တရုတ်နိုင်ငံ၏ စစ်ရေးစွမ်းရည်များ အလျင်အမြန် တိုးတက်လာခြင်းသည် အာကာသနယ်ပယ်တွင် အမေရိကန်သာလွန်နေမှုအပေါ် အန္တရာယ်များတိုးလာကြောင်း အမေရိကန် စစ်ဘက်ဆိုင်ရာ အာကာသအဖွဲ့ အကြီးအကဲက နိုဝင်ဘာ၂၈ ရက်တွင် ပြောသည်။
အမေရိကန် အာကာသတပ်ဖွဲ့၏ ဒါရိုက်တာ နီနာအာမက်နိုက တရုတ်အစိုးရသည် ဂြိုဟ်တုဆက်သွယ်ရေးနှင့် ပြန်လည်အသုံးပြုနိုင်သည့် အာကာသယာဉ်ကဲ့သို့သော နယ်ပယ်များအပါအဝင် စစ်ဘက်ဆိုင်ရာ အာကာသနည်းပညာ ဖွံ့ဖြိုးတိုးတက်ရေးတွင် သိသာထင်ရှားသော တိုးတက်မှုများလုပ်ဆောင်နိုင်ခဲ့ခြင်းက တခြားနိုင်ငံများအနေဖြင့် အာကာသအစီအစဉ်များ လျင်မြန်စွာ အရှိန်မြှင့်ရန်ဖြစ်စေခဲ့သည်။
"တရုတ်က ကျွန်တော်တို့ကို အမီလိုက်ပြီး ကျော်လွန်သွားနိုင်တယ်လို့ ထင်ပါတယ်။ သူတို့လုပ်ဆောင်ခဲ့တဲ့ တိုးတက်မှုတွေက အံ့မခန်း မြန်ဆန်လွန်းလှပါတယ်” ဟု အမေရိကန်နှင့် သြစတြေးလျအစိုးရများ၏ ရန်ပုံငွေပံ့ပိုးမှုများပါဝင်သည့် သုတေသနအဖွဲ့အစည်း ဩစတြေးလျမဟာဗျူဟာမူဝါဒအင်စတီကျုမှ ဆစ်ဒနီတွင် ကျင်းပသည့် ပွဲတစ်ခုတွင် အာမက်နိုက ပြောသည်။
အမေရိကန်နှင့် ရုရှားတို့ ကြီးစိုးသော အာကာသပြိုင်ပွဲတွင် သမိုင်းကြောင်းအရ နောက်ကျခဲ့သော တရုတ်သည် မကြာသေးမီနှစ်များအတွင်း သိသိသာသာ တိုးတက်လာကာ အမေရိကန်နှင့် အခြားသော အနောက်နိုင်ငံများကို စိုးရိမ်ထိတ်လန့်စေခဲ့သည်။
တရုတ်နိုင်ငံသည် သဘာဝအရင်းအမြစ်များရရှိရေးအတွက် ဂြိုဟ်သိမ်ဂြိုဟ်မွှားများနှင့် ဂြိုလ်ငယ်များကို တူးဖော်ရန် ရည်ရွယ်သော စမ်းသပ်နည်းပညာကို တီထွင်လျက်ရှိသည်။
တရုတ်နိုင်ငံသည် ရုရှားနှင့်အတူ မကြာသေးမီနှစ်များအတွင်း အန္တရာယ်ရှိသော အာကာသအမှိုက်များကို ဖြစ်စေသည့် မဆင်မခြင်ဒုံးကျည်စမ်းသပ်မှုများကိုလည်း ပြုလုပ်ခဲ့ကြောင်း အာမက်နိုက ပြောကြားခဲ့သည်။
“ဒီအမှိုက်အပိုင်းအစတွေဟာ အာကာသထဲက ကျွန်မတို့ရဲ့ စနစ်အားလုံးကို ခြိမ်းခြောက်နေပါတယ်။ ဒီစနစ်တွေက နိုင်ငံအားလုံးရဲ့ လုံခြုံရေး၊ စီးပွားရေးနဲ့ သိပ္ပံဆိုင်ရာ အကျိုးစီးပွားတွေအတွက် အရေးကြီးတဲ့ ဟာတွေပါ” ဟု သူမက ဆိုသည်။
တရုတ်နိုင်ငံ၏ စွမ်းဆောင်ရည်မြင့်မားလာမှုကို တန်ပြန်ရန် ကြိုးပမ်းမှုတစ်စိတ်တစ်ပိုင်းအဖြစ် ၂၀၁၉ ခုနှစ်တွင် တည်ထောင်ခဲ့သော အာကာသတပ်ဖွဲ့သည် အမေရိကန်စစ်တပ်၏ စတုတ္ထမြောက်ဌာနခွဲဖြစ်ပြီး အာမက်နိုက ပထမဆုံး အမြဲတမ်းခေါင်းဆောင်အဖြစ် တာဝန်ထမ်းဆောင်ခဲ့သည်။ တရုတ်သည် နိုဝင်ဘာ ၂၉ ရက်တွင် အာကာသစခန်းအသစ်သို့ အာကာသယာဉ်မှူး ၃ ဦးကို စေလွှတ်မည်ဖြစ်သည်။
