှု ဖြစ်ပွားခဲ့သည်။
ယင်းဖြစ်စဉ်သည် ယနေ့ ညနေ ၄နာရီအချိန်ခန့်မှ စတင်ဖြစ်ပွားခဲ့ခြင်းဖြစ်ပြီး၊ ရန်ကုန်မြို့ ကမ္ဘာအေးဘုရားလမ်းတစ်လျောက်နှင့် ရန်ကုန် ပြည်လမ်းတစ်လျောက် မြူခိုးများကျဆင်းနေသည်ကို တွေ့ရသည်။
အလားတူ ရန်ကုန်မြို့လယ်ခေါင်နှင့် ထိစပ်မြို့နယ်များတွင်လည်း မြူခိုးများကျဆင်းနေသည်ဟု သက်ဆိုင်ရာမြို့နယ်တွင်း သတင်းကွန်ရက်များကဖော်ပြထားသည်။
ယင်းနှင့်ပတ်သက်၍ မိုးလေဝသဆိုင်ရာ ဝါရင့်လေ့လာသူတစ်ဦးဖြစ်သူ ဦးဝင်းနိုင်က " ရန်ကုန်တွင် အနောက်တောင်ဘက်က ရွေ့လာတဲ့ တိမ်တိုက်ကဖုံးနေတယ်၊ အပူချိန်က ၂၇ ဒီဂရီလောက်ကျနေပြီး လေထုစိုထိုင်းဆက ၉၀% လောက်ဖြစ်နေတယ်။ ဘေးပတ်လည်(အနောက်/အရှေ့နဲ့ မြောက်ဘက်)မှာ ဖိအား 1009hPa ရှိနေပြီး မြို့ပေါ်မှာတော့ 1007 1008 hPa အထိ ကျနေတယ်။ ရေပြင်ညီမှာ မြောက်ဘက်က လေတိုက်နှုန်း တစ်နာရီ နှစ်မိုင်လောက်ရှိပေမဲ့ အမြင့်ပေ ၂၀,၀၀၀ မှာ လေတိုက်နှုန်းက သုံည လုံးဝမတိုက်ဘူး။ မြေဆီလွှာစိုထိုင်းဆ ၉၃% အထိ ရှိနေသေးတော့ မြေကြီးထဲက ရေခိုးရေငွေ့တွေ အငွေ့ပျံတယ်။ အပေါ်ကိုတက်လာကြတယ်။ ရန်ကုန်မြို့ထဲက တချို့နေရာတွေမှာ မြူတွေဆိုင်းနေသလိုဖြစ်ပြီး လေကလဲ ငြိမ်နေတယ်။"ဟု သုံးသပ်ထားသည်။
ယင်းကဲ့သို့သောဖြစ်စဉ်ကို ပြီးခဲ့သော ၂၀၂၂ ခုနှစ် အစောပိုင်းအချိန်ကလည်း တစ်ကြိမ်ဖြစ်ပွားခဲ့သေးသည်။
စာတည်း - သန့်ဇော်(သန်လျင်)
